Die Grondslag vir Leer-veldtog, wat ons onlangs geloods het, is 'n oproep vir skole en gemeenskappe om op lees, skryf en hoofrekene te konsentreer.

Die veldtog sal ons verwagting vir leer en onderrig in die Grondslag- en Intermediêre Fase uiteensit. Dit sal die hulpbronne wat benodig word vir doeltreffende onderrig aandui en voorsien. Die toetsing wat benodig word om te bepaal of leerders jaar na jaar die vereiste standaard handhaaf, sal ook uiteengesit word.

Gehalteonderwys word bepaal in die eerste paar jaar wat 'n kind by 'n skool deurbring. Maria Montessori was een van die baie onderwyskundiges wat glo dat die grondslag vir menslike ontwikkeling gedurende die kind se vormingsjare gelê word. Sy het gesê die belangrikste lewenstydperk is nie universiteitsopleiding nie, maar die eerste een, van geboorte tot die ouderdom van ses.

Hierdie tydperk is gehalteonderwys se "goue uur" - die jare waarin die kind die fundamentele vaardighede en bevoegdhede aanleer wat hom of haar in staat sal stel om te leer en 'n duidelike begrip van die wêreld te vorm. Die "goue uur" van onderwys begin in die Grondslagfase (graad R tot drie) en word in die Intermediêre Fase (graad vier tot ses) vasgelê. Dit is in hierdie "goue uur" wat kinders leer lees sodat hulle in die toekoms kan lees om te leer.

Hulle verkry die vaardighede wat nodig is om die handboeke te begryp wat hulle sal moet lees en bestudeer sodat hulle matriek en hulle universiteitstudies kan slaag. In die Grondslagfase leer kinders om hulle uit te druk, om hulle gedagtes op papier neer te pen, om te beskryf en om later die wêreld om hulle te verduidelik. Hulle begin om die konsep en krag van syfers te verstaan. Die vermoë om goed te lees, skryf en te bereken, is die grondslag van gehalteonderwys.

Hoewel daar baie is om op trots te wees in post-1994-onderwys, is ons uitslae in internasionale assessering van lees en gesyferdheid kommerwekkend swak. Die oogmerk van hierdie internasionale graderings is om hervorming teweeg te bring. Baie lande het die verandering gemaak wat vereis word om leerderprestasie te verbeter, deur die inwerkingstelling van nasionale geletterdheidstrategieë.

Dit is nou ons beurt. Dit is nou ons beurt om te begin waar die impak die grootste sal wees, om ons aandag te vestig op die grondslag vir leer.

Ons het reeds 600 000 jong kinders wat graad R-klasse bywoon en ons is verbind daartoe om teen 2010 graad R-opleiding vir almal in die land aan te bied. Ons verbintenis is nie net om jong leerders in die klas te hê nie, maar om ook seker te maak dat hierdie kleintjies graad R-opleiding van gehalte ontvang waar hulle eiewaarde, selfvertroue en begrip van die wêreld rondom hulle kan ontwikkel.

Die belangrikste is dat graad R-onderwysers aan hulle geletterdheids- en gesyferdheidsvaardighede sal leer sodat hulle sal weet hoe om met boeke om te gaan, sodat hulle sal weet dat stories in boeke opgeteken is en sodat hulle die konsep van getalle in die wêreld om hulle kan verstaan.

Hulle sal reeds 'n groot voorsprong hê wanneer hulle in graad 1 beland. Wat is dit wat ons in graad 1 moet doen om die opwinding en belangstelling in leer aan te moedig?

Ons wil seker maak dat elke onderwyser, elke prinsipaal, elke bestuurder in die onderwysstelsel, presies verstaan wat gedoen moet word om gehalteonderwys te voorsien en na te speur. Ons wil seker maak dat elke leerder die uitdagings van leer aanvaar en dat elke ouer en voog die verantwoordelikheid aanvaar van 'n leerder in die huis. Ons wil seker maak dat ons die basiese goed reg doen en dan op daardie basiese goed voortbou om gehalteleer en -onderrig in al ons skole te ontwikkel.

Nie-onderhandelbaar

Die Grondslag vir Leer-veldtog sal 'n behoorlike grondslag lê in tale en wiskunde in die Grondslag- en Intermediêre Fase. Die maatstaf vir daardie grondslag is dat ons die gemiddelde leerderprestasie in tale en wiskunde wil verbeter na nie minder nie as 50% in die vier jaar wat die veldtog sal duur. Teen 2011 sal ons 'n nasionale evaluering onderneem wat die taal- en wiskundevermoëns van leerders in Suid-Afrika sal assesseer.

