1. Die Wes-Kaap Onderwysdepartement (WKOD) is weer eens uitgenooi om deel te neem aan die 2009 Suidelike Afrikaanse Ontwikkelingsgemeenskap (SAOG) se Opstelwedstryd, die 11de van sy soort. Die Lidstate wat versoek is om inskrywings voor te lê, is Angola, Botswana, die Demokratiese Republiek van die Kongo, Lesotho, Madagaskar, Malawi, Mauritius, Mosambiek, Namibië, Suid-Afrika, Swaziland, die Seychelles, Tanzanië, Zambië en Zimbabwe.
2. Belangstellende skole, opvoeders en leerders word verwys na die inligting vervat in hierdie minuut. Daar moet veral gelet word op die vervaldatums en riglyne wat verstrek word. Die beste opstelle van WKOD-skole moet die betrokke kurrikulumadviseur in elke onderwysdistrik teen 27 Maart 2009 bereik. Die drie beste opstelle sal dan teen 3 April 2009 aan WKOD-Hoofkantoor en uiteindelik teen 30 April 2009 aan die Direkteur-generaal (nasionale Departement van Onderwys) voorgelê word..
3. Die onderwerp is die volgende: Hoe behoort SAOG-regerings, sakeondernemings en burgerlike-organisasies saam te werk ten einde te verseker dat die 2010 Afrika-beker van Nasies in Angola en die 2010 FIFA Wêreldbeker in Suid-Afrika bydra tot die sosio-ekonomiese ontwikkeling van die mense in die SAOG-streek?
4. 'n Nasienpaneel sal by die nasionale Departement van Onderwys byeengeroep word om die drie nasionale wenners aan te wys. Daardie drie opstelle sal teen 31 Mei 2009 vir die streekskof van die wedstryd aan die SAOG-sekretariaat voorgelê word.
5. Die SAOG-sekretariaat het 'n bedrag van US $1000 as prysgeld bewillig vir die wenners in elke Lidstaat. Die bedrae wat toegewys is, is soos volg:
  • US $ 500 vir die eerste prys
  • US $ 300 vir die tweede prys
  • US $ 200 vir die derde prys
6. Die drie wenners uit elk van die SAOG-lidstate sal dan op streeksvlak meeding. 'n Paneel van beoordelaars sal by die SAOG-hoofkantoor byeenkom om die streekswenners aan te wys. Pryse vir die streekswenners sal soos volg wees:
  • US $ 1500 vir die eerste prys
  • US $ 1000 vir die tweede prys
  • US $ 750 vir die derde prys
7. Daarbenewens sal die drie streekswenners in Augustus/September 2009 na 'n gasheerstad (moet nog aangekondig word) in Suid-Afrika reis om hulle pryse tydens die amptelike openingseremonie van die SAOG-staatshoofde- en -regeringsberaad te ontvang. Die wenner van die eerste prys kan ook gevra word om uittreksels uit die opstel by die openingseremonie voor te lees. 'n Spesiale Aanprysingsertifikaat en 'n SAOG-soewenier sal deur middel van die Nasionale Kontakpersoon gestuur word aan studente wat onder die top tien beste presteerders in die SAOG-streekswedstryd is. Vanjaar sal die Suid-Afrikaanse nasionale wenners, as wenners afkomstig van die Beraad se gasheerland, hulle pryse naas die SAOG-streekswenners ontvang.
8. Die opstel moet bestaan uit nie meer nie as 2000, en nie minder nie as 1000, woorde en moet in Engels geskryf word. Waar leerders toegang het tot rekenaars, word hulle aangeraai om hulle inskrywings te tik en beide sagte- en hardekopieë in te dien. Al die opstelle moet duidelik gemerk wees met die naam van die student, die skool en die land. Hulle kan die hardekopieë teken en parafeer om seker te maak dat hulle nie gewysig word nie.
9. Daar word van studente verwag om tydens die skryf van hulle opstelle by die volgende riglyne te hou:
9.1 SAOG Geskiedenis en Doelwitte: Studente moet 'n bewustheid toon van die wordingsgeskiedenis en doel van die totstandkoming van die SAOG, sy huidige lidmaatskap, sy mikpunte en doelwitte en die sosio-ekonomiese omvang van sy streeksintegrasie-agenda. (15 punte)
9.2 Studente moet in hierdie stadium hulle begrip toon van die belangrikheid van die 2010 Afrika-beker van Nasies en die 2010 FIFA Wêreldbeker vir die sosio-ekonomiese ontwikkeling van die mense van die SAOG-streek. (15 punte)
9.3 Hoe die verskillende sektore moet saamwerk om te verseker dat hierdie geleenthede bydra tot die welsyn van die mense van die streek. Daar word van studente verwag om te bespreek hoe die SAOG-regerings, -sakeondernemings, en -burgergemeenskap moet saamwerk om te verseker dat die gewone mense van die streek sal baat by die 2010 Afrika-beker van Nasies in Angola en die 2010 FIFA Wêreldbeker in Suid-Afrika. (30 punte)
9.4 Studente moet die stappe wat op nasionale en streeksvlakke deur SAOG-regerings, nie-regeringsagentskappe en ander sektore gedoen moet word om die twee sokkergeleenthede suksesvol voordelig vir die burgers van die SAOG-streek te maak, demonstreer. (30 punte)
9.5 Studente moet verduidelik hoe die bogemelde stappe geïmplementeer kan word om volle deelname van die mense van die streek en hulle instellings te verkry om die sukses van die 2010 Afrika-beker van Nasies en die 2010 FIFA Wêreldbeker met betrekking tot die verligting van die lewenstandaarde van die mense van die SAOG-streek kollektief te verseker. (20 punte)
10. Die opstelle moet teen 3 April 2009 vir finale provinsiale keuring gestuur word aan:
Mev. Hazel E. Goliath
Senior Kurrikulumbeplanner: Engels
Wes-Kaap Onderwysdepartement 
Kamer 838 
Privaatsak X9114
Kaapstad 8000
Tel.: 021 467 2579
Faks:  021 467 2258
Epos: hkanes@pgwc.gov.za
11. Dit sal waardeer word indien hierdie saak u onmiddellike aandag kan geniet. Moedig asseblief leerders aan om deel te neem!


GETEKEN: SM NAICKER
HOOF: ONDERWYS
DATUM: 2009:03:09