1. U was reeds per Operasionele Ondersteuningsminuut 0001/2007 van 20 November 2007 versoek om te verseker dat die totale bedrae van u norme-en-standaardetoekenning (N&S) vir 2007/08 wat vir handboeke en plaaslike aankope begroot is, ten volle bestee word. Alle skole moet daarop let dat elke leerder 'n handboek moet hê vir elke leerarea of vak.
2. Artikel 21-skole moes die eerste oordragbetaling (60% van die N&S-toekenning) benut vir die aankoop van leer-en onderrigondersteuningsmateriaal (LOOM) sodat dit voor die einde van September 2007 beskikbaar kon wees.
3. Die totale bedrae toegeken vir handboeke en plaaslike aankope vir alle nie-artikel 21-skole beloop volgens die skolebegrotings (WKOD 032) onderskeidelik R 64,11 miljoen en R 32,87 miljoen. By kontrolering is daar bevind dat daar tot 21 Januarie 2008 slegs R 61,59 miljoen aan handboeke en R 31,22 miljoen aan plaaslike aankope bestee is.
4. Die finansiële jaar loop nou vinning ten einde en nie-Artikel 21-skole sal gelde vir LOOM wat nie benut is nie verbeur.
5. Die Wes-Kaap Onderwysdepartement moet deurlopend verslag doen aan die nasionale Departement van Onderwys oor die aanwending van die totale begrote bedrag vir LOOM. Dit is dus noodsaaklik dat nie-artikel 21-skole wel die bedrae wat volgens WKOD 032 vir die aankoop van LOOM begroot is, nie later nie as 31 Maart 2008 bestee. Hierdie skole kan die nuutste balanse vir handboeke en plaaslike aankope by die bestelkantoor te Kuilsrivier vasstel. Die rekwisisies (WKOD 034 en 026) moet dus nie later nie as 31 Januarie 2008 by die bestelkantoor te Kuilsrivier ingedien word.
6. U samewerking in hierdie verband word waardeer.


GETEKEN: H.A. LEWIS
HOOF: ONDERWYS
DATUM: 2008:01:25