LIASA (Library and Information Services Association of South Africa) se 10de Jaarlikse Konferensie vind plaas van Dinsdag, 7 Oktober tot Vrydag, 10 Oktober 2008, met voorafsamekomste en satellietsessies op Maandag. 6 Oktober. Die tema vir die konferensie is Ons kyk vorentoe: die veranderende rol van BID. Die konferensie sal by die Kaapstadse Internasionale Konvensiesentrum (CTICC) plaasvind en sal aangebied word deur die Wes-Kaapse tak van LIASA. Volledige besonderhede aangaande die konferensie, registrasiebesonderhede en die program kan op die amptelike LIASA-webblad gevind word by www.liasa.org.za.

Die SLYSIG-postkonferensiewerkwinkel wat op Saterdag, 11 Oktober 2008 by Cape Town High School, Regeringslaan (toegang van Hatfieldstraat), Kaapstad, gehou sal word, is van besondere belang vir ons onderwysers/bibliotekarisse van skoolbiblioteke/bronnesentrums. Die konsepprogram, wat hierby aangeheg word, belowe om baie verrykend te wees (sien ook die konsepprogramskakel op die LIASA-webblad).

Die sluitingsdatum vir voorafregistrasie is 29 September 2008, hoewel dit moontlik sal wees om op die dag te registreer. Registrasiefooie beloop R150,00 vir LIASA-SLYSIG-lede en R200,00 vir nielede. Volle besonderhede, sowel as registrasievorms, is op die webblad beskikbaar.

Ons moedig alle onderwyser-bibliotekarisse en onderwysers met 'n belangstelling in skoolbiblioteke/bronnesentrums aan om hierdie werkwinkel by te woon.