1. Die Departement van Kuns en Kultuur, in samewerking met die Biblioteek- en Inligtingsvereniging van Suid-Afrika (LIASA) het besluit dat die week van 17 tot 22 Maart 2008 Suid-Afrikaanse Biblioteekweek sal wees. Tydens hierdie week sal Suid-Afrika biblioteek- en inligtingsdienste vier en bevorder deur die volgende tema te gebruik: Biblioteke: Van Plaaslik tot Globaal @ Jou Biblioteek
2. Met die oog op die toenemend belangrike rol van leer- en onderrigondersteuningsmateriaal (LOOM) in uitkomsgebaseerde leer en onderrig, behoort onderwysers van die beskikbaarheid van biblioteekhulpbronne vir hierdie doel bewus te wees. As deel van die vierings van die Suid-Afrikaanse Biblioteekweek 2008 en die bevordering van die biblioteek- en inligtingsdiens van die WKOD, word u en u personeel genooi om 'n besoek te bring aan die EDULIS-biblioteek of sekere Bronnesentrums by distrikskantore, vir oriëntering en inligting aangaande hierdie dienste en die beskikbare gespesialiseerde biblioteekhulpbronne. Groepbesoeke hoef nie beperk te word tot die tydperk 17 tot 22 Maart nie, maar kan gereël word om u en u personeel te pas.
3. Die bronnesentrumversamelings in Mitchells Plain, Paarl, George, Worcester en Kuilsrivier het die volgende LOOM beskikbaar vir individuele uitleen deur onderwysers, of blokