1. Die International Association of School Librarianship (IASL) het Oktober tot Internasionale Skoolbiblioteekmaand (ISBM) verklaar. Gedurende Oktober 2008 sal skoolbiblioteke dwarsoor die wêreld en in Suid-Afrika biblioteek- en inligtingsdienste by skole vier en bevorder onder die tema: Geletterdheid en Leer by jou Skoolbiblioteek.
2. Internasionale Skoolbiblioteekmaand sal diegene in beheer van skoolbiblioteke regoor die wêreld die geleentheid gee om 'n dag in Oktober te kies wat hulle bepaalde situasie die beste pas ten einde die belangrikheid van skoolbiblioteke te vier. Die 2008 ISBM-plakkate en boekmerke kan afgelaai word van die ISBM-bronne se webbladsy: http://www.iasl-online.org/events/islm/islm-resources.htm.
3. Verwys asseblief na die meegaande aanhegsel vir 'n reeks voorstelle oor hoe WKOD-skole Internasionale Skoolbiblioteekmaand in 2008 kan vier, 'n paar bruikbare webblaaie wat besoek kan word en die amptelike weergawe van die ISBM-logo wat in promosiemateriaal gebruik kan word. Let daarop dat hierdie logo gebruik moet word vir die bevordering van Internasionale Skoolbiblioteekdag en dat dit nie vir kommersiële doeleindes aangewend mag word nie.
4. In die lig van die kritieke rol van leer-en-onderrigondersteuningsmateriaal (LOOM) in uitkomsgebaseerde onderwys en leer, moet onderwysers van die beskikbaarheid van biblioteek- en inligtingshulpbronne vir hierdie doel bewus word. As deel van die viering van Internasionale Skoolbiblioteekmaand 2008 en die bevordering van die biblioteekinligtingsdienste van die WKOD, word u en die personeel uitgenooi om 'n besoek aan die EDULIS-biblioteek of aan die distriksbronnesentrums soos hieronder gelys te bring vir oriëntering en inligting aangaande hierdie dienste en die beskikbare gespesialiseerde biblioteek- en inligtingshulpbronne.
5. Die EDULIS-biblioteek in Bellville en die distriksbronnesentrums in Kuilsrivier, Mitchells Plein, Paarl, Worcester en George het die volgende LTSM beskikbaar vir individuele lenings deur onderwysers, prinsipale en WKOD-amptenare, of as bloklenings aan skole:
  • 'n wye verskeidenheid kurrikulumondersteuningsmateriaal
  • leerdergerigte materiaal (insluitend prenteboeke en storieboeke vir alle ouderdomme wat gedurende leesperiodes gebruik kan word), wat spesiaal geëvalueer en hersien is om onderwysers te help om materiaal vir hulle skoolbiblioteke te kies
  • inspirerende aktiwiteitsgebaseerde idees vir lesplanne en vir geletterdheids- en gesyferdheidsontwikkeling (waarvan baie gefotokopieer kan word)
  • 'n groot versameling nuwe boeke oor bestuur en leierskap
  • insiggewende materiaal oor ondersteuning van onderwysnavorsing en beleidsontwikkeling
  • materiaal wat kritieke vraagstukke dek, bv. geletterdheid en gesyferdheid, insluiting, dissipline en gedragsprobleme, differensiasie, MIV/VIGS en fetale alkoholsindroom
  • video's, DVD's, oudiokasette, CD's, CD-ROM's en multimedia wat 'n wye reeks onderwerpe dek om klasonderrig en -leer te verryk en te ondersteun.
6. Die volgende bibliotekarisse/bronnesentrumkoördineerders kan geskakel word vir inligting aangaande bogenoemde:

Susan HanekomEDULIS-biblioteek, Bellville021 957 9618
Cheryl JosephMetro-Oos-bronnesentrum/
EDULIS-takbiblioteek Kuilsrivier		021 900 5111
Ntombi MngxumaMetro-Suid: Brian O'Connell-
bronnesentrum, Mitchells Plein		021 370 2084
Ina HeibergWeskus-bronnesentrum, Paarl021 860 1229
Janine OntongKaapse Wynland-bronnesentrum,
Worcester		023 348 4657
Sam WebberEden & Sentrale Karoo-
bronnesentrum, George		044 803 8328
7. Aangesien daar geen funksionerende bronnesentrum in die Onderwysdistrik Metro-Sentraal is nie en in reaksie op verskeie versoeke van opvoeders by skole in die distrik, is 'n insamelingspunt by EDUMEDIA in Mowbray geskep vir skoolbloklenings by die EDULIS-biblioteek. Hierdie tussentydse maatreël sal van toepassing wees totdat 'n bronnesentrum by die Onderwysdistrikskantoor Metro-Sentraal geskep is.


GETEKEN: S.M. NAICKER
HOOF: ONDERWYS
DATUM: 2008:09:22

Voorgestelde aktiwiteite vir Internasionale Skoolbiblioteekmaand  (grootte: 48 KB)