1. Die Wes-Kaap Onderwysdepartement (WKOD) sal in Junie 2009 die BOOV Vlak 4-eksamens aanbied ooreenkomstig die toepaslike reëls, kriteria en standaarde.
2. Alle geregistreerde WKOD-gemeenskapsleersentrums word versoek om hulle kandidate in te skryf vir eksamens in die leerareas van hulle keuse, op voorwaarde dat die kandidate al die eenheidstandaarde in die betrokke leerareas voltooi het. Waar moontlik sal eksamens aangebied word vir al die leerareas wat deur kandidate benodig word. Die Direktoraat: Eksamenadministrasie behou hom egter die reg voor om in leerareas waar daar te min inskrywings is, nie eksamens aan te bied nie.
3. Die eksamen vir 'n leerarea tel 50% van die punte, terwyl die oorblywende 50% verkry sal word van gemodereerde leerterreingebaseerde assesseringsportefeuljes.
4. Die rooster vir die Junie 2009-eksamen sal voor die afneem van die eksamen onder dekking van 'n Assesseringsbestuursminuut voorsien word.
5. Sentrumbestuurders word versoek om een van die ingeslote inskrywingsvorms in te vul vir elke kandidaat wat vir die eksamen wil inskryf. Indien 'n kandidaat as gevolg van siekte of ander onvermydelike omstandighede afwesig is, moet die betrokke kandidaat se inskrywingsvorm onderteken word deur die sentrumbestuurder wat dan ook langs sy of haar handtekening moet aandui dat die kandidaat afwesig was.
6. Ten opsigte van die versoek vir "tipe inskrywing" op die vorm, gebruik asseblief die gepaste kode om aan te dui of die kandidaat afkomstig is van 'n departementele (openbare) of 'n onafhanklike (industriële) volwassene-leersentrum.
7. Let daarop dat geen veranderings in leerareas toegelaat sal word nadat die inskrywings gefinaliseer is nie. Inskrywingsvorms moet dus akkuraat ingevul word.
8. Alle voltooide inskrywingsvorms, in streng alfabetiese volgorde gerangskik, en Bylae A, moet die Direktoraat: Eksamenadministrasie bereik teen nie later nie as Vrydag, 20 Maart 2009. Geen laat inskrywings sal aanvaar word nie.
9. Die riglyne rakende die standaardisering, appèlle en sertifisering kan verkry word in Omsendbrief 0027/2004 en moet saamgelees word met die dokument, Nasionale beleid oor die afneem van die BOOV-vlak 4-eksamens, wat in 2002 aan openbare volwassene-leersentrums voorsien is.


GETEKEN: AP CLAUSEN
HOOF: ONDERWYS
DATUM: 2009:02:06

Inskrywingsvorm vir Junie 2009  (grootte: 28 KB)
Bylae A: BOOV-VLAK 4 Sentrumbesonderhede  (grootte: 28 KB)

Staatskoerant 23590 van 5 Julie, 2002: National Policy on the Conduct of the ABET Level 4 Examinations
(grootte: 2 743 KB)