1. Intshayelelo

Injongo yale leta kukukhumbuza iinqununu ngemisebenzi ebalulekileyo ekufuneka ibe seyigqityiwe ekupheleni kukaJanuwari 2008.

2. Ukucwangcisela unyaka

Kubalulekile ukuba iprogram yonyaka ka-2008 imiselwe ukuze inqununu ikwazi ukulawula isikolo ngokukuko. Iinqununu maziqinisekise ezi zinto zilandelayo:

  • yeyiphi imisebenzi emele ukwenzeka ngo-2008;
  • ziintoni iinjongo (iziphumo ezilindelekileyo) zale misebenzi;
  • ixesha umsebenzi omele ukuba wenzeka ngalo;
  • indawo umsebenzi omele ukwenzekela kuyo;
  • ngoobani abaya kubandakanyeka kule misebenzi;
  • ziya kubiza ixabiso elithini iindleko zemisebenzi ecwangcisiweyo; kwaye
  • ingubani oya kuthatha uxanduva ngemisebenzi nomakaphendule (accountable) ngayo.
2.1 Iprogram yonyaka yesikolo imele ukubandakanya ukwenziwa kwale misebenzi ilandelayo:
  • Iintlanganiso zamabhunga olawulo ezikolo
  • Iintlanganiso zeekomiti zamabhunga olawulo ezikolo
  • Iintlanganiso zootitshala eziyiwa ngootitshala bephelele
  • Iintlanganiso zamacandelo abasebenzi bakho
  • Iintlanganiso ezimalunga nee-apreyizali zootitshala
  • Iintlanganiso zabazali nootitshala
  • Umzali utyelela iiklasi ahlangane nootitshala beklasi / bezifundo
  • Imisebenzi yenkcubeko
  • Iintlanganiso zemidlalo
  • Iihambo zemfundo (excursions) notyelelo (tours) olungahle lubekho
  • Imihla yoviwo, iimvavanyo (tests), uhlolo (assessment))
  • Imihla iimvavanyo namaphepha emibuzo oviwo amele kukusetwa ngayo aze angeniswe ukulungiselela ukumodareyitha
  • Imihla apho amaphepha emibuzo oviwo amele ukungeniswa khona ukulungiselela ukumodareyitha
  • Imihla yootitshala yokuba bangenise izicwangciso zezifundo, ngekota kwanezicwangciso zonyaka
  • Iprogram yonyaka imele ngokunjalo ibandakanye iishedyuli:
    • zokuthengwa kwesitokhwe
    • ukuzaliswa kweerikhwizishini zangaphakathi zezinto zokuncedisa ukufunda nokufundisa kunye nesitokhwe sesikolo ngokubanzi
    • Izicelo zokusebenza i-ovathayim, apho kufanelekileyo
    • Ukungenisa iifom zengxelo eyingcaciso zeSebe iWCED
    • Ukungeniswa kweengxelo zemali zenyanga zezikolo ezineemfuno zemfundo ezizodwa (special schools) kwi-ofisi yesithili/kwaNdlunkulu
    • Ukungeniswa kweengxelo zemali zesikolo zemfundo eziphicothiweyo [phambi koJuni wonyaka ozayo]
    • Ukuqulunqa ibhajethi yonyaka nokungenisa ibhajethi ukuze ivunywe ngumbutho wabazali
    • Ukungeniswa kwemizuzu yeentlanganiso zebhunga lolawulo
    • Utyelelo eziklasini yinqununu nekomiti yabaphathi babasebenzi abaqeqeshiweyo (professional management team)
    • Ii-apreyizali zootitshala
    • Iiprogram zophuhliso lwezakhono zootitshala
    • Iziganeko zesikolo, umz. amabhaso asisipho, imisebenzi yootitshala, unyuso ngxowa-mali, imibhiyozo eyodwa enjengeFounders Day; ukuposwa kwamakhadi okubhiyoza nemihla yokuzalwa; eyabaxhasi (sponsors), abanikeli (donors)), njl. njl.
2.2 Isicwangciso sekharityhulam sika-2008 kufuneka ngokunjalo sibandakanye:
  • Ukuqulunqwa kwesicwangciso sesikolo sika-2008, esiya kungeniswa kumphathi wesekethe okanye kumcebisi weELSEN [wezikolo zemfundo eneemfuno ezizodwa]
  • Ukwahlulelana ngomsebenzi kootitshala
  • Ukucwangcisa ithayimthebhile
  • Ukwabiwa kweeklasi
  • Ukwabiwa kwezinto zokuncedisa ukufunda & nokufundisa
3. Imisebenzi neemfanelo ezithile
3.1 Kubalulekile ukuba inqununu, utitshala ngamnye namalungu e-RCL mabazi kakuhle ukuba yintoni imisebenzi neemfanelo zabo, kwanokuba umntu ngamnye wamkela uxwebhu lwemisebenzi olubhaliweyo aze alusayine olu xwebhu. Amaxwebhu ekubhalwe kuwo imisebenzi (duty sheets) abaluleke kakhulu ukugcina ucwangco nokuziphatha ngokukuko esikolweni kwaye asisixhobo solawulo sesiseko (basic management tool).
3.2 Phambi kokuba amaxwebhu ekubhalwe kuwo imisebenzi anikezelwe, kubalulekile ukuba inqununu iqinisekise ukuba yonke imisebenzi neemfanelo ezimele ukwenzeka esikolweni ziyenziwa kuzo kuxoxwe ngamaxwebhu ekubhalwe kuwo imisebenzi nabo bonke abachaphazelekayo, ukuze yonke into icaciswe gca kwanokuba inqununu yamkele ukuvuma kwabo ukuyenza imisebenzi yabo. Ngokusayina olu xwebhu ekubhalwe kulo imisebenzi utitshala uyavumelana nokubhaliweyo kulo aze amkele uxanduva nokuphendula ngokwenziwa kwemisebenzi edwelisiweyo. Ikopi yomntu osayinele uxwebhu ekubhalwe kulo imisebenzi mayifakwe kwifayili yakhe yobuqu. Ukuba kukho imisebenzi okanye iimfanelo ezithile ezongezelelweyo ezibandakanywayo, okanye ukuba kukho nakuphi na ukufakelwa kwezilungiso, oku makuqatshelwe kwaye umqeshwa kulindeleke ukuba asayine ngokunjalo (co-sign) ufakelo lwesilungiso (lwezilungiso).
3.3 Nceda uqaphele ukuba inqununu iyamxela namphi umqeshwa ongayiphumeziyo imisebenzi yakhe.

4. Amanani ootitshala aqingqelwe izikolo (staff establishments)
4.1 Kulindeleke ukuba inqununu yazi kakuhle ukuba zeziphi izithuba nenani lezithuba isikolo eso sibonelela ngazo. Inqununu kufuneka ngokunjalo yazi ukuba ngubani okwisithuba esithile ize le datha ilandelayo irekhodwe kwifayili yomntu ngamnye, ngokunjalo nakwifayili enkulu ekujongwa kuyo (central reference file):
  • inkcazo yesithuba
  • Inombolo yePesali
  • Isikhundla nenqanaba umntu akulo (umz. esesigxina, esethutyana, esalowo libambela, njl. njl.)
  • Umvuzo awuhlawulwayo nenotshi yomvuzo ngoku

Kubalulekile ukugcina iirekhodi zenani lootitshala abaqingqelwe izikolo zihlaziywa qho ngenyanga.
4.2 Uyacelwa ukhumbule ukuba zonke izithuba zengqesho yemvumelwano (contract) nezethutyana mazivunywe ngumphathi wesekethe wakho/ngumcebisi we-LSEN kwi-ofisi yesithili phambi kokuba zibe nokuthunyelwa kwiCandelo loLawulo lwaBasebenzi kuNdlunkulu weSebe iWCED.

5. Iibhajethi
5.1 Kubalulekile inqununu yazi kakuhle ukuba imali isafumaneka. Uyacelwa uqaphele ukuba inkcitho egqithisileyo ayivumelekanga.
5.2 UNongxowa we-SGB makabe sele eyicwangcisile ibhajethi ka-2008 phambi kokuphela kuka-2007 kwaye le bhajethi mayibe seyivunyiwe liBhunga loLawulo yandule ukwandlalwa kubazali ukuze bayamkele. Nceda wazi ukuba ibhajethi leyo iya kufunyanwa sisikolo iya kuthi mhlawumbi ibe yimali eyeyona iphezulu (maximum) oya kuyinikwa.
5.3 Isixa esabelwe isikolo sonyaka-mali ka-2008/9 siya kubonelelwa ngoMatshi 2008.

6. Ukuba noqoqosho [ukonga imali]
6.1 Izikolo ziyayazi imeko yemali iNtshona Koloni (namanye amaphondo) ezifumana ikuyo. Igosa neziko ngalinye eliseNtshona Koloni kofuneka limisele imigqaliselo ukunciphisa inkcitho ibe ncinane ngolona hlobo. Kuyinto ke ngoko ebalulekileyo ukuqulunqa isicwangciso sokonga imali yesikolo. Ibhunga lolawulo i-SGB nenqununu mababhale phantsi amanyathelo okonga baze bawazise kubo bonke ootitshala nabafundi. Amanyathelo okonga makahambe nengxelo yakho yemali kaJanuwari 2008 engeniswa kwi-ofisi yesithili.
6.2 Isikolo akuvumelekanga ukuba singene ematyaleni. Iinqununu maziqinisekise ukuba zonke iimali ezingekangeni ziyaqokelelwa. Iirenti/iifizi zokuhlala zootitshala akuvumelekanga, phantsi kwazo naziphi na iimeko, ukuba zingahlawulwa kwaye iirenti zokuhlala mazihlawulwe kwangethuba.
6.3 Kuyimfuneko ukuqinisekisa ukuba akukho nkcitho ingeyomfuneko kungenwa kuyo ngeempela-veki nangeeholide. Amanyathelo okonga angabandakanya ezi zinto zilandelayo:
  • cima amanzi ashushu nezibane ezingeyomfuneko;
  • nciphisa ukunkcenkceshela kube kwiqondo elilelona liphantsi;
  • nciphisa ukunkcenkceshela kangangoko;
  • tshixa iifoni;
  • nqabisa zonke izinto ezinokubiwa, zonakaliswe okanye zisetyenziswe gwenxa;
  • phungula ingca xa kuyimfuneko oko;
  • vala zonke izivalo (stop-cocks) apho kunako; uze
  • ulungiselele ukuba utitshala okanye ilungu le-SGB lihambele esikolweni qho ngeeholide ukutshekisha ukuba yonke into ime ngendlela nokuza kuthatha izinto eziposwayo.

Khumbula ukuba undoqo ekongeni lulawulo olululo nolusebenzayo.

7. Iingxelo zonyaka zika-2007

Ingxelo yonyaka emfutshane ehamba nesishwankathelo semisebenzi ka-2007 mayiqulunqwe zizikolo ize ifumaneke ekupheleni kukaJanuwari 2008. Ezi ngxelo zimele ukubandakanya le miba ilandelayo:

  • Inani labaqeshwa nemiba enxulumene naleyo;
  • Umfundi ubalulekile, umz. amabhaso okuwonga angekakhutshwa, ukugqwesa kwiinkalo ngeenkalo ezahlukeneyo, kwiziphumo zezifundo nezemidlalo nokugqwesa yena ubuqu;
  • Imiba yemali (Inkxaso-mali yeSebe leMfundo, iimali ezisuka kwimibutho exhasayo, izixa ezingeniswe lunyuso lwengxowa-mali, inkxaso esuka kubazali, njl. njl.);
  • Imisebenzi yasehostele (ukuba ikho ihostele);
  • Imiba yebhunga lolawulo, ngokunjalo neenkcukacha zoqhagamshelwano zikasihlalo we-SGB.
8. Inkcazo yomnqophiso (mission statement) neziphumo (outcomes) onqwenela ukuziphumeza ngo-2008
8.1 Ukuba isikolo asinawo umbono nenkcazo yomnqophiso (mission statement), inqununu, ootitshala, i-SGB ne-RCL zifanele ukuqulunqa ezi zinto zithi rhoqo ukumana zizifunda ngo-2008. Inkcazo yomnqophiso yesikolo ibonisa indlela umbono oya kuphunyezwa ngayo ize yalathe indlela ebimele ukulandelwa sisikolo nootitshala abamele ukuyilandela yonke imihla nokunika umkhomba-ndlela (direction) ocwangciselwe unyaka.
8.2 Ezi ziphumo zilandelayo zingasebenza njengemizekelo:
  • Ootitshala abathi, bebambisene bonke, basebenze kakuhle, ngobugcisa kwaye besenza igalelo elihle kwimfundo yabafundi abaphantsi kweliso lakho
  • Abafundi abasishiyayo isikolo (school leavers) bexhotyiswe ngolwazi, izakhono, ulwazi lwezamakhondo omsebenzi, ukuzithemba nomoya omhle wokwamkela imingeni yobomi emva kokushiya isikolo
  • Ukupasa ngekhulu leepesenti kwiBakala 12
  • Izakhiwo ezicocekileyo, ezibukekayo nezingonakaliswanga
  • Ibhalansi entle / encomekayo yebhanki
  • Abafundi abakhutheleyo, abanembeko, abafanelekileyo nabonwabileyo
  • Ukuhlanganiswa kwakhona kwabafundi abaxhotyiswe ngemfundo eneemfuno ezizodwa, ukuze bakwazi ukuphumelela kwizikolo zemfundo yesiqhelo (mainstream schools)
  • Ukuphatha, ukulungiselela nokulawula isikolo ngokukuko nalapho kuthathwa inxaxheba ngumntu wonke khona
  • Inkxaso eyiyo kootitshala nabafundi abaneemfuno zemfundo ezizodwa kwizikolo ezikufutshane zemfundo yesiqhelo [ukuba sisikolo semfundo eneemfuno ezizodwa]
  • Ibhunga lolawulo elisebenza kakuhle
8.3 Uyacelwa uqaphele ukuba ukuze kuphunyezwe ezi ziphumo isikolo kofuneka senze ezi zinto zilandelayo:
  • sazi kakuhle ukuba ziintoni iimfuno zenqununu, ezootitshala nezabafundi;
  • zicwangcise ngobunono;
  • ziqhube uqeqesho lwabaqeshwa nolwamalungu ebhunga lolawulo;
  • zithathe amanyathelo angqongqo, noko kunjalo enovelwano;
  • yiba ngumzekelo wokuzimisela, wokusebenza nzima, ngempumelelo, ngobuchule, ngokuziphatha kakuhle, nokutyekele kwimiba yomsebenzi nakwimfundo kunye nekamva lelizwe;
  • sebenzisa ulawulo olungqongqo;
  • sebenzela njalo ukuphuhlisa nokugcina ubudlelane obububo nabanye abantu;
  • thatha izigqibo uzilandele ukuqinisekisa ukuba imiyalelo iphunyezwa ngokukuko;
  • sebenzisa indlela yokuphatha ekhuthaza uthatho-nxaxheba lomntu wonke;
  • yandisa oko isikolo sinokwenza kufikelele indawo ebanzi kungapheleli nje esikolweni sakho;
  • bambelela kwishedyuli yexesha elicwangcisiweyo uze wenze imisebenzi oyabelweyo ngelo xesha.
9. Uphononongo novavanyo luka-2007

