1. Die Onderwysbestuursinligtingstelsel (OBIS) in Suid-Afrika versamel, verwerk en versprei skoolonderwysdata ten einde die prestasie van die onderwysstelsel te evalueer, om die implementering van beleid te monitor, om die gelyke verspreiding van hulpbronne te verseker en om die regstelling van ongelykhede na te spoor.
2. Ten einde die OBIS in die land te verbeter, het die nasionale Departement van Onderwys die nasionale Leerdereenheid-rekordinligting-en-naspoorstelsel (LURITS) ontwikkel. Die stelsel sal die data van elke leerder in gewone en spesiale skole op nasionale vlak van graad R tot graad 12 versamel en sal die leerders van skool tot skool dwarsdeur hulle skoolloopbane naspoor. Die LURITS sal van Junie 2008 af aan geleidelik deur die provinsiale OBIS-eenhede ingestel word.
3. In die Wes-Kaap is die individuele leerderrekords van leerders in alle gewone openbare, spesiale en sommige onafhanklike skole reeds op SOBIS. Die WKOD se OBIS-eenheid sal reël dat die res van die onafhanklike skole se leerderinligting op SOBIS aangeteken word. Onafhanklike skole sal aan SOBIS bekend gestel word en opgelei word om inligting daarop vas te lê.
4. Die nasionale stelsel vereis dat akkurate SOBIS-leerderdata, wat deur elke prinsipaal geverifieer word, op LURITS gelaai word. Alle leerderregistrasies sal via die LURITS bevestig word.
5. Die LURITS is direk gekoppel met die Suid-Afrikaanse Skoleadministrasie-en-bestuurstelsel (SA-SAMS), wat 'n omvattende gerekenariseerde skooladministrasiepakket is. Die Staatsinligtingstegnologie-agentskap (SITA) wat hierdie projek namens die nasionale Departement van Onderwys onderneem, het 'n lêerkommunikasiestelsel tussen die SA-SAMS en LURITS ontwerp. In die Wes-Kaap is alle skole aan SOBIS gekoppel en sal hulle steeds die akkuraatheid van hulle data op SOBIS bevestig. Die WKOD se SOBIS-eenheid sal een provinsiale oplaaipunt tot LURITS voorsien. Skole in die Wes-Kaap sal dus nie direk op LURITS werk nie. 'n Provinsiale LURITS-administrateur sal alle interaksie tussen LURITS en CEMIS hanteer.
6. Dit is 'n vereiste dat leerderdata van alle skole teen Desember 2009 aan die nasionale stelsel voorsien moet word.
7. U samewerking ten opsigte van hierdie inisiatief sal opreg waardeer word.


GETEKEN: SH MAFANGA-KIBI
HOOF: ONDERWYS
DATUM: 2008:06:20