1. U is sekerlik bewus daarvan dat 'n brief met verwysings no13/2/1 - 20061107-0007, vanaf Hoofkantoor in die eerste kwartaal van 2008 per e-pos uitgestuur is waarin skole versoek is om aan te dui of hulle 'n klaskamer vir Graad R wou hê en of die skoolbeheerliggaam (SBL) gewillig sou wees om 'n klaskamer te bou of 'n mobiele klaskamer te verkry met fondse wat deur die WKOD bewillig is. Die brief het ook 'n ooreenkoms bevat, wat deur die SBL'e onderteken moes word, vir die aanbou van klaskamers.
2. Die brief is ongelukkig foutiewelik uitgestuur en het ook nie die korrekte responsbesonderhede gegee nie. Daar is naamlik aangedui dat die Direktoraat: Operasionele Ondersteuning (voorheen Fisiesehulpbronbeplanning) die brief uitgestuur het. Die brief was inderwaarheid 'n afskrif van 'n vorige brief wat deur die Direktoraat: Operasionele Ondersteuning uitgestuur is, maar dit was nie uitgestuur deur daardie direktoraat nie, of deur die Direktoraat: Inrigtingsbestuur en beheerbeplanning (IBBB) nie.
3. Die doel van hierdie IBBB-minuut is om die misverstande wat as gevolg van hierdie fout ontstaan het, uit die weg te ruim.
4. Met betrekking tot die voorsiening van klaskamers vir graad R, was daar aan die einde van die 2007/08 finansiële jaar, wat aan die einde van 31 Maart 2008 ten einde geloop het, nog fondse in die Vroeëkindontwikkeling- (VKO-) begroting beskikbaar. Die rasionaal was dat dit moontlik aangewend sou kon word vir klaskamers vir graad R. Met die afsluiting van die finansiële jaar op 31 Maart 2008 is die fondse egter terugbetaal aan die Tesourie en is dit nie meer beskikbaar nie. Die WKOD kan gevolglik ongelukkig nie die klaskamers aan die skole voorsien wat wel gereageer het nie.
5. Die fondse wat in die 2008/09 finansiële jaar, beginnende op 1 April 2008, beskikbaar is vir graad R-klaskamers, moet bestee word in ooreenstemming met die voorskrifte soos uitgereik deur die nasionale Departement van Onderwys en die prioriteitsaanwysers van die Wes-Kaapprovinsie. Die distrikskantore nomineer tans skole vir graad R-klaskamers soos per die vereiste kriteria. Die seleksie van skole sal deur die VKO-komponent by Hoofkantoor hanteer word en die geselekteerde skole sal dan geskakel word vir deelname aan die projek. 'n Projekbestuurder sal aangestel word om die uitrol van die voorsiening van graad R-klaskamers te bestuur en die naam van hierdie persoon sal mettertyd aan skole beskikbaar gestel word.
6. Skole wat aansoek gedoen het om graad R-klaskamers in reaksie op die foutiewe brief sal ook in aanmerking geneem word en, indien hulle per die kriteria in aanmerking kom, sal sodanige skole ingesluit word op die lys skole wat in 2008/09 graad R-klaskamers sal ontvang.
7. Let asseblief daarop dat alle navrae met betrekking tot klaskamers vir graad R aan die Direktoraat: IBBB by Hoofkantoor gerig moet word, vir die aandag van me Vanessa Minnaar by telefoonnommer 021 467 2605 of per e-pos by vminnaar@pgwc.gov.za
8. Die WKOD vra om verskoning vir enige ongerief of verwarring wat deur hierdie ongelukkige situasie teweeg gebring is en dank u vir u samewerking en begrip.
9. Bring asseblief die inhoud van hierdie minuut onder die aandag van alle betrokkenes.


GETEKEN: M MAAS-OLSEN
HOOF: ONDERWYS
DATUM: 2008:05:27