1. Aansoeke word ingewag van persone wat eksamenskrifte vir die November 2009 Nasionale Senior Sertifikaat-eksamen wil nasien. Die vakke wat nagesien moet word, word op die aangehegte lys aangedui.

2. Kriteria vir die aanstelling van nasieners
2.1 Aansoekers moet beskik oor 'n erkende na-Senior Sertifikaat-driejarigekwalifikasie wat die betrokke vak op tweede- maar verkieslik op derdejaarsvlak insluit, of oor 'n ander toepaslike na-Senior Sertifikaat-kwalifikasie in die vak.
2.2 Aansoekers moet ten minste een jaar ondervinding hê in die onderrig van die betrokke vak op graad 12-vlak. Hulle moes ook die vak vir ten minste een jaar in een van die volgende jare onderrig het: 2008 en 2009. Voorkeur sal egter gegee word aan onderwysers wat tans graad 12-kandidate ooreenkomstig die NKV onderrig.
2.3 Alle aansoekers moet in diens wees by inrigtings wat kandidate voorberei vir die Nasionale Senior Sertifikaat-eksamen wat opgestel word deur die nasionale Departement van Onderwys (DvO).
2.4 Ten einde te verseker dat die doeltreffende funksionering van die skool nie deur die afwesigheid van onderwysers geraak word nie, sal nie meer as 30% van die onderwysers by 'n skool as nasieners aangestel word nie, sover moontlik. Skoolhoofde moet dit in ag neem wanneer hulle aansoeke om na te sien, goedkeur.
2.5 Die finale besluit oor watter onderwysers as nasieners aangestel kan word, berus by die Wes-Kaap Onderwysdepartement (WKOD).
2.6 Aansoekers wat aansoek doen om Vraestel 2 (Letterkunde) in Tale na te sien, moet al die voorgeskrewe werke gelees het en 'n studie van hulle gemaak het en nie slegs kennis dra van die werke wat bestudeer word deur die kandidate by hulle eie skole nie. Hierdie aansoekers moet in hulle aansoeke die titels aandui van die voorgeskrewe werke wat hulle in staat is om na te sien.
2.7 Om as n nasiener te kwalifiseer, moet n onderwyser se leerders ten minste 'n 50% slaagpersentasie in die betrokke vak behaal het.
2.8 Aansoekers wat aangedui het dat hulle van voorneme is om te bedank of af te tree en hulle diens by die WKOD teen 30 September 2009 gaan beëindig, sal nie vir aanstelling as n nasiener oorweeg word nie, behalwe in gevalle waar die betrokke onderwyser aansluit by 'n onafhanklike skool wie se kandidate die Nasionale Senior Sertifikaat-eksamen van die DvO aflê.
2.9 Geen onderwyser wat met siekteverlof was vir 25% of meer van die huidige skooljaar of wat siekteverlof tydens die nasientydperk sal neem, sal as nasiener aangestel word nie.
2.10 'n Aansoeker moet 'n afsonderlike aansoekvorm voltooi vir elke vraestel waarvoor hy of sy as nasiener aansoek doen. Die aansoeker moet ook sy of haar voorkeurvak en vraestel op elke aansoekvorm aandui.
2.11 Alle nuwe aansoekers moet 'n gewaarmerkte afskrif van hulle hoogste akademiese kwalifikasie of akademiese studierekord aanheg, wat aandui watter vakke die aansoeker geneem en geslaag het. Nuwe aansoeke wat sonder hierdie gewaarmerkte afskrifte van kwalifikasies voorgelê word, sal hoegenaamd nie oorweeg word nie. Geen uitsonderings sal gemaak word nie, en geen korrespondensie sal met aansoekers in hierdie verband gevoer word nie.
2.12 Interne moderatore van vraestelle wat min kandidate het en wat benewens hulle funksie as interne moderatore ook as nasieners aangestel wil word, moet ook op bogemelde wyse aansoek doen.
2.13 Hoewel die Departement verkies dat skoolhoofde aan die einde van die akademiese jaar by hulle skole teenwoordig moet wees, mag hulle ook aansoek doen om as nasieners aangestel te word. Die keuring van skoolhoofde as nasieners sal, onder andere, aan die volgende voorwaardes onderworpe wees:
  • Alle aansoeke van skoolhoofde sal aan die onderwysdistriksdirekteure vir aanbeveling voorgelê word;
  • Die primêre oorweging sal wees of 'n skool tydens die nasienperiode doeltreffend sal kan funksioneer in die afwesigheid van die skoolhoof;
  • Gepaste reëlings moet getref word vir 'n personeellid om tydens die skoolhoof se afwesigheid as skoolhoof waar te neem. Delegasie van verantwoordelikhede moet skriftelik gedoen word;
  • Die skool moet in staat wees om sonder die skoolhoof se teenwoordigheid te funksioneer en die skool se leerderbevorderingsproses moet nie deur die skoolhoof se afwesigheid benadeel word nie.
3. Aansoekprosedure
3.1 Aansoeke moet aan die volgende adres gerig word:

Hoof: Onderwys
Direktoraat: Eksamenadministrasie
Aandag: Mnr M Cameron/Mnr N Riddles
Wes-Kaap Onderwysdepartement
Grand Central Towers
Laer Parlementstraat
Kaapstad
8001

'n Afskrif van die voorgeskrewe aansoekvorm kan ook verkry word by bogenoemde adres of van die WKOD se webadres: http://wced.wcape.gov.za/circulars
3.2 Aansoeke moet per aangetekende pos gestuur word en die kwitansie wat deur die Poskantoor uitgereik word, moet as bewys van versending behou word. Aansoekvorms kan egter ook per hand ingedien word by die Direktoraat: Eksamens, 4de verdieping, Grand Central Towers-gebou, waar 'n kwitansie uitgereik sal word vir elke aansoek wat ontvang word.

