Die Wes-Kaap Provinsiale Tesourie, in oorleg met Nedbank en die Wes-Kaap Onderwysdepartement (WKOD), nooi skole hiermee uit om in te skryf vir die Wes-Kaap se Ekonomie-opstelwedstryd van 2009.

1. Agtergrond
1.1 Nedbank is vir die afgelope paar jaar as deel van sy Maatskaplike-verantwoordelikheidsprogram aktief betrokke by gemeenskapsopheffing en -verbetering.
1.2 In hierdie verband koördineer Nedbank die Nedbank- en Ou Mutual- begrotingstoespraakwedstryd op 'n nasionale basis.
1.3 Vanweë die sukses van die wedstryd, het die WKOD en die Provinsiale Tesourie Nedbank om hulp genader en versoek dat hulle as vennoot optree in die koördinering van die opstelwedstyd op provinsiale vlak.
1.4 Die wedstryd word geborg en befonds deur Nedbank.
1.5 Deelname aan hierdie wedstryd bied aan graad 11 Ekonomie-leerders die geleentheid om beurse en ander aansporings te bekom ten einde hulle studies in die Ekonomie-, Rekeningkunde- en Wiskundevakgebied op tersiêre vlak voort te sit.
1.6 Die onderwerp vir die opstel is bepaal deur die WKOD, in oorleg met Nedbank en die Provinsiale Tesourie. Verwys na Bylae A vir besonderhede.
2. Die oogmerke van hierdie wedstryd

Deur middel van hierdie wedstryd poog die Provinsiale Tesourie om die volgende te bereik:

  • Om 'n bewustheid van sosio-ekonomiese kwessies in SA na vore te bring
  • Om toekomstige leiers op die gebied van Ekonomie, Wiskunde en Rekeningkunde te ontwikkel
  • Om die toepassing van kennis en vaardighede in Ekonomie, Wiskunde en Rekeningkunde te bevorder

Let wel: Onderwysers word aangemoedig om hierdie opstel te gebruik as die Navorsingsprojek, as deel van die Ekonomie-assesseringsprogram vir die deelnemende leerders.

3. Tydraamwerke en vlakke van deelname
3.1 Hierdie wedstryd sal strek van Junie 2009 tot Maart 2010.
3.2 Beoordeling sal op drie vlakke geskied, naamlik skoolvlak, distriksvlak en provinsiale vlak.
4. Teikengroep
4.1 Die wedstryd is oop vir graad 11-leerders wat Ekonomie, Wiskunde en Rekeningkunde aanbied.
4.2 Hierdie leerders moet presteer op 'n minimumvlak van 5 (60%) in minstens twee van hierdie drie vakke om aan hierdie wedstryd te kan deelneem.
4.3 Daarbenewens moet leerders wat vir deelname geïdentifiseer word, alreeds in graad 11 op 'n vlak presteer wat universiteitstoegang sal verseker aan die einde van graad 12 in 2010.
4.4 Leerders wat 70% en hoër behaal in die opstel en mondelinge-aanbieding as 'n gekombineerde telling, sal kwalifiseer vir deelname op die volgende vlak.
5. Beoordeling
5.1 Beoordeling op skoolvlak sal gedoen word deur 'n span onderwysers, aangestel deur die prinsipaal en bestaande uit minstens 3 onderwysers (waaronder die Ekonomie-, Engels Huistaal- en Wiskunde- of Rekeningkunde-onderwysers). Hulle sal gebruik maak van die analitiese rubriek wat vir hirdie doel voorsien word. Die opstelle en punteblaaie van alle leerders wat bo 70% behaal, moet ingedien word by die onderwysdistrikskantoor vir assessering op distriksvlak.
5.2 Beoordeling op distriksvlak sal gedoen word deur 'n span kurrikulumadviseurs bestaande uit die Ekonomie-, Engels Huistaal- en Wiskunde- of Rekeningkunde-kurrikulumadviseurs. Die tien beste opstelle (met die punteblaaie) per onderwysdistrik sal deurgestuur word vir beoordeling op provinsiale vlak.
5.3 Twintig (20) provinsiale finaliste sal geïdentifiseer word deur die finale keurkomitee wat sal bestaan uit verteenwoordigers van Nedbank, die Provinsiale Tesourie en die WKOD.
5.4 Vyftien (15) finaliste sal genooi word om 'n finale keuringsproses gedurende September 2009 in Kaapstad by te woon. Daar moet hulle 'n mondelinge-aanbieding doen van hulle navorsingsbevindings en reageer op vrae van die beoordelingspaneel. Die getal toekennings sal afhang van die finale prestasie van elk van die finaliste.
6. Toekennings

Die wenners ontvang elk 'n driejaarbeurs vir tersiêre studies in Handel aan enige goedgekeurde Wes-Kaapse Universiteit, asook 'n kontantprys as finansiële bystand tydens hulle graad 12-jaar.

7. Inligtingsbrosjures met volle besonderhede oor die opstelonderwerp, die assesseringsrubriek en inskrywingsvereistes sal aan skole voorsien word aan die begin van die derde kwartaal. Toegang tot riglyne vir die skryf van goeie opstelle kan deur onderwysers en leerders verkry word op die WKOD Kurrikulum Ekonomie webtuiste: http://curriculum.pgwc.gov.za/site/33/page/view/1442.
8. Leerders word aangeraai om hierdie riglyne te bestudeer en toe te pas om goeie prestasie in die wedstryd te verseker.
9. Prinsipale word versoek om hierdie inligting onder die aandag van die graad 11 Ekonomie-, Wiskunde- en Rekeningkunde-onderwysers te bring.


GETEKEN: SM NAICKER
HOOF: ONDERWYS
DATUM: 2009:06:26

Bylae A  (grootte: 14 KB)