| 1. |
Die Nasionale Departement van Gesondheid het Februarie 2008 as Voortplantingsgesondheidsmaand verklaar. Die bedoeling was dat daar gedurende daardie tydperk klem geplaas moet word op die bevordering van veiliger seksuele praktyke wat sal help om die verspreiding van seksueel oordraagbare infeksies, insluitende MIV/VIGS, te beperk, en om die aantal ongewenste tienerswangerskappe te beperk.
|
| 2. |
In die lig van die hoë voorkoms van MIV onder jongmense tussen die ouderdomme van 15 en 25 en die toenemende aantal tienerswangerskappe by skole elke jaar, ondersteun die Departement van Onderwys bogenoemde inisiatief.
|
| 3. |
Die WKOD staan nog steeds onthouding voor as die voorkeurstrategie om MIV en ander seksueel oordraagbare infeksies en tienerswangerskappe te voorkom, maar is bewus van navorsing wat daarop dui dat 'n groot aantal adolessente reeds seksueel aktief is. Die gepaardgaande leermateriaal is direk op hierdie teikengroep gerig.
|
| 4. |
Vind hierby ingesluit plakkate en liniale wat onder graad 10- tot 12-leerders versprei kan word. Sekondêre skole word versoek om die ingeslote materiaal toepaslik en op 'n geleë tyd te versprei.
|
| 5. |
Daar word aanbeveel dat die Lewensoriëntering-onderwysers hierdie materiaal binne 'n ouderdomstoepaslike situasie gebruik en die bevordering van die gebruik van kondome kontekstualiseer as deel van 'n breër MIV-voorkomingstrategie.
|
| 6. |
Indien u addisionele gesondheidsbevorderingsmateriaal benodig, skakel asseblief met die Departement van Gesondheid se Gesondheidsbevorderingshulpbronsentrum, 2de vloer, Maynard Plaza, Wynberg, of skakel hulle by tel.no. 021 710 9863.
|
GETEKEN: MJ THERON
HOOF: ONDERWYS
DATUM: 2008:04:14
|