| 1.1 |
Skole wat die volgende Kunsvakke in die VOO-band aanbied, moet seker maak dat hulle tydsverdeling in ooreenstemming is met die spesiale behoeftes van hierdie vakke:
- Dansstudies
- Dramatiese Kunste
- Ontwerp
- Musiek
- Visuele Kunste
|
| 1.2 |
In die geval van Kunsvakke is daar 'n behoefte aan langer periodes of dubbelperiodes. Leerders in Dansstudies en Dramatiese Kunste het voldoende tyd nodig om die voorgeskrewe klere aan te trek en om op te warm totdat hulle in staat is om met veiligheid deel te neem aan fisiese dans- of drama-aktiwiteite. Visuele Kunste- en Ontwerpleerders het tyd nodig om toerusting en materiale uit te haal, deel te neem aan kunsaktiwiteite en agterna op te ruim. Graad 10- tot 12-musiekleerders moet tyd hê vir individuele onderrig, bykomend tot 'n normale klastyd van minstens 50 minute per leerder per week.
|
| 1.3 |
Waar daar probleme ondervind word met die voorsiening van dubbelperiodes, kan Kunsvakke ingepas word
- aan die begin van die dag sodat leerders vroeër kan begin, of
- voor of na pouses sodat periodes verleng kan word in pousetyd, of
- aan die einde van die dag, sodat periodes na skool voortgesit kan word.
Dit moet skriftelik verduidelik word aan leerders wat die Kunsvakke kies, en ook aan hulle ouers. Verder moet die addisionele onderrigtyd wat van Kunsonderwysers vereis word, erken word deur waar moontlik vry periodes aan hulle te gee, of deur hulle naskoolse verantwoordelikhede te verminder.
|
| 1.4 |
Daar word sterk aanbeveel dat skole wat die Kunsvakke in die VOO-band aanbied die spesifieke leerbane in Kuns en Kultuur in graad 8 en 9 moet implementeer. Dit is noodsaaklik vir die onderrig van die basiese vaardighede wat vereis word op die graad 10-intreevlak. Spesiale leerprogramme is ontwerp om leiding te gee met die implementering van spesifieke leerareabane. Hierdie leerprogramme is beskikbaar op die Web by http://curriculum.pgwc.gov.za/site/32/res/view/715 |
| 1.5 |
Om die tyd vir spesifieke leerbane in te deel, moet skole óf die graad 8- en 9-klasse verdeel volgens die keuse van kunsvorm óf die Kuns en- Kultuurperiodes in 'n blok aanbied sodat leerders van al die graad 8- of 9-klasse hulle Kunsvakklasse op dieselfde tyd bywoon.
|
| 1.6 |
Addisionele gespesialiseerde of niegespesialiseerde onderwysers kan generiese Kuns en Kultuur aanbied vir leerders wat nie beoog om in die VOO-band 'n Kunsvak te kies nie.
|
| 1.7 |
Aangesien dit in die twee uur per week wat aan Kuns en Kultuur toegewys word, nie moontlik is om graad 8- en 9-leerders vir meer as een kunsvorm voor te berei nie, moet daar vir leerders wat daarin belangstel om twee kunsvorms as vakke vir VOO te kies, voorsiening gemaak word in naskoolse klasse. |
| 2.1 |
As gevolg van die praktiese komponent in sommige van die Kunsvakke, en ook in die belang van veiligheid en beheerbaarheid, is dit nodig om die getal leerders in elke klas te beperk. Die volgende klasgroottes is insgelyks van toepassing op alle skole wat Kunsvakke in die VOO-band aanbied, insluitend die Kuns- en Kultuurfokusskole.
- Dansstudies - maksimum van 20 leerders;
- Dramatiese Kunste - maksimum van 20 leerders;
- Ontwerp - maksimum van 20 leerders;
- Musiek - maksimum van 10 leerders;
- Visuele Kunste - maksimum van 25 leerders.
|
| 2.2 |
Leerders wat Dansstudies, Dramatiese Kunste of Musiekvakke in graad 10 wil kies, moet oudisies doen en daar moet onderhoude met hulle gevoer word. Leerders moet ook met sorg gekeur word vir Visuele Kunste en Ontwerp. Die keuringsproses moet regverdig en deursigtig wees. |
GETEKEN: SM NAICKER
HOOF: ONDERWYS
DATUM: 2009:06:12
|