Ten einde sukses te behaal, sal die veldtog die volgende benodig:

• Dat elke klaskamer die nodige hulpbronne het vir doeltreffende onderrig. 'n Lys van basiese hulpbronne is in die Staatskoerant van 14 Maart 2008 gegee waarin hierdie veldtog bekend gemaak is. Elke skool moet seker maak dat elke onderwyser ten minste die basiese hulpbronne in die klaskamer het.
• Dat onderwysers doeltreffend beplan en onderrig gee. Alle onderwysers moet in hulle klasse wees gedurende kontaktyd en beplande lesse aanbied. Die rooster moet vereis dat elke leerder in die primêre skool ten minste 30 minute per dag lees, 'n stuk skryf wat toepaslik is vir die graad en vir 10 minute per dag hoofrekene en 20 minute per dag geskrewe wiskunde doen.
• Dat onderwyserforums in elke distrik gestig word. Onderwysers sal lede van die distriksforum of 'n skoolforum moet wees sodat idees, ervarings en beste praktyke tussen onderwysers gedeel kan word sodat onderwysers hulle onderrigstrategieë kan verbeter.
• Dat onderwysers leerderprestasie gereeld assesseer. Gestandaardiseerde assesserings sal deur die Departement van Onderwys voorsien word en die uitslae van hierdie assessering sal aan die distrikskantoor deurgegee word, vanwaar die uitslae vir elke skool via die provinsiale kantoor na my kantoor gestuur sal word. Ten einde onderwysers te help om die assesseringstake binne die raamwerk van deurlopende assessering te behartig, sal my departement mylpale vir verwagte bereiking in prestasie en tale per kwartaal en per graad daarstel. Jaarlikse toetse, gebaseer op die kwartaallikse assesserings, sal aan alle skole voorsien word.

Dit is die nie-onderhandelbare elemente vir die Grondslag vir Leer-veldtog.

Die McKinsey-verslag oor die toppresterende onderwysstelsels in die wêreld dui aan dat die beste stelsels op drie belangrike elemente berus: hulle kry die beste onderwysers (hulle kry die boonste derde van die graduandi); hulle kry die beste uit hulle onderwysers; en hulle doen stappe wanneer hulle leerders begin uitsak.

Ons vra van elke prinsipaal om in te gryp om te verhoed dat leerders uitsak. Die belangrikste doel van prinsipaalskap is om leierskap en bestuur te voorsien in alle areas van die skool. As leiers stel prinsipale die teikens vir hulle skole en ontwerp hulle strategiese planne waarin hulle hulle onderwysers en leerders inspireer om hierdie teikens te bereik. As bestuurders maak hulle seker dat die teikens bereik word.

Ons verwag van elke prinsipaal van 'n openbare skool om 'n plan voor te berei waarin daar uiteengesit word hoe akademiese prestasie op skoolvlak verbeter gaan word. Dit is die verantwoordelikheid van elke prinsipaal om die onderwysers te bestuur en te ondersteun om die vermoë van leerders om op die toepaslike vlak te lees, skryf, tel en te bereken, te verbeter.

Die sukses van die plan sal gemeet word aan die prestasie van die leerders in die gestandaardiseerde assessering wat aan die einde van die jaar afgeneem word. Distriksamptenare sal die insameling en samestelling van data uit die kwartaallikse toetse koördineer vir rapportering aan die provinsie.

Rol van ouers

Die verantwoordelikheid om ons kinders te leer om te lees, skryf en te bereken is nie net die onderwyser s'n nie. Daardie verantwoordelikheid word met die ouers gedeel. Ouers se pligte hou nie op by die betaling van skoolgeld of busgeld om hulle kind in 'n skool te kry wat gehalteonderwys aanbied nie. Dit is hulle verantwoordelikheid om seker te maak dat hulle kinders hulle huiswerk gedoen het en dat hulle kinders daagliks saam met of vir hulle lees.

Op hierdie manier gee ouers nie net aan hulle kinders die beste moontlike grondslag vir die lewe nie, maar hulle sal ook 'n band met hulle kind bou wat nooit gebreek kan word nie en wat op sigself belangrik is in 'n wêreld waar ouers en kinders maklik uitmekaar kan dryf.

Ons oproep strek verder as die klein skoolgemeenskap. Ons doen 'n beroep op openbare figure, unies, besighede, inrigtings vir hoër onderwys, niewinsgewende organisasies, om saam met ons plaaslike skoolgemeenskap te werk en hulle op welke manier ook al bystaan om die algemene bevoedgheid in leer, lees en berekening te bereik.

Ons weet wat ons in ons onderwysstelsel wil bereik. In die Grondslagfase moet leerders met selfvertroue en begrip leer om te lees, skryf, optel en bereken.

In die Intermediêre Fase moet leerders hulle bevoegdheid in lees, skryf en berekening uitbrei. Hulle moet geleer het om te lees sodat hulle kan lees om te leer. Wanneer leerders in die hoërskool aanland, moet hulle kan saamwerk met die onderwysers in die klas, maar hulle moet ook in staat wees om hulle studie buite die klaskamer voort te sien omdat hulle geleer het om onafhanklike leerders te wees.

In hierdie veldtog doen ons 'n beroep op die Suid-Afrikaanse gemeenskap om saam te staan om seker te maak dat onderwysers onderrig gee, prinsipale bestuur, leerders leer en ouers die onderwys van hulle kinders ondersteun.

As ons saamwerk, kan ons seker maak dat elke leerder die geleentheid het op 'n beter lewe in die toekoms. Vanaf Kaapstad tot in Limpopo sal die vermoë om te lees, skryf, tel en bereken kinders tot aan die voorpunt van ontwikkeling in die 21ste eeu neem.