1. Hierdie minuut gee 'n opsomming van al die eksterne eksamens en assesserings wat afgeneem word in primêre en sekondêre skole en onderwyssentrums vir volwassenes binne die Wes-Kaap Onderwysdepartement. Die doel van hierdie kommunikasie is om die assesserings vir hierdie jaar te verduidelik ten einde aan skole bystand te verleen met goeie en tydige beplanning.
2. Die volgende eksterne eksamens en assesserings sal by primêre en sekondêre skole en onderwyssentrums vir volwassenes afgeneem word gedurende 2009, met inbegrip van die Nasionale Senior Sertifikaat aanvullende eksamen in 2010.
2.1 PRIMÊRE SKOLE
  1. Nasionale Grondslae vir Leerassessering (graad 1 - 6)
  2. WKOD-graad 6-geletterdheids- en -gesyferdheidsassesserings
2.2 SEKONDÊRE SKOLE
  1. Graad 9 Gemeenskaplike Take vir Assessering (GTA)
  2. Die Nasionale Senior Sertifikaat-eksamen (Nov. 2009) en aanvullende eksamen (Feb/Mrt 2010)
  3. Die Senior Sertifikaat-eksamen (Verslag 550 - Mei/Junie 2009)
2.3 ONDERWYSSENTRUMS VIR VOLWASSENES

Die BOOV-vlak 1 - 4 -eksamens en -assesserings

3. Die volgende is besonderhede aangaande elkeen van die eksamens en assesserings. Skole en onderwyssentrums vir volwassenes moet asseblief let op die datums van die onderskeie eksamens en assessering, en dienooreenkomstig beplan.
3.1 PRIMÊRE SKOLE
3.1.1 Nasionale Grondslae vir Leerassessering (graad 1 - 6)
  1. Die Grondslae vir Leerassessering is 'n nasionale assessering wat deur alle leerders in graad 1 tot graad 6 geskryf sal word.
  2. Hierdie is 'n jaarlikse assessering wat in 2008 bekendgestel is as 'n nasionale projek en geskryf sal word tot 2011.
  3. Die hoofdoel van hierdie jaarlikse assesserings is om die lees-, skryf- en syfervaardighede van leerders te verbeter. Gevolglik word die toets in Tale en Wiskunde afgeneem.
  4. Die vraestelle vir hierdie assesserings word opgestel deur die nasionale Departement van Onderwys en volgens aanduidinge sal die nasionale Departement van Onderwys hulle in die vierde kwartaal aan skole voorsien.
  5. Hierdie assesserings moet ingesluit word as 'n komponent in die samestelling van die assesserings vir graad 1 - 6. Dit beteken dat dit gebruik moet word as een van die formele assesseringstake vir die vierde kwartaal.
  6. Hierdie assesserings is geskeduleer om geskryf te word van 16 tot 20 November 2009.
  7. Die assesserings moet nagesien en gemodereer word by die skool en die punte moet elektronies vasgelê en ingedien word by die nasionale Departement van Onderwys.
  8. Die logistieke besonderhede van hierdie assesserings sal nader aan die assesseringstydperk en sodra uitsluitsel van die nasionale Departement van Onderwys verkry is, oorgedra word aan skole
3.1.2 WKOD-graad 6-geletterdheids- en -gesyferdheidsassesserings
  1. (Tydens Oktober en November 2009 sal alle graad 6-leerders eksterne assesseringstoetse skryf in geletterdheid en gesyferdheid, wat toegespits is op die meet van die prestasie en die bepaling van die vordering wat graad 6-leerders in geletterdheid en gesyferdheid gemaak het.
  2. Die graad 6-assesseringstoetse word sedert 2003 geskryf en sal al om die ander jaar geskryf word as 'n provinsiale assessering.
  3. In 2010 sal alle skole weer die WKOD-graad 3-geletterdheids- en -gesyferdheidsassessserings skryf. Hierdie assesserings word ook al om die ander jaar geskryf.
  4. Enige navrae rakende die WKOD-graad 3 en 6-geletterdheids- en -gesyferdheidsassesserings moet gerig word aan dr RS Cornelissen by 021 467 2286 of e-pos rcornelissen@pgwc.gov.za
3.2 SEKONDÊRE SKOLE
3.2.1 Graad 9 Gemeenskaplike Take vir Assessering (GTA)
  1. Die Graad 9-GTA's is in 2003 geïmplementeer. Hierdie assesserings word jaarliks afgeneem en bestaan uit 'n Afdeling A en 'n Afdeling B.
  2. Afdeling A is die informele assesserings (skoolgebaseerde assessering - SGA) terwyl Afdeling B die formele eksamen is.
  3. Die Graad 9-GTA's word opgestel deur die nasionale Departement van Onderwys.
  4. Alhoewel daar verwag is dat die 2009-GTA's (Afdeling A) al in die tweede kwartaal van 2009 afgehandel sou wees, is die volledige pakkette nog nie van die nasionale Departement van Onderwys ontvang nie. Om aan skole genoeg tyd te gee om toepaslik te beplan, mag die GTA's vir Afdeling A nou in die derde kwartaal afgehandel word indien die volledige pakket van die Afdeling A-vraestelle betyds deur die provinsie ontvang word. Verdere inligting in hierdie verband sal aan skole gestuur word sodra duidelikheid daaroor van die nasionale Departement van Onderwys ontvang is.
  5. Afdeling B van die GTA's sal in die 4de kwartaal afgeneem word. Datums vir die Graad 9-assesserings vir 2009 is soos volg:
DATUM 09:00 -11:00 12:00 - 14:00
WEEK EEN    
16 -11- 09 Natuurwetenskap  
17 -11- 09 Sosiale Wetenskappe  
18 -11- 09 Kuns en Kultuur  
19 -11- 09 Ekonomiese en Bestuurswetenskappe  
20 -11- 09 Tegnologie  
WEEK TWEE 09:00 -11:00 12:00 - 14:00
23 -11- 09 Huistaal Tweede Huistaal
24 -11- 09 1ste Addisionele Taal Tweede Addisionele Taal
25 -11 - 09 Lewensoriëntering  
26 -11 - 09 Wiskunde  
27 -11 - 09 GEWYDE VAKANSIEDAG  
WEEK DRIE    
30 -11- 09 2de Addisionele Taal  

