1. INTSHAYELELO
1.1 IPhulo leZiseko zokuFunda (Foundations for Learning Campaign) liphulo leminyaka emine elinjongo ikukuba isizwe sijolise ngakumbi ekuphuculeni izakhono zokufunda, ukubhala nokubala zabantwana baseMzantsi Afrika.
1.2 Eyona nto ephambili kweli phulo kukubonelela ngeemvavanyo ezikumgangatho ofanayo ezisetwe kuzwelonke zolwazi lokufunda nokubhala kunye nolwazi lokubala.
1.3 Ezi mvavanyo zaqho ngonyaka ziqhutywa ukususela kumaBakala 1 - 6. Ezi mvavanyo zaqala ngo-2008 kwaye ziya kuqhutywa qho ngonyaka kude kube ngo-2011.

2. IZIZATHU ZOKUQHUTYWA KWEZI MVAVANYO ZAQHO NGONYAKA
2.1 Injongo yeemvavanyo:
2.1.1 kukubonelela izikolo ngezixhobo zovavanyo ezingumzekelo ukwenzela ukuphucula umgangatho wemisebenzi yovavanyo ezikolweni, kwaye
2.1.2 kukuvelisa idatha enokuthenjwa nenokusetyenziswa xa kusenziwa iiprogram zokunika inkxaso efanelekileyo ezikolweni kwiimeko ezingqongileyo ezingafaniyo (different contexts) nakumanqanaba entsebenzo angafaniyo.
2.2 Iimvavanyo zeZiseko zokuFunda ziya kulungelelaniswa "nezinto esekufikelelwe kuzo" ("milestones") kwaye ziya kugxila ekuvavanyeni izakhono ezibaluleke gqitha zolwazi lokufunda nokubhala kunye nolwazi lokubala.

3. IIMVAVANYO ZIKAZWELONKE
3.1 Iimvavanyo zikazwelonke zango-2009 zicwangciselwe owe-2 - 6 Novemba 2009 kwaye kufuneka zibhalwe ngabo bonke abafundi abakumaBakala 1 - 6 kuwo onke amaphondo.
3.2 ISebe leMfundo likazwelonke (national Department of Education) (DoE)) liya kuseta iimvavanyo ezikumgangatho ofanayo zolwazi lokufunda nokubhala (kumaBakala 1 - 3) nakwimathematika kunye nakwiilwimi (kumaBakala 4 - 6). Ezi mvavanyo ziya kubhalwa ngolwimi lokufunda nokufundisa lwesikolo.
3.3 Isethi enye yeemvavanyo neememoranda iya kuthunyelwa kwisikolo ngasinye ingamaxwebhu angamaphepha nangekhompyutha (CD) ziqale zidlule kwii-ofisi zezithili zemfundo kwikota yesithathu. Kuya kufuneka izikolo zizenzele iikopi zeemvavanyo ukulungiselela abafundi bazo, kwaye ziyacelwa ii-ofisi zeZithili Zemfundo ukuba zincede ziqinisekise ukuba zonke izikolo zineekopi ezaneleyo zabafundi bazo.
3.4 I-DoE iya kubonelela ngeememoranda ezifunekayo zokumakisha iimvavanyo ezikumgangatho ofanayo.
3.5 Luxanduva lwenqununu yesikolo ukuqinisekisa ukuba ootitshala balungisa apha naphaya iiprogram zabo ukwenzela ukuba zibandakanye ukubhalwa nokumakishwa kwezi mvavanyo zifanayo nokurekhodwa kwamanqaku.
3.6 Iziphumo zezi mvavanyo zimele ukufakwa NJENGOMNYE KUPHELA kwimisebenzi yovavanyo emiselweyo yokuvavanywa kwamaBakala 1 - 6, kwaye mazisetyenziswe nezinye iziphumo ezirekhodwe ngokusemgaqweni zokwenza izigqibo malunga ngokuqhubela phambili kwabafundi (progression of learners).

4. ISIPHELO
4.1 ISebe i-WCED licela zonke iinqununu, iikomiti zolawulo lwezikolo, ootitshala namabhunga olawulo ezikolo balixhase eli phulo.
4.2 Ithagethi yomfundi ngamnye yokuba afumane ubuncinane u-50% kulwazi lokufunda nokubhala nakulwazi lokubala/kwimathematika kwisikolo ngasinye ngo-2011 iya kufikelelwa kuphela xa bonke abathathi-xhaxheba abachaphazelekayo bezimisele ukuphucula amanqanaba olwazi lokufunda nokubhala nolwazi lokubala kubafundi bethu.
4.3 Ezinye iinkcukacha malunga nokumakisha, ukufakwa kwamanqaku ekhompyutheni nokungeniswa kweeshedyuli kwii-ofisi zezithili zemfundo ziya kwaziswa kungekudala.

5. Kucelwa uqinisekise ukuba bonke ootitshala nabazali bayaziswa ngokubhalwe kule ngcaciso imfutshane.


ISAYINWE: NGU-T SINGH
INTLOKO: YESEBE LEMFUNDO
UMHLA: 2009:07:14