1. Die WKOD kondig graag aan dat beurse beskikbaar gestel sal word aan onderwysers wat die Gevorderde Sertifikaat in Onderwys (GSO) wil verwerf.
2. Die volgende persone mag aansoek doen:
  • Onderwysers wat permanent aangestel is
  • Gekwalifiseerde onderwysers, d.w.s. onderwysers met 'n kwalifikasie op ROKW 13 (M+3) of hoër
  • Onderwysers wat aan die toelatingsvereistes van die bepaalde universiteit voldoen (Sien Bylae A)
  • Onderwysers wat nie reeds 'n ander staatsbeurs of enige ander beurs ontvang nie
3. Die doel van die kursusse is om onderwysers se kwalifikasies, kennis en professionele praktyke in die kursusvakke te verbeter.
4. Hierdie GSO-kursusse sal deeltyds aangebied word oor 'n tydperk van twee jaar (vanaf Januarie 2009 tot Desember 2010). Elke kursus sal tot 'n NKR Vlak 6-kwalifikasie lei en kontaksessies (gedurende die week, naweke en vakansies) en afstandsonderrig insluit.
5. Elke beurs sal registrasie- en klasgelde dek.
6. Akkommodasie, wat deur die gekontrakteerde universiteit of die WKOD gereël sal word, sal slegs vir onderwysers van landelike gebiede voorsien word.
7. Vervoerkoste van en na die opleidingsinstansie sal deur die WKOD gedek word.
8. Onderwysers is verantwoordelik vir die koste van hulle leerondersteuningsmateriaal waar van toepassing.
9. Onderwysers wat vir die beurse in aanmerking wil kom, moet Bylae B en C invul en dit via hulle prinsipale by die Departement indien. Aansoeke moet die volgende adres teen Vrydag, 7 November 2008 bereik:

            Die Hoof: Onderwys
            Vir aandag: Mnr TP Davids (Kamer 8-79 A)
            Direktoraat: Interne Mensklikekapitaalontwikkeling
            Wes-Kaap Onderwysdepartement
            Privaatsak X9114
            KAAPSTAD
            8000

10. Aansoeke kan ook in die posbus gemerk "Direktoraat: Interne Menslikekapitaalontwikkeling" in die hoofingang van die WKOD-hoofkantoor in Grand Central Towers, Kaapstad geplaas word.
11. Aansoekvorms en ooreenkomsvorms is by hierdie minuut aangeheg. Afskrifte van hierdie vorms is ook beskikbaar by die WKOD se Kliëntediensafdeling op die tweede vloer van Grand Central Towers, Kaapstad.
12. Let asseblief daarop dat
  • geen onvolledige of onleesbare aansoeke in aanmerking sal kom nie, en
  • geen aansoeke per faks aanvaar sal word nie.
13. L.W. Inskrywings wat ná die sluitingsdatum ontvang is, sal nie aanvaar word nie.
14. LET WEL:
  • Die naam van die GSO-kursus en die universiteit van u keuse moet duidelik op die aansoekvorm aangedui word.
  • Gewaarmerkte afskrifte van u matrieksertifikaat, akademiese en/of professionele kwalifikasie(s) en ID moet u aansoek vergesel.
  • Indien u om meer as een beurs aansoek doen, moet afsonderlike aansoeke ingedien word.
15. Die Beurskomitee sal alle aansoeke oorweeg en prioritiseer en dan aanbevelings oor die toekenning van die beurse doen.
16. Elke suksesvolle aansoeker sal 'n formele ooreenkoms met die WKOD moet aangaan om 'n jaar se diens te lewer vir elke jaar waarvoor die beurs toegeken is, en om te voldoen aan al die ander bepalings wat in die ooreenkoms uiteengesit is.
17. Maak asseblief seker dat die inhoud van hierdie minuut onder die aandag van alle onderwysers gebring word.


GETEKEN: ED KIRSTEN
HOOF: ONDERWYS
DATUM: 2008:10:17

Bylae A: Beurse aangebied vir die Gevorderde Sertifikaat in Onderwys vir 2009  (grootte: 17 KB)
Bylae B: Aansoekvorms vir beurse  (grootte: 138 KB)
Bylae C: "Agreement on payment of tuition fees from state funds"  (grootte: 24 KB)