Aansoekvorms moet die Direktoraat: Eksamens bereik teen nie later nie as 16:00 op 18 Mei 2009. Aansoeke mag onder geen omstandighede direk aan hoofnasieners gestuur word nie. Aansoeke wat ná die sluitingsdatum ontvang word, sal nie oorweeg word nie. Die verpligting rus op aansoekers om seker te maak dat hulle aansoeke hierdie kantoor voor die sluitingsdatum bereik.
3.3 Alle navrae, hetsy per telefoon of skriftelik, moet gerig word aan die Direktoraat: Eksamenadministrasie, en nie aan hoofnasieners nie. Tree met een van die volgende amptenare in verbinding:

Mnr Mark Cameron by 021 467 2964 e-pos mgcamero@pgwc.gov.za
Mnr N Riddles by 021 467 2992 e-pos nriddles@pgwc.gov.za

3.4 Goedkeuring van aansoeke

Voltooide aansoekvorms van onderwysers moet deur die skoolhoof of sentrumbestuurder onderteken word. Skoolhoofde/Sentrumbestuurders moet die korrektheid van die aansoeker se besonderhede nagaan voordat die aansoeker se vorm(s) onderteken word.

Voltooide aansoekvorms van kurrikulumbestuurders, skoolhoofde en sentrumbestuurders moet deur die onderwysdistriksdirekteur onderteken word.

Voltooide aansoekvorms van kurrikulumadviseurs moet deur die direkteur of kurrikulumbestuurder van die betrokke onderwysdistrikskantoor onderteken word.

Voltooide aansoekvorms van senior VOO Adviseurs moet deur die Direkteur: Kurrikulum VOO onderteken word.
3.5 Aansoekvorms wat nie deur bestuurders of toesighouers onderteken is nie, sal nie oorweeg word nie.
3.6 Aansoekers word vriendelik versoek om hulle ete-voorkeure op hulle aansoekvorms aan te dui. Let daarop dat die Departement geen ete-voorkeurveranderinge tydens die nasienperiode kan akkommodeer nie.

4. Reëlings vir die Nasientydperk
4.1 Alle nasienwerk word verrig by 'n sentrale plek of plekke in of naby Kaapstad, soos deur die WKOD bepaal word.
4.2 Die datums van die nasientydperk sal later bevestig word. Nasieners moet seker maak dat al hulle skoolverwante nasien- en administratiewe take afgehandel is voor die aanvang van die nasientydperk.
4.3 Daar sal van nasieners verwag word om skrifte vir minstens 8 uur per dag na te sien. Dit sluit tyd wat opsy gesit is vir middagetes en teetye uit. Die nasiensentrum sal daagliks van 06:00 tot 22:00 oop wees vir nasien.
4.4 4.4 Die nasientarief vir elke vraestel sal bekend gemaak word sodra dit van die nasionale Departement van Onderwys ontvang word. Elke moderator, hoofnasiener en nasiener sal ooreenkomstig die Inkomstebelastingwet belas word.
4.5 Dit is noodsaaklik dat skoolhoofde, onderwysdistriksdirekteure, IBB-adviseurs en kurrikulumadviseurs die inhoud van hierdie minuut onder die aandag van alle onderwysers bring. Die Direktoraat: Eksamens kan nie enige verantwoordelikheid daarvoor aanvaar as onderwysers nie oor die inhoud van hierdie minuut ingelig word nie.

5. Die nasien van Nasionale Senior Sertifikaat-eksamenvraestelle vir onderwysers is een van die belangrikste funksies van die eksamenproses. Die WKOD is ernstig ingestel op die aanstelling van gekwalifiseerde en bevoegde nasieners. Prinsipale en ander senior beamptes wat nasieners aanbeveel moet in goeder trou optree. Let daarop dat foutiewe inligting in aansoeke as bedrog beskou sal word en sal hanteer word ingevolge die Wet op die Indiensneming van opvoeders
6. Daar word van alle nuwe nasieners verwag om 'n vrywillige opleidingsessie voor die aanvang van die nasiensessie by te woon.
7. Skoolhoofde moet ontvangs van hierdie minuut erken op die aangehegte vorm wat teruggestuur moet word om hierdie kantoor teen 11 Mei 2009 te bereik.


GETEKEN: T SINGH
HOOF: ONDERWYS
DATUM: 2009:04:23

Bylaag A: Lys van vakke  (grootte: 16 KB)
Aansoekvorm  (grootte: 52 KB)
Vorm: Ontvangserkenning deur prinsipaal  (grootte: 36 KB)