'n Paar jaar gelede het die WKOD die eerste van sy webinisiatiewe van stapel gestuur, wat WKOD Aanlyn en die Kurrikulumontwikkeling-webtuiste ingesluit het. Aangesien 2008 die eerste jaar is waarin die hersiene graad 12-kurrikulum ekstern geëksamineer sal word, voorsien die WKOD aan onderwysers 'n addisionele reeks elektroniese onderwyserondersteunings-inisiatiewe. Hierdie minuut verskaf inligting aangaande hierdie inisiatiewe en herinner u ook aan sommige van die ander aanlyn-onderwysbronne en dienste wat deur die WKOD en die nasionale Departement van Onderwys voorsien word.

1. Poslyste

Elektroniese poslyste is vir elk van die NSS-vakke geskep. Hierdie poslyste sal dit vir onderwysers in elke VOO-vak moontlik maak om met mekaar te kommunikeer as 'n vakgroep met die oog daarop om idees, vraestelle en dokumente uit te ruil, vrae te vra en antwoorde te verkry asook om kwessies te debatteer. Al die poslyste is geslote lyste, wat beteken dat slegs gelyste lede boodskappe aan hierdie lyste kan stuur, om sodoende gemorspos en ander ongewenste materiaal te verminder.

Om op 'n spesifieke poslys in te teken, volg die volgende aanwysings:

  • Maak jou Internet webblaaier oop.
  • Tik die volgende adres in (URL):  http://www.wcape.school.za/mailman/listinfo
  • Kies jou onderwerp deur op die vakbenaming van jou keuse in die linkerkantste kolom te kliek
  • Tik jou e-posadres en naam in (bv. Joe Bloggs) in die oop ruimte wat daarvoor verskaf is. Geen sleutelwoord hoef ingetik te word nie. Kliek op die "Subscribe"-knoppie.
  • Nie lank hierna nie behoort u 'n e-pos te ontvang wat sal aandui dat die lysbestuurder van daardie vak aandag sal skenk aan jou versoek.
  • Binne 'n dag of so sal u 'n e-pos ontvang wat u verwelkom as lid van die vakposlys en u sal kan deelneem aan die besprekings wat plaasvind. Die verwelkomingsboodskap sal inligting bevat oor hoe om boodskappe aan die lys te pos.
Indien u nie 'n persoonlike e-posadres het nie, nader asseblief die netwerkbestuurder by u skool wat aan u 'n e-posadres behoort te kan verskaf. Maak seker dat u die e-posbeleide by u skool navolg.

2. Blogs

'n Nuwe en opwindende ontwikkeling in die sosiale netwerkruimte is die gebruik van "blogs" ("web logs"). Blogs bied die geleentheid om kommentaar, opinies of nuus oor 'n besondere onderwerp uit te ruil. 'n Tipiese blog kombineer teks, beelde, skakels met ander blogs, webtuistes en ander media wat verwant is aan die onderwerp wat bespreek word. Die fasiliteit wat 'n leser in staat stel om kommentaar te lewer in 'n interaktiewe formaat maak 'n belangrike deel uit van baie blogs. Die meeste blogs is hoofsaaklik teksgebaseer, alhoewel sommige fokus op kuns, foto's, video's, musiek en oudio ("podcasting") as deel van 'n wyer netwerk van sosiale media.

Addisioneel tot die verskillende blogs wat op die Kurrikulum-webtuiste beskikbaar is, word u ook uitgenooi om die volgende blogs, wat onlangs begin is, te besoek en daartoe by te dra:

3. Kurrikulum-webtuiste

Die Kurrikulum-webtuiste bevat 'n massa inligting oor elke vak en leerarea. Hierdie inligting sluit in die volgende:

  • Aspekte van assessering
  • Voorbeeldvraestelle in graad 11 en 12
  • Beleide, omsendbriewe en riglyndokumente vir vakke of leerareas
  • Besprekingsforums
  • Kontakbesonderhede van kurrikulumbestuurders, beplanners en adviseurs
Die nuutste boeke en elektroniese aankope beskikbaar vanaf EDULIS verskyn ook op die Kurrikulumwebtuiste. Toegang kan verkry word via die betrokke subtuistes vir vakke en leerareas. Vir meer inligting, maak u snuffelaar oop op  http://curriculum.pgwc.gov.za/  en kies dan die gewenste vak of leerarea van die kolom aan die kant. U kan ook versoek om gereelde bygewerkte aanvullings te ontvang deur na die onderpunt van die webtuiste af te rol en te registreer.

4. EduMedia-webtuiste

EduMedia, die WKOD se mediaontwikkelingseenheid, ontwikkel en versprei elektroniese bronne wat die AOO- sowel as die VOO-bande dek.

EduMedia dienste kan gevind word by  http://edumedia.wcape.school.za/  waar u na die volgende moet oplet:

  • Die jongste byvoegings tot die produkte wat hulle verskaf
  • Die produkkatologus en die aanlynwinkel
  • Die biblioteek van Internet-bronne
'n CD wat 'n volledige stel graad 12-voorbeeldvraestelle bevat kan ook van EduMedia verkry word. Kontak asseblief EduMedia by tel. 021 689 9536 of by e-posadres edumedia@pgwc.gov.za vir meer inligting oor hierdie baie waardevolle bron.

5. EDULIS-webtuiste

EDULIS (Die Onderwysbiblioteek- en Inligtingsdiens) maak seker dat onderwysers van die WKOD toegang het tot bestuurs-, navorsings- en kurrikulumverwante materiaal om onderwys en leer te ondersteun. Dit koördineer en ondersteun ook die funksies van skoolbiblioteekadviseurs en EDULIS-bronnesentrums by die distrikskantore en verskaf leiding en hulp aan skole met die aankoop van biblioteekmateriaal soos boeke, plakkate, DVD's, CD's en multimedia.

Kyk gerus na  http://curriculum.pgwc.gov.za/site/118  indien u nog inligting soek oor die diens en e-bronne wat EDULIS aan onderwysers verskaf. Vir verdere inligting oor toegang tot volteks-artikels, kontak EDULIS by tel. 021 957 9618 of by posadres edulis@pgwc.gov.za

EDUPALS is die biblioteekadministrasie se sagteware wat gebruik word om aanlyntoegang te vergemaklik tot biblioteekmateriaal in EDULIS se sentrale versameling in Bellville, sowel as in die EDULIS-bronnesentrums in die distrikte. Lede van hierdie biblioteke kan, in die gerief van hulle huise, by hulle lessenaars of in hulle skool WEBPALS gebruik om boekresensies en voorgestelde aankope deur EDULIS deur te werk en die hele PALS-netwerk deur te gaan op soek na materiaal om te leen. Besigtig asseblief  http://eduweb.pals.gov.za  vir verdere inligting oor hierdie dienste en om toegang te verkry tot die PALS-biblioteekstelsel se databasis.
6. Nasionale Onderwysportaal

Die nasionale Departement van Onderwys het onlangs weer Thutong, die nasionale onderwysportaal, bekendgestel. Hierdie portaal verskaf ook 'n reeks dienste ter ondersteuning van onderwys en leer. Die URL is  http://www.thutong.org.za .



GETEKEN: MJ CHILES
HOOF: ONDERWYS
DATUM: 2008:04:18