1. INLEIDING
1.1 Volgens Omsendbrief 0025/2008 is daar van elke distrik verwag om 'n gevestigde distriksassesseringsonreëlmatighedekomitee (DAOK) te hê teen 30 September 2008.
1.2 Die DAOK is 'n byvoegsel tot die Provinsiale Eksamenonreëlmatighedekomitee (PEOK) en sal opereer onder die jurisdiksie van die PEOK en gereeld aan die PEOK rapporteer. Die PEOK sal die insette van alle DAOK's konsolideer en 'n provinsiale verslag lewer aan die Nasionale Eksamenonreëlmatighedekomitee.
1.3 Die DAOK sal alle assesseringsonreëlmatighede op AOO-, BOOV- en VOO-vlakke hanteer en sal 'n belangrike rol vertolk by die hantering van onreëlmatighede ten opsigte van die gemeenskaplike taak vir assessering (GTA) en die Stigting vir Leer- en Skoolgebaseerde Assesserings.
1.4 Die doel van hierdie minuut is om riglyne te verskaf oor hoe assesseringsonreëlmatighede op distriksvlak hanteer moet word.
2. RIGLYNE VIR DIE BESTUUR VAN ASSESSERINGSONREËLMATIGHEDE OP DISTRIKSVLAK
2.1 Identifikasie en verslagdoening van 'n beweerde onreëlmatigheid
2.1.1 'n Beweerde onreëlmatigheid in verband met enige nasionale eksamen, bv. Nasionale Senior Sertifikaat, Senior Sertifikaat en BOOV-vlak 4, moet onmiddellik by die volgende adres te Hoofkantoor gerapporteer word:

Hoof: Onderwys
Vir aandag: Me M. Ludick (Kamer 5 - 29, 5de Vloer)
Wes-Kaap Onderwysdepartement
Grand Central Towers
Laer Parlementstraat
Kaapstad
8001

Tel: 021 467 2246
Faks: 021 461 5637
E-posadres: mmludick@pgwc.gov.za

2.1.2 'n Beweerde onreëlmatigheid met betrekking tot skoolgebaseerde assessering, GTA's, graad 3, 6 en 9 se provinsiale assesserings, ens. moet aan die distrik se IBB-bestuurder gerapporteer word, en die distrikskantoor moet die Hoofkantoor daarvan in kennis stel.
2.1.3 As 'n onreëlmatigheid aan die distrikskantoor gerapporteer is, moet 'n lêer oopgemaak word deur die sekretaris van die DAOK. 'n Spesifieke saaknommer moet aan elke onreëlmatigheid toegeken word en elke geval moet genommer word ooreenkomstig die betrokke sektor, bv. AOO-onreëlmatighede moet AOO 1, AOO 2, ens. gemerk word terwyl VOO-onreëlmatighede VOO 1, VOO 2, ens. gemerk moet word. Alle onreëlmatighede moet op die WKOD se onreëlmatighede-sigblad aangeteken word (sien Bylae A) 'n Afsonderlike sigblad moet vir elke sektor gebruik word.
2.2 Ondersoek en rapportering
2.2.1 Die kringspanbestuurder (KSB) van die betrokke kring moet die geval aan 'n ondersoekbeampte toedeel. Die ondersoekbeampte moet die persoon wees wat kennis dra van daardie soort ongerymdheid. Indien 'n prinsipaal hom skuldig maak aan 'n ongerymdheid, byvoorbeeld, behoort die IBB-adviseur die geval te ondersoek; indien dit leerders met spesiale behoeftes is wat betrokke is, behoort die GLOO-beampte die ondersoek te doen.
2.2.2 'n Ondersoek moet gedoen word binne drie dae na die vasstelling van 'n beweerde onreëlmatigheid. 'n Verslag moet aan die KSB vir gehalteversekering voorgelê word om seker te maak dat die ondersoek doeltreffend uitgevoer is en dat die toepaslike getuienis versamel is.
2.2.3 Die verslag moet details bevat van die agtergrond tot die onreëlmatigheid, die stappe wat gedoen is, getuienis wat versamel is, bevindings en aanbevole sanksies. Die verslagvorm is aangeheg as Bylae B.
2.2.4 Dit word aanbeveel dat, voor die DAOK-vergadering, 'n interne subkomitee van die DAOK beraadslaag oor gevalle en voorstelle maak vir verdere optrede.
2.3 Die ter tafel lê voor die DAOK van gevalle van onreëlmatigheid
2.3.1 Alle gevalle, aanbevelings en motiverings word ter tafel gelê tydens 'n volle sitting van die DAOK.
2.3.2 Die DAOK mag sanksies instel soos bepaal in die Regulasies (sien Regeringskoerant no. 31337, Augustus 2008, bladsy 152 - 158) en die regulasies vir die bestuur en afneem van die GTA's in graad 9 (Omsendbrief 0036/2008).
2.3.3 Die DAOK se aanbevelings moet aan die distriksdirekteur voorgelê word vir goedkeuring.
2.4 Implementering van besluite en sanksies
2.4.1 Die besluite en aanbevelings van die DAOK moet aan die persoon, skool of inrigting wat ondersoek word, oorgedra word binne die 30 werksdae vir die finalisering van die geval.
2.4.2 Die sekretaris van die DAOK moet die besluit opvolg en halfjaarlikse verslae voorlê aan die PEOK, teen 15 Julie en 15 Desember van elke jaar. Elke verslag moet al die onreëlmatighede wat in die vorige 6 maande ondersoek is, insluit.
3. SAMEVATTING
3.1 'n Vloeidiagram wat illustreer hoe die DAOK onreëlmatighede tydens die skryf van eksamens moet hanteer, is by hierdie minuut aangeheg as Bylae C.
3.2 Distriksdirekteurs word vriendelik versoek om die inhoud van hierdie minuut onder die aandag van al die betrokke beamptes te bring.


GETEKEN: T SINGH
WND. HOOF: ONDERWYS
DATUM: 2009:09:11


Die volgende dokument(e) het betrekking op hierdie minuut.
Excel®  word benodig om hierdie dokument te lees / druk.
Bylae A:  WCED Irregularity Spreadsheet  (grootte: 88 KB)

Die Adobe Acrobat Reader® word benodig om die volgende dokumente te lees / druk.
Bylae B:  "Report on irregularities - Template"  (grootte: 77 KB)
Bylae C:  "Process for management of Irregularities at District Level (Guideline to the DAIC)"  (grootte: 20 KB)

Regeringskoerant no. 31337, Bylae M:  Dealing with Discipline and Misconduct - Examination Irregularities
(grootte: 510 KB)