1. Die aangehegte eisvorm (Bylae A) moet deur die hoofopsiener in swart ink voltooi word t.o.v. homself/haarself en elke hulpopsiener wat by 'n spesifieke eksamensentrum toesig gehou het. Die prinsipaal of sentrumbestuurder moet die getal sessies bevestig en die eisvorm mede-onderteken.
2. Die Departement moet skriftelik verwittig word van enige verandering in 'n opsiener se adres wat plaasgevind het nadat die nominasievorms ingedien is.
3. Gevangenisse wat gebruik maak van opsieners wat nie hulle eie personeel is nie, word versoek om die Departement skriftelik van sodanige reëlings te verwittig.
4. Opsieners sal vergoed word teen die volgende Departementele tariewe (onderworpe aan verandering):

Hoofopsiener         R114.65 per sessie
Assistentopsiener  R  76,45 per sessie

U word daaraan herinner dat onafhanklike skole en kolleges self verantwoordelik is vir die vergoeding van hulle eie opsieners.

5. Wanneer opsieners vergoed word, word eksamensessies voor 12 uur middag beskou as oggendsessies. Eksamensessies wat na 12 uur middag 'n aanvang neem, word as middagsessies beskou.
6. Eise wat ontvang word vir plaasvervangende opsieners sal slegs geprosesseer word indien die korrekte nominasie- en aanstellingsprosedure gevolg is.
7. Maak asseblief seker dat slegs die voorgeskrewe getal hulpopsieners per sessie gebruik word. 'n Verduidelikende brief moet 'n eis om addisionele opsieners vergesel.
8. Die meeste prinsipale het reeds ingestem dat die Departement die opsienersgeld in hulle skole se bankrekenings kan inbetaal. Aangesien die Nasionale Senior Sertifikaat-eksamen op 4 Desember 2009 ten einde loop, sal dit nie vir die Departement moontlik wees om al die fondse in skole se bankrekenings oor te betaal voor die skole op 11 Desember 2009 sluit nie. Die fondse sal egter op 10 en 18 Desember 2009, met 'n finale datum van 7 Januarie 2010 beskikbaar wees. Om ons in staat te stel om betyds die opsieners se eisvorms te prosesseer, word u versoek om seker te maak dat eisvorms die Departement teen 4 Desember 2009 bereik. Eise wat na hierdie datum ontvang word, sal in Januarie 2010 betaal word.
9. Die eisvorm verskaf kolomme vir hoofopsieners wat die verpligte opleidingsessies bygewoon het. Eisers moet aandui watter afstand hulle afgelê het, en of dit van binne 'n radius van 75 km of van buite daardie radius was. Hulle mag slegs vir een opleidingsessie eis indien hulle van binne 'n radius van 75 km gereis het, of vir twee sessies indien hulle van buite daardie radius gereis het.
10. Hoofopsieners wat gehelp het met die ontvangs en kontrolering van vraestelle moet hulle eis vir hierdie diens in die toepaslike kolom op die eisvorm aandui. Hulle mag vergoeding eis vir slegs een verdere sessie as hulle behulpsaam was met die kontrolering van die 5 besendings vraestelle.
11. Ten einde te help dat opsieners se eise stiptelik betaal word, kan die voltooide vorm na hierdie kantoor gefaks word by faksnommer 021 461 5637 of 086 692 2242. Indien u verkies om die eis te faks, moet die oorspronklike voltooide vorm na die Departement gepos word. Die hoofopsiener moet 'n afskrif van die voltooide eisvorm vir rekorddoeleindes bewaar.
11. Onmiddellik na die finale eksamensessie by u sentrum, moet die oorspronklike kopie van die voltooide eisvorm op die vinnigste moontlike manier, hetsy per pos, koerierdiens of hand, gestuur word na een van die volgende adresse:

Posadres
Hoof: Onderwys
Vir aandag: Me VB du Plessis/Me E du Toit    
Wes-Kaap Onderwysdepartement
Direktoraat: Eksamens Administrasie
Privaatsak X9114
Kaapstad
8000
  Straatadres
Hoof: Onderwys
Vir aandag: Me VB du Plessis/Me E du Toit    
Wes-Kaap Onderwysdepartement
Direktoraat: Eksamens Administrasie
5de Vloer - Kamer 515
Grand Central-gebou
Laer Parlementstraat
Kaapstad
8001
 



GETEKEN: AP CLAUSEN
HOOF: ONDERWYS
DATUM: 2009:10:23


Die dokumente, waarna verwys word in die Minuut, sal aan skole gestuur word.