| 1.1 |
Die PGOOO is die regering se respons op die onderwys- en vaardigheidsontwikkelingsuitdaging, soos gestel in die Versnelde en Gedeelde Groei-inisiatief vir Suid-Afrika (AsgiSA), wat gemik is op die bereiking van hoë vlakke van geletterdheid en gesyferdheid in die laer grade.
|
| 1.2 |
'n Diensverskaffer is gedurende die 2007/8 finansiële jaar deur die Wes-Kaap Onderwysdepartement (WKOD) gekontrakteer om die menslike, materiële en fisiese hulpbronne van die 405 primêre en sekondêre skole in NK's 1 en 2 te oudit. Dit het die WKOD in staat gestel om die PGOOO doeltreffend te implementeer ten einde die gehalte van onderrig en leer in die armste skole te verbeter.
|
| 1.3 |
Daarbenewens is die PGOOO daarop gemik om in die behoeftes van 'n hele paar skole in die Wes-Kaap te voorsien, wat ekonomies benadeelde leerders bedien en wat nie oor die basiese minimum hulpbronne beskik om effektiewe leer moontlik te maak nie.
|
| 1.4 |
In die 2007-08 finansiële jaar het 369 primêre skole en 36 sekondêre skole in NK's 1 en 2 'n beduidende hoeveelheid hulpbronmateriaal ontvang. Nog 171 primêre en 77sekondêre skole in NK 3 sal gedurende die 2008-09 finansiële jaar ondersteuning ontvang.
|
| 1.5 |
Teen die einde van die 2008-09 finansiële jaar sal 540 primêre skole en 113 sekondêre skole in NK 1, 2 en 3 deur middel van die PGOOO hulp ontvang het.
|
| 2. |
'n Kort opsomming van die bevindinge van die bogenoemde hulpbronoudit:
|
| 2.1 |
Onvoldoende toestande en ruimte by skole, 'n tekort aan onderwysers in belangrike areas, 'n tekort aan biblioteke en aan laboratoriums vir wetenskap, tegnologie en IKT, 'n gebrek aan LOOM wat spesifiek vir die AOO- en VOO-kurrikulums geskep is en 'n verskeidenheid sosiale probleme (soos armoede, dwelm- en alkoholmisbruik, en bendebedrywighede) en gesondheidsprobleme (soos TB, fetale alkoholsindroom, swak sig en swak gehoor) ry akademiese prestasie in die wiele.
|
| 2.2 |
Sekondêre skole met hoë druipsyfers is ook gewoonlik omring deur primêre skole wat nie die nodige hulpbronne het om doeltreffende skoolopleiding te voorsien nie.
|
| 2.3 |
Die meerderheid skole in NK 1 en 2 in die landelike gebiede moet dringend herstelwerk ondergaan en het oor baie min hulpbronne beskik. Skoolmeubels was in 'n swak toestand (swartborde was verweer, kaste in die klaskamers se deure en deurhandvatsels was stukkend), daar was oral gebreekte ruite en slordige stapels handboeke en gebruikte oefeningboeke het oral rondgelê.
|
| 2.4 |
Hierdie skole beskik oor baie min LOOM wat die NKV ondersteun.
|
| 3. |
Ten einde hierdie probleme te oorbrug, is die PGOOO aangewend om die volgende gedurende 2007 te voorsien:
- Installering van afgesperde klimrame by openbare primêre skole wat graad R aanbied
- Instandhoudings- en herstelwerk by skole in die laagste kwintiele
- Skoolbiblioteke wat geskep of uitgebou is by alle primêre en sekondêre skole in NK 1 en 2 (Die biblioteekhulpbronne het ingesluit boeke, CD's, kasette en plakkate. Groter skole het 'n rekenaar en sagteware vir die administrasie van die biblioteek ontvang.)
- Onderwysers is opgelei om hierdie biblioteke te bestuur
- Heelskoolevaluering is by sekere skole uitgevoer
- Behoeftige skole is finansieel bygestaan om 'n infrastruktuur vir hulle rekenaarlaboratoriums te bou (Hierdie infrastruktuur is 'n voorvereiste vir installasies wat deur Khanya gedoen word.)
Skole wat in 2007 deur middel van PGOOO ondersteuning ontvang het, het positiewe terugvoer gegee oor die verbeteringe wat hulle beleef het.
|
| 4. |
Wat kan PGOOO-skole gedurende die komende 2008-09 finansiële jaar verwag?
|
| 4.1 |
Wat die voorsiening van hulpbronne aan primêre en sekondêre skole in NK 1, 2 en 3 betref, sal daar gefokus word op die verbetering van die gehalte van onderwys ten einde gelyke geleenthede binne die Wes-Kaap te skep deur middel van 'n regstellingsprogram.
|
| 4.2 |
Die PGOOO sal gebruik word om, op grond van die ouditverslag, herstelwerk aan geboue van die armste skole te doen en om voorsiening te maak vir basiese hulpbronne soos toerusting, verbruikbare items, biblioteekmateriaal en onderrigondersteuningshulpbronne.
|
| 4.3 |
Heelskoolevaluering sal weer by geselekteerde skole gedoen word.
|
| 5. |
Bevoordeelde skole: Bylae A voorsien 'n lys van alle skole in NK 1, 2 en 3 wat by die PGOOO gaan baat.
|
GETEKEN: S.M. NAICKER
HOOF: ONDERWYS
DATUM: 2008:05:19
|