| 1. |
Die Wes-Kaap Onderwysdepartement (WKOD) het Fase 2 van die ontwerp van sy aanlyninventaris afgehandel en skole kan nou hulle inventarisse en die WKOD-vraelys aanlyn voltooi. |
| 2. |
Vir hierdie doel sal die WKOD vanaf 16 November 2009 tot 12 Maart 2010 sy aanlyninventaris toeganklik maak vir al die skole wat Fisiese Wetenskappe in graad 10 - 12 aanbied. |
| 3. |
Skole kan deur middel van hulle SOBIS-nommer en pin toegang tot die aanlyninventaris verkry. |
| 4. |
Die data van die skole wat hulle voltooide vraelyste en inventarisse betyds ingedien het, is reeds aanlyn vasgelê. Hierdie skole hoef dus slegs die data rakende hulle huidige voorraad voorhande by te werk. |
| 5. |
Die oorblywende skole sal self die hele vraelys en inventaris aanlyn moet voltooi. |
| 6. |
Die voltooide vraelys en inventaris moet teen 12 Maart 2010 aanlyn vasgelê word deur elke WKOD-skool wat Fisiese Wetenskappe in graad 10 -12 aanbied. Daarna moet skole hulle vraelys en inventaris gereeld, minstens eenkeer 'n maand, bywerk. |
| 7. |
Kurrikulumadviseurs in die verskillende distrikte is opgelei om bystand aan hulle skole te verleen en kan om hulp gekontak word. |
| 8. |
Die webadres van die WKOD-aanlyninventaris is http://cemis.wcape.gov.za. Om skole by te staan met die vaslegging van hulle data aanlyn, het die WKOD 'n nuttige Gebruikersgids voorsien. (Verwys na die aanhegsel.) |
| 9. |
Voordat 'n skool sy data aanlyn kan vaslê, moet dit 'n voltooide hardekopie van sy inventaris en vraelys hê. Hardekopieë van die inventaris, vraelys en die Gebruikersgids kan afgelaai word van die Fisiese Wetenskappe-webwerf by http://curriculum.pgwc.gov.za/site/52/page/view. Nadat u die webwerf oopgemaak het, kliek net op "Events". |
| 10. |
Die WKOD bedank alle betrokkenes vir hulle samewerking en spreek sy dank uit teenoor die Sentrum vir e-Innovasie vir die ontwerp van die aanlyninventaris. |
| 11. |
Bring asseblief die inhoud van hierdie minuut onder die aandag van alle onderwysers verantwoordelik vir Fisiese Wetenskappe. |
GETEKEN: SM NAICKER
HOOF: ONDERWYS
DATUM: 2009:11:12
|