1. Die Geografiese Inligtingstelsels- (GIS-) bewustheidsweekuitstalling 2009 is 'n gesamentlike inisiatief van die Geografiese Inligtingstelselvereniging van Suid-Afrika (GISSA) in die Wes-Kaap en die Wes-Kaap Onderwysdepartement (WKOD).
2. Die 2009-uitstalling sal plaasvind op 20, 21, 23 en 24 April 2009 en sal die aandag vestig op die gebruik van tegnologie in die Geografie-klaskamer, en opleidings- en ontwikkelingshulpbronne en -dienste in die Wes-Kaap.
3. Tans in sy vyfde jaar beloof die 2009-uitstalling om selfs groter en meer innoverend te wees as in die verlede. Verskeie opwindende temas en geleenthede om huidige uitdagings en ontwikkelings in die Geografie-klas te ondersoek, sal aangebied word.
4. Volledige programbesonderhede kan op die WKOD se Kurrikulumwebtuiste
( http://curriculum.pgwc.gov.za/ ) en die Geografiewebtuiste (VOO)
( http://curriculum.pgwc.gov.za/site/39/page/view/ ) gevind word. Plakkate wat aan skole voorsien sal word, sal besonderhede van al die gebeure verskaf. Daarbenewens sal artikels en advertensies rakende GIS-bewustheidsweek in die media verskyn.
5. Die 2009-uitstalling sal saamval met 'n minikonferensie oor onderwerpe wat verband hou met die nuwe Geografie-sillabus van die VOO-NKV.
6. Die uitstalling sal by die kampus van die Universiteit van Wes-Kaapland in Modderdamweg, Bellville aangebied word en sal 'n program van seminare en ander aktiwiteite insluit. Hoewel sessies gedurende die bewustheidsweek van groot belang vir leerders sal wees, word skole versoek om onderwysers aan te moedig om ook die sessies by te woon sodat hulle in 'n beter posisie sal wees om onderrigmetodiek uit te brei en nuttige inligting oor loopbaankeuses aan leerders te verskaf.
6.1 Uitstallers sal toegang tot inligting verskaf oor alle aspekte van GIS-onderrig en -leer, opleiding en ontwikkeling, en deur die nuutste kursusse, kursusmateriaal, opvoedkundige sagteware, leer- en onderrigondersteuningsmateriaal, -tegnieke en -metodologieë uit te stal.
6.2 Onderwysers, instrukteurs, vaardigheidsontwikkelingspraktisyns en -fasiliteerders se deelname aan die program sal verseker dat hulle blootgestel word aan nasionale en internasionale tendense in verskeie sektore en op alle leervlakke. Die program sal ook 'n platform voorsien vir netwerkaktiwiteite, vennootskappe en aktuele bespreking.
6.3 Die GIS-bewustheidsweekprogram sal fokus op Geografie-onderrig en -opleiding. Skole wat veranderinge aan hulle kurrikulum oorweeg, sal dus baat by 'n besoek aan die uitstalling, aangesien hulle blootgestel sal word aan 'n volledige reeks leeropsies.
7. Die Vrydagprogram is spesifiek ontwerp om tot voordeel van Geografie-onderwysers van graad 9 tot 12 te wees, insluitende dié afkomstig van landelike gebiede. Praktisyns van verskillende sektore sal van 14:00 tot 16:00 op 24 April 2009 referate oor GIS-onderwerpe lewer. Indien u dit wil bywoon, tree asseblief teen nie later nie as 31 Maart 2009 in verbinding met Devona Naude by tel 021 807 4657 of e-pos Devona.Naude@drakenstein.gov.za met bywoningsyfers sodat sitplekke en spyseniering gereël kan word.
8. Alle WKOD-skole word aangemoedig om die 2009 GIS-bewustheidsweekuitstalling te ondersteun. Skole sal egter self vervoer moet reël om leerders in staat te stel om dit by te woon.


GETEKEN: SM NAICKER
HOOF: ONDERWYS
DATUM: 2009:03:16