1. INLEIDING
1.1 Hierdie minuut dien om die reëlings vir die bestuur en afneem van die jaarlikse nasionale assesserings, wat deel uitmaak van die Grondslae-vir-leerveldtog, bekend te maak.
1.2 Die Nasionale Departement van Onderwys (DvO) sal die assesserings vir graad 1 tot 6 via die Onderwysdistrikte aan skole voorsien. Volgens die DvO sal die Onderwysdistrikte die toetse in Oktober 2009 ontvang.
1.3 Die gestandaardiseerde toetse vir geletterdheid en gesyferdheid (Graad 1 tot 3) en vir wiskunde en tale (Graad 4 tot 6) sal deel uitmaak van die skool se assesserings gedurende die vierde kwartaal. Die Grondslae-vir-leertoets sal dus een van die formele opgetekende assesseringstake vir die 4de kwartaal vervang.
2. AFNEEM VAN DIE GRONDSLAE-VIR-LEERTOETSE
2.1 Die toetse moet afgeneem word van 02 tot 06 November 2009. Die volgende rooster moet gevolg word om die integriteit van die toetse dwarsoor die provinsie te verseker.

DATUM VIR AFNEEM VAN TOETS LEERPROGRAM / AREA VOORGESTELDE DATUM VIR VASLEGGING VAN DIE PUNTE
Maandag 2 November 2009 Afrikaans Huistaal 16 November 2009
Dinsdag 3 November 2009 Engels Huistaal 17 November 2009
Woensdag 4 November 2009 isiXhosa Huistaal 18 November 2009
Donderdag 5 November 2009 Sesotho / Setswana Huistaal 19 November 2009
Vrydag 6 November 2009 Gesyferdheid / Wiskunde 20 November 2009
2.2 Die nasienmemorandums vir hierdie assesserings sal deur die DvO voorsien word.
2.3 Die toetse wat nasionaal opgestel word, moet intern op skoolvlak volgens nasionale nasienmemorandums nagesien en gemodereer word.
2.4 'n Moniteringstelsel sal daargestel word om die regverdige verspreiding, nasien en moderering van hierdie toetse te verseker. Hoofkantoor, distrikte, prinsipale en SBS'e word versoek om die afneem en nasien van hierdie assesserings te monitor.
2.5 Vaslegging moet binne twee weke na die afneem van die assessering gedoen word.
2.6 Die vaslegging van die uitslae moet gedoen word op die SOBIS-webwerf by http://CEMIS.wcape.gov.za, heading Assessments en klik op National Foundations for Learning.
2.7 Al die uitslae moet teen Maandag 23 November 2009 op CEMIS vasgelê word.
2.8 Eksamenskrifte moet tot verdere kennisgewing veilig by die skool bewaar word.
3. AFSLUITING
3.1 Die mikpunt dat elke leerder by elke skool teen 2011 ten minste 50% in geletterdheid/tale en gesyferdheid/wiskunde moet behaal, sal slegs bereik kan word as alle rolspelers daaraan toegewy is om ons leerders se vlakke van geletterdheid en gesyferdheid te verbeter.
3.2 Daar word van alle prinsipale, skoolbeheerspanne, onderwysers en skoolbeheerliggame verwag om hierdie veldtog te ondersteun.
3.3 Die afneem van die jaarlikse nasionale assesserings is verpligtend vir alle openbare skole in Suid-Afrika en moet geskied volgens die instruksies wat in hierdie minuut voorsien word.
3.4 Maak asseblief seker dat alle onderwysers en ouers ingelig word van die inhoud van hierdie minuut.


GETEKEN: T SINGH
WND. HOOF: ONDERWYS
DATUM: 2009:10:02