1. Ek verwys u na Eksamenadministrasieminuut 0001/2009 van 30 Januarie 2009.
2. Dit word weer benadruk dat hierdie toetse verpligtend is en geskryf sal word deur leerders in die WKOD se openbare en onafhanklike skole op die volgende datums en tye:
2.1 Wiskundetoets: Maandag 9 Maart 2009 van 09:30 tot 10:50 (80 minute)
2.2 Taaltoets: Woensdag, 11 Maart 2009 vanaf 09:30 tot 11:00 (90 minute)

Die toetsvrae sal óf in Engels óf in Afrikaans wees. Daar is verder ook 'n vraestel vir Xhosa-moedertaalsprekers beskikbaar. Daardie vraestel bevat vrae in Xhosa (50%) en vrae in Engels (50%)
3. Let asseblief daarop dat Braille-, grootdruk- en oudiotoetsbandvraestelle vir leerders met leerhindernisse NIE beskikbaar sal wees nie. Leerders met leerstremminge by hoofstroom- en spesiale skole kan uitgesluit word daarvan om die toetse te skryf. Indien hulle egter die toetse wil skryf, is hulle welkom om dit te doen. Na die toets voltooi is, mag skole die toetsvraestelle verwerk in Braille, groot druk of oudiobande om hulle leerders te toets.
4. Skynet Koeriers sal die toetsdokumente in een besending aflewer, 'n week voor die eerste toetsdatum. Die houers sal die volgende bevat: 'n toetsadministrasiehandleiding, teenwoordigheidsregistervorms, 'n kontroleblad, rubberrekkies en grys plastieksakke waarin die toetsboeke teruggestuur moet word. Na ontvangs van die houers met die toetsboeke word u versoek om die kontroleblad te voltooi en na 021 461 5637 of 021 461 5628 te faks. (Vir enige navrae aangaande toetsboeke of toetsdokumente, bel asb. mnr C. Berry by 021 467 2265).
5. Prinsipale moet dien as inrigtingskoördineerders en die onderwysers moet dien as opsieners (Sien Toetsadministrasiehandleiding vir verantwoordelikhede en ander prosedures.) Die prinsipaal moet seker maak dat die skool die korrekte getal houers ontvang en moet op die afleweringsnota teken vir ontvangs van die houers. Die houers moet in die skool se brandkluis bewaar word en die prinsipaal word verantwoordelik gehou vir die veilige bewaring van die sleutels. Let asseblief daarop dat toetsboeke onder geen omstandighede oopgemaak mag word of die vrae met leerders bespreek word voor die toets afgeneem word nie.
6. Die toetse moet in die toetsboeke beantwoord word (sien toetsadministrasiehandleiding vir besonderhede). Alle leerders moet hulle plekke inneem 30 minute voor die aanvang van die toets. Hierdie tyd moet benut word om die leerders streng alfabeties te rangskik, algemene opdragte te gee en die eerste bladsy te voltooi.
7. Die veelkeusevrae vir albei toetse moet in die toetsboeke beantwoord word deur in elke geval die gepaste letters te omkring.

Note the following amendment to the English Minute:
"Initially, it was required that the multiple choice questions for both tests, be answered on an answer sheet (bubble sheet). Due to unforeseen circumstances, the bubble sheets are NOT included in this consignment and therefore learners are requested to answer the multiple questions in their test book by circling the correct letter that matches the answer".


8. Die toetse moet geskryf word in formele eksamentoestande, en die reëls aangaande die afneem van die Senior Sertifikaat-eksamen moet toegepas word, maar sonder om eksterne opsieners aan te stel.
9. Die toesighoudende onderwyser moet verseker dat daar by die volgende prosedures gehou word op die oggend van die toets.

Voor die toets (08:30 - 09:15)

  • Laat die leerders in alfabetiese volgorde sit en voltooi die teenwoordigheidsregister.
  • Deel die toetsboeke aan die leerders uit.
  • Gee instruksies aan die leerders om al die biografiese inligting te voltooi aan die begin van die toetsboek, nl. geboortedatum, eerste naam, ens.
  • Laat leerders toe om die toetsvrae deur te lees gedurende die 15 minute voor die aanvang van die toets. Hulle mag nie begin beantwoord voordat hulle die instruksie gekry het om dit te doen nie.

09:30 tot 10:50: Skryf van die Wiskunde toets (Die tydsduur is 80)

09:30 tot 11:00: Skryf van die Taaltoets (Die tydsduur is 90)

Na die toets:

  • Leerders moet ophou skryf teen 10:50 en 11:00 onderskeidelik en die toetsboeke moet onmiddellik ingeneem word.
  • Die toesighoudende onderwyser moet die volgende doen na die voltooiing van die toets:
  1. Kontroleer die getal toetsboeke wat ingeneem is met die getal leerders wat die toets geskryf het.
  2. Kontroleer of elke leerder die biografiese inligting korrek en volledig weergegee het.
  3. Maak seker dat die leerders se toetsboeke in dieselfde alfabetiese volgorde gerangskik is as die name op die teenwoordigheidsregistervorms en dat hierdie vorms saam met die toetsboeke ingelewer word.
10. Terugstuur van die toetsboeke

Die volgende prosedure moet gevolg word wanneer die toetsboeke teruggestuur word:

  • Die toetsboeke moet in dieselfde alfabetiese volgorde gerangskik word as op die teenwoordigheidsregistervorms wat vir elke skool opgestel is.
  • Die toetsboeke moet verdeel word in pakke van 'n maksimum van 50 boeke per besending.
  • Die leerderregistervorm moet bo-op elke versending geplaas word.
  • Elke pak moet in een van die grys plastieksakke geplaas word wat verskaf is en moet terugbesorg word aan die Direktoraat: Eksamens, gemerk :"Vir aandag: Mnr E van Breda".
  • Die koerier is geskeduleer om die pakke toetsboeke te kom afhaal binne twee dae na die voltooiing van die laaste toets. Indien pakke van die twee toetse nog nie afgehaal is teen Donderdag, 12 Maart 2009 nie, moet die Direktoraat: Eksamenadministrasie onmiddellik in kennis gestel word by telefoon 021 467 2960/1
11. Die administrasie van hierdie toetse sal deeglik gemoniteer word. Dit sal behels onaangekondigde besoeke aan skole deur beamptes van die nasionale Departement van Onderwys, kringspanbestuurders en lede van die Direktoraat: Kurrikulum AOO
12. Let asseblief daarop dat hierdie toetse nie deel vorm van die vorderingspunt vir graad 9-leerders nie. Verder word daar nie van leerders verwag om spesifieke vakinhoud vir die toetse voor te berei nie, aangesien dit eintlik die begrip van konsepte en vaardighede op 'n gepaste vlak vir die einde van graad 8 is wat getoets gaan word.
13. Daar sal nie van onderwysers verwag word om hulle leerders se antwoordskrifte na te sien nie. Die toetsboeke sal na die Universiteit van Kaapstad gestuur word vir die nasien en die verwerking van die uitslae. Elke skool sal sy eie uitslae ontvang, saam met 'n gedetailleerde ontleding van hoe die skool presteer het. Elke leerder sal 'n sertifikaat ontvang en daarom is dit noodsaaklik dat daar seker gemaak word, tydens registrasie, dat name korrek gespel is.
14. Prinsipale en onderwysers word versoek om seker te maak dat die toetse op die geskeduleerde datums en tye geskryf word soos aangedui, en dat die strepieskode-teenwoordigheidsregisters geteken word.


GETEKEN: CD BIRTLES
HOOF: ONDERWYS
DATUM: 2009:03:03