Ukuze kucwangciswe ngempumelelo nangobuchule kulungiselelwa u-2008, kubalulekile ukuqonda oko isikolo sikuphumezileyo kunyaka odlulileyo size ngokunjalo siqaphele iziphene eziye zakho. Oku kubalulekile ukuze kuqhutyekwe ngokwakhela phezu kwezinto isikolo esikwaziyo ukuzenza kakuhle (strengths) ngo-2008 kwanokuphelisa nya, kangangoko kunako, iziphene ezikwiinkqubo, kwindlela yokwenza imisebenzi, nakwiinkqubo zezikolo. Bonke abathathi-nxaxheba, ngaphakathi nangaphakathi, abanomdla ngesikolo, bamele ukubandakanyeka kwinkqubo yophononongo (review), njengoko ukunyaniseka nokwenza izinto ekuhleni (openness) ngelokulungiselela uvavanyo olunempumelelo nokucwangcisela ikamva.

10. Iileta eziya kubazali

Ekupheleni, okanye ekuqaleni konyaka ngamnye kubalulekile ukuthumela ileta kubazali/kubagadi. Imiba enokufakwa kule leta ibandakanya:

  • ilizwi lombulelo ngentsebenziswano nenkxaso yabo;
  • umnqophiso wesikolo;
  • izinto othemba ukuba uya kuziphumeza ngo-2008;
  • iprogram yonyaka ka-2008;
  • ubaluleko lobandakanyeko lwabazali kwimfundo yabantwana babo;
  • amaxesha eekota zesikolo ka-2008;
  • iincwadi nezinto zokubhala abaya kuzifuna ngo-2008 [ekufuneka abazali baze nazo];
  • umgaqo-nkqubo weefizi zezikolo nomgaqo-nkqubo wokuxolelwa kwabafundi ekuhlawuleni iifizi zesikolo
  • iindaba ezivela kwibhunga lolawulo lesikolo;
  • Izinto eziye zabaluleka (highlights) kunyaka odlulileyo;
  • Iziganeko ezicwangciselwe u-2008.
11. Abaqeshwa abaphangelayo ngeeholide zezikolo

Qinisekisa ukuba bonke abaqeshwa abangenalungelo lokuxhamla iiholide zezikolo bathatha ikhefu elisemthethweni ukuba baye ababikho semsebenzini. Abaqeshwa abasebenzayo ngeeholide mabasebenze iiyure zesiqhelo. Nge-24 nange-31 Disemba 2007 abaqeshwa abasebenzayo bangakhululwa ngo-11:30 kusasa. Apho kungekho baqeshwa baya kube besebenza ngeeholide, yenza amalungiselelo okuba amavolontiya asityelele qho isikolo.

12. Iinombolo zoqhagamshelwano ngethuba leeholide

Iinombolo zoqhagamshelwano zenqununu okanye zomnye wabaqeshwa abaphetheyo mazishiywe kumntu ongumsebenzi ophetheyo osebenzayo ngeeholide. Kucetyiswa ukuba ezi nombolo zoqhagamshelwano zishiywe kwi-ofisi yesithili. Nceda uqaphele ukuba iinqununu zinoxanduva ngokunjalo lokubeka esweni isikolo ngeeholide.

13. Ukulawulwa kwesitokhwe

Isoloko isisenzo esisemgaqweni ukuthatha isitokhwe esipheleleyo (comprehensive stock taking) ekupheleni konyaka ngamnye. Ngokukodwa, isitokhwe masilawulwe apho ootitshala ababenoxanduva loko, kwanabafundi abasebenzisa isitokhwe eso, bamkayo esikolweni. Kuyinto ebalulekileyo ngokunjalo ukuba abafundi bangenise zonke iincwadi zezifundo (textbooks), iincwadi zelayibrari nezinye izixhobo phambi kokuba isikolo sivale kwaye oku makulawulwe ngokungqongqo. Oku ngokunjalo linyathelo lokonga imali. Kwimeko apho umfundi okanye utitshala walahlekelwa khona sisitokhwe, okanye apho isitokhwe sonakaliswe ngabom khona, iindleko ezo mazihlawulwe ngutitshala okanye ngumfundi. Nceda ubambelele kwimiyalelo enxulumene nokulawulwa kwelahleko: umzekelo, zonke iilahleko mazixelwe kwigosa lolawulo lwezilahlekileyo (loss control officer) kwaNdlunkulu. Zonke izenzo zoqhekezo nezobusela mazixelwe kumapolisa e-SAPS kuze kugcinwe irekhodi enenombolo yekheyisi. Wonke umonakalo kwizakhiwo mawuxelwe kwiCandelo Lokwenziwa kwemiSebenzi (Operations Support) (elalisaya kwaziwa njengeCandelo loCwangciso lweZakhiwo neZibonelelo zeZikolo) (Physical Resource Planning)) kwaNdlunkulu.

14. Ukwamkelwa kwabafundi

Akuvumelekanga phantsi kwazo naziphi iimeko ukuba abafundi bamkelwe esikolweni ngelokugcina izithuba zootitshala be-CS okanye zezithuba zabangengabo abe-CS. Isikolo sikho ngokunxulumene neemfuno zabafundi ingekuko ukubonelela ngengqesho kubasebenzi.

15. Ukwamkelwa kwabafundi

Uyacelwa uqaphele ukuba ukwamkelwa kwabafundi abatsha kwizikolo ezineemfuno zemfundo ezizodwa kungavunywa kuphela nguMlawuli: weNkonzo yeNkxaso yeMfundo eneeMfuno eziZodwa (Director: Specialised Education Support Services) emva kokuba imigqaliselo yaseburhulumenteni nechanekileyo ilandelwe. Uyacelwa uqaphele ukuba kuphela ngabafundi abafuna ngenene imfundo eneemfuno ezizodwa nabangakwaziyo ukuba bangafunda ngempumelelo kwizikolo zemfundo yesiqhelo bamkelwa kwisikolo semfundo eneemfuno ezizodwa. Oku kwenzela ukuqinisekisa ukuba abafundi abafuna ngenene i-ELSEN abathintelwa ekufumaneni imvume yokubandakanywa kwizikolo/ kwiiyunithi zemfundo yesiqhelo.

16. INtloko yeSebe leMfundo nabaqeshwa bakwaNdlunkulu banqwenela ukubulela iinqununu nootitshala ngentobeko yabo kulo nyaka udlulileyo ngomsebenzi onzima phantsi kweemeko ebezidla ngokuba nzima nezidinisayo.

Sinqwenelela wonke umntu unyaka ka-2008 onoxolo nozele ngamathamsanqa.



ISAYINWE: NGU-H.A. LEWIS
INTLOKO: YESEBE LEMFUNDO
UMHLA: 2008:01:09