3.2.2 Die Algemene Onderwys-en-opleidingsertifikaat (AOS) Loods
  1. Die Algemene Onderwyssertifikaat (AOS) sal in 2009 in 'n steekproef van skole oor die nege provinsies heen geloods word.
  2. In die Wes-Kaap sal 'n totaal van 100 skole aan hierdie loodsprojek deelneem.
  3. Die loodsprojek behels die skryf van die GTA's (Afdeling A en B) soos in ander skole. Daarbenewens sal die loodsskole die resultate verder elektronies verwerk soos gespesifiseer deur die nasionale Departement van Onderwys.
  4. Die loodsskole sal geïdentifiseer en ingelig word van die besonderhede van die loodsprojek sodra die inligting van die nasionale Departement van Onderwys ontvang word.
  5. Die volle implementering van die AOS sal in 2010 plaasvind.
3.2.3 Die Nasionale Senior Sertifikaat-eksamen (Graad 12: NKR-vlak 4)
  1. Die Nasionale Senior Sertifikaat-eksamen is vir die eerste keer in 2008 geskryf.
  2. Die hoofeksamen word geskryf gedurende November en Desember en die praktiese vakke gedurende Oktober van elke jaar.
  3. Die aanvullende eksamen sal elke jaar in Februarie/Maart geskryf word.
  4. Die vraestelle word opgestel deur die nasionale Departement van Onderwys, gemodereer deur Umalusi en voorsien aan die onderskeie provinsies vir administrasie en bestuur.
  5. Eksamenvraestelle sal soos in die verlede by skole afgelewer word voor die eksamen geskryf word.
  6. Die eksamenrooster vir die 2009 nasionale Senior Sertifikaat-eksamen vergesel Omsendbrief 0014/2009.
  7. Alle kandidate wat die Nasionale Senior Sertifikaat-eksamen skryf, moet voldoen aan al die vereistes van skoolgebaseerde assessering wat op skool- en distriksvlak gemodereer en geverifieer moet word voordat dit by die Direktoraat: Eksamens ingedien word.
  8. Indien kandidate nie voldoen aan die vereistes van SGA nie, sal hulle eksamenresultate onvoltooid bly.
3.2.4 Die Senior Sertifikaat-eksamen (Verslag 550: NKR-vlak 4)
  1. Die Senior Sertifikaat-eksamen wat die ou kurrikulum assesseer sal in Junie 2011 uitgefaseer word.
  2. Kandidate wat hierdie kwalifikasie wil voltooi, het nog drie geleenthede om dit te doen (2009, 2010 en 2011).
  3. Hierdie eksamen word elke jaar slegs in Mei/Junie aangebied. Registrasie sluit op 31 Januarie van elke jaar tot 2011.
  4. Hierdie eksamen word slegs by geïdentifiseerde eksamensentrums afgeneem. Eksamenvraestelle sal by sentrums afgelewer word in ooreenstemming met die registrasiestatistieke.
  5. Toelatingsbriewe word aan kandidate uitgereik. Hierdie toelatingsbriewe spesifiseer die datum van die eksamen en die plek waar die kandidaat moet skryf.
  6. Die rooster vir die 2009 Mei/Junie-eksamen vergesel Omsendbrief 0012/2009.
3.3 ONDERWYSSENTRUMS VIR VOLWASSENES: BOOV-vlak 1 - 4-eksamens en -assesserings
  1. Die BOOV-vlak 1 - 4 -eksamens en -assesserings word elke jaar in Junie en Oktober aangebied.
  2. Die BOOV-vlak 1 - 3 is provinsiale assesserings, terwyl BOOV-vlak 4 'n nasionale assessering is.
  3. Die voorsiening van hierdie eksamens en assessering is van belang vir die Menslikekapitaalontwikkelingstrategie van die provinsie asook vir die voorsiening van veelvuldige leergeleenthede vir volwasse leerders.
  4. Die BOOV-assessering behels 50% terreingebaseerde assessering en 50%- eksamens.
  5. Vanaf 2009 moet alle BOOV-sentrums die gestandaardiseerde terreingebaseerde assesseringstake wat deur die nasionale Departement van Onderwys opgestel is, implementeer.
  6. Alle TGA-punte moet gemodereer word op terrein- en distriksvlak.
  7. Die eksamenrooster vir Junie 2009 vergesel Omsendbrief [Assesseringsbestuursminuut] 009/2009.
  8. Die eksamenrooster vir Oktober 2009 sal aan die sentrums gestuur word sodra dit van die nasionale Departement van Onderwys ontvang word.
  9. Die sluitingsdatum vir registrasie vir die Oktober 2009-eksamen is 14 Augustus 2009.
  10. Registrasie vir hierdie eksamens moet by die BOOV-sentrum geskied.
4. U samewerking met die suksesvolle implementering van die onderskeie eksamens en assesserings sal waardeer word.


GETEKEN: BK SCHREUDER
HOOF: ONDERWYS
DATUM: 2009:04:21