1. Die Wes-Kaap Onderwysdepartement (WKOD) in samewerking met die Grondslag-vir-leer-veldtog, het 2009 as die Leesjaar verklaar. In hierdie jaar vier die WKOD lees en die bevordering van biblioteek- en inligtingsdienste om geletterdheid- en gesyferdheids-ontwikkeling in ons skole te ondersteun, en sodoende die NKV as geheel te bevorder.
2. Twintig jaar na die stigting van die eerste onderwysdepartement in die Wes-Kaap in 1839, wat bekend gestaan het as die Departement van Openbare Onderwys van die Kolonie van Kaap die Goeie Hoop, is die eerste onderwysbiblioteek in Kaapstad gestig in 1859. Aangesien daardie biblioteek departementele beamptes en onderwysers by alle skole van die Kaapkolonie bedien het, ongeag ras of tipe skool, is EDULIS trots daarop om sy oorsprong te verbind aan hierdie voorapartheidsjare, om 'n ongebroke rekord van 150 jaar van ondersteuning van onderrig en leer deur middel van die verskaffing van biblioteek- en inligtingsdienste, en om die bevordering van lees te vier.
3. Skole word dus aangemoedig om gedurende 2009 deel te neem aan die spesiale geleenthede vir die bevordering van lees. Dit sal moontlik gemaak word deur die WKOD (EDULIS en/of die kurrikulumdirektorate), sowel as deur ons vennote in die privaat sektor, soos UVSA (die Uitgewersvereniging van Suid-Afrika), SABV (Suid-Afrikaanse Boekhandelaarsvereniging), die Sentrum vir die Boek, Biblionef, READ, die Wes-Kaapse Provinsiale Biblioteekdiens en plaaslike openbare en gemeenskapsbiblioteke. Hierdie geleenthede sal die volgende insluit:
  • Wêreldboekdag (23 April 2009)
  • Kaapstad Boekfees(13 - 16 Junie 2009)
  • Internasionale Geletterdheidsdag (8 September 2009)
  • Internasionale Skoolbiblioteekmaand (Oktober 2009)
Omsendminute sal binnekort na skole gestuur word, met verdere besonderhede oor voorgestelde leesbevorderingsaktiwiteite wat met hierdie geleenthede verband hou.
4. Verder mag skole met leerders van die ouderdom 10 - 14 jaar ook registreer vir die Giggel-IT-projek van die Internasionale Vereniging van Skoolbiblioteekwese (IASL), wat mik na leeruitkomste soos geletterdheid, inligtingsgeletterdheid en die gebruik van tegnologie, deur 'n aanlyn e-Boek saam te stel wat bestaan uit die stories, grappe en gedigte van kinders van oor die wêreld heen. Die sluitingsdatum vir inskrywings vir die Giggel-IT-projek is 1 Desember 2009. Vir verdere besonderhede oor hoe klasse kan deelneem aan die Giggel-IT-kompetisie (sluitingsdatum 31 Julie 2009) en Giggeldorp kan besoek om die Giggelgediertes te sien, gaan na http://www.iasl-online.org/sla/giggleIT/invite.htm. Onderrig- en leerpakkette om lees aan te moedig en te stimuleer kan afgelaai word as uitdeelstukke vir u klasse en sluit in plakkate om in u klas te vertoon.
5. Ter ondersteuning van die 2009 Leesjaar, het die Direktoraat: Kurrikulum AOO 'n DVD saamgestel om die waarde te vier en te erken wat die WKOD 100-boekeprojek na leerders en onderwysers oor die provinsie heen gebring het. Hierdie DVD wys hoe die lees van boeke in die klaskamer gebruik kan word om 'n leeskultuur, die geletterdheidshalfuur en die geletterdheidsles te bevorder. Praktiese wenke en voorbeelde van wat onderwysers gedoen het, word verskaf. Dit word vergesel van 'n nuttige gebruikersgids. Dit is 'n hulpbron wat aangewend kan word om gesprekke oor geletterdheid en die uitruil van idees te bevorder. Dit is ideaal vir personeelontwikkelingsvergaderings en klustersessies. Skole kan hulle distriks-kurrikulumbestuurder of kringkurrikulumadviseur vir die grondslagfase kontak vir verdere besonderhede.
6. Distrikte word ook versoek om gebruik te maak van alle Geletterdheids- en Gesyferdheids- (Litnum-) projekte, aktiwiteite, kompetisies, ens. wat tans in skole aangebied word, of nog in die loop van vanjaar geïmplementeer gaan word as bykomende maniere om die 2009 Leesjaar te bevorder en te vier.
7. In die lig van die kritieke rol van leer-en-onderrigondersteuningsmateriaal (LOOM) ter verbetering van leerderprestasie, moet skole ook bewus wees van die beskikbaarheid van biblioteekhulpbronne vir hierdie doel. As deel van die viering van die 2009 Leesjaar en die voorsiening van biblioteek- en inligtingsdienste aan skole in die WKOD, word u en u personeel hartlik uitgenooi om die EDULIS-biblioteek te kontak (tel. 021 957 9618) of u distrikshulpbronsentrums in Kuilsrivier (tel. 021 900 5111), Mitchell's Plain (tel. 021 370 2084), Paarl (021 860 1229), George (044 803 8328) en Worcester (tel. 023 348 4657) om 'n besoek te reël om inligting te verkry oor dienste, sowel as die beskikbaarheid van gespesialiseerde biblioteekhulpbronne soos die volgende:
  • Inspirerende aktiwiteitsgebaseerde idees vir lesplanne en vir geletterdheids- en gesyferdheidsontwikkeling (waarvan baie gefotokopieer kan word)
  • Video's, DVD's, oudiokassette, CD's, CD ROM's en multimediaformate as verdere leesstimulering
  • leerdergerigte materiaal (insluitend prenteboeke en storieboeke vir alle ouderdomme wat gedurende leesperiodes gebruik kan word), wat spesiaal geëvalueer en hersien is om onderwysers te help om materiaal vir hulle skoolbiblioteke te kies
Groepsbesoeke kan enige tyd van die jaar gereël word soos dit prinsipale en personeel pas as deel van 'n skool se professionele ontwikkelingsprogram.


GETEKEN: SM NAICKER
HOOF: ONDERWYS
DATUM: 2009:04:21