1. Ukwenzela ukuba abaphathi bamaziko babe nokwenza amalungiselelo ayimfuneko okuya kuthatha iziphumo zeemviwo baze bazitshekishe, kunikwa le ngcaciso ilandelayo nemihla. Kucelwa niqaphele ukuba le mihla namaxesha anikiweyo zizinto ezingesosigxina nezinokutshitshwa (tentative) yaye naziphi na iinguqulelo kumalungiselelo niya kwaziswa ngazo. Ii-ofisi zezithili zemfundo ziya kwaziswa ngokupheleleyo ngazo naziphi na iinguqulelo ezenziweyo.

1.1NgoLwesibini, 30 Disemba 2008 ngo-08:00
Qaphela: Kungabi ngaphambi ko-08:00		Iinqununu, abaphathi bamaziko/ abasebenzi abathunywe ngabo bafumana iziphumo kwii-ofisi zezithili zemfundo.

1.2Iinqununu/Abaphathi bamaziko banikwa iiyure ezi-4 zokutshekisha iziphumo bakhangele ukuba akukho naziphi na iimpazamo ezibonakala ngokulula. Ezi mpazamo mazicaciswe ngokuthi kwaziswe iCandelo loLawulo lweeMviwo (Directorate: Examinations Administration).

1.3NgoLwesibini, 30 Disemba 2008 ngo-12:00Izikolo/Amaziko angabanika abaviwa bawo iziphumo zabo kwizikolo zawo/kumaziko abo.
 QAPHELA: AKUKHO ziphumo mazaziswe abaviwa yaye AKUKHO ngcaciso emalunga noku mayaziswe abamajelo eendaba namaphephandaba ngaphambi ko-12.00.
1.4NgoLwesibini, 30 Disemba 2008 ngo-09:00UMphathiswa weMfundo wePhondo ubhengeza iziphumo zephondo.

1.5NgoLwesithathu, 31 Disemba 2008:Iziphumo ziya kuphuma kumaphephandaba nakweli ziko lewebhu le-WCED: http://wced.wcape.gov.za.

1.6Kuya kufuneka abaviwa bafake iinombolo zabo zoviwo kunye neenombolo zabo zezazisi ukuze elowo nalowo akwazi ukujonga iziphumo zakhe kwiziko lewebhu le-WCED.

1.7NgoMvulo, 5 Januwari 2008 emva ko-12:00Iziphumo ezingathathwanga ziya kuposelwa ezikolweni/emazikweni zii-ofisi zezithili zemfundo.

2. Malaziswe iSebe leMfundo ngamalungiselelo izikolo/amaziko aya kuwenza ngokumalunga nokuza kuthatha iziphumo zawo. Ngako oko ke ziyacelwa iinqununu/abaphathi bamaziko ukuba zizalise le fom iqhotyoshelweyo zize ziyithumele kumlawuli we-ofisi yesithili semfundo ungadlulanga owe-26 Novemba 2008. Le ngcaciso iya kusetyenziselwa kwakhona ukuqhagamshelana nezo nqununu/nabo baphathi bamaziko bamenyelwa ukuza kuzimasa iTheko loNikezelo-mabhaso nge-30 Disemba 2008.

3. Kubaluleke gqitha ukuba abaviwa abangalupasanga uviwo banikwe inkxaso ngokwasemoyeni kunye nentuthuzelo nengcebiso (support and counselling) yaye mabaxelelwe abaviwa ukuba kukho inkonzo elolu hlobo efumanekayo. Le ntuthuzelo nengcebiso inokunikwa esikolweni xa abafundi benikwa iziphumo zabo, okanye, apho kunokwenzeka, kwii-ofisi zezithili zemfundo ezichaphazelekayo apho kuya kubakho abantu besebe bokwenjenjalo. Ukuba inqununu/umphathi weziko imthumela umviwa kwi-ofisi yesithili semfundo, inqununu mayimnike umviwa lowo inombolo yefoni nedilesi ye-ofisi yesithili semfundo yaye mayinike i-ofisi yesithili semfundo iinkcukacha zomviwa. Kudla ngokuthi abo baviwa kufanele ukuba banikwe le ntuthuzelo nengcebiso bangayifuni ngokuzithandela, yaye ke kubongozwa iinqununu ukuba zikuthathele ingqalelo oku yaye zisoloko zithe qwa zijonge iimvakalelo zabaviwa ekuye akwaphumelela oko bebekulindele.

4. UKWAZISWA INGCACISO KWABAMAJELO EENDABA NAMAPHEPHANDABA

Abamajelo eendaba namaphephandaba baya kuba nomdla nabo wokufumana ingcaciso ezikolweni ngabaviwa abaphume emagqabini bagqwesa mpela kuviwo lweSatifikethi seMatriki sikaZwelonke. Iinqununu/Abaphathi bamaziko bangayinika ingcaciso elolu hlobo kunye neefoto kumajelo eendaba nakumaphephandaba kodwa ngokubhungisana nabazali babaviwa. Abona baviwa baziinjinga (top candidates) bangaqatshelwa ngenani lezifundo abafumene iinkwenkwezi (distinctions) kuzo (ngaphezulu kwe-80%) kwizifundo ezithandathu ezithi zizalisekise iimfuno zokunikwa iSatifikethi seMatriki sikaZwelonke (iiLwimi ezimbini, iMathematika/uLwazi lweMathematika (Mathematical Literacy) kunye nezinye izifundo ezithathu kungabandakanywa i-Life Orientation).


ISAYINWE: NGU-T. SINGH
INTLOKO: YESEBE LEMFUNDO
UMHLA: 2008:11:19

UKUTHATHWA KWEZIPHUMO ZOVIWO  (ubukhulu: 48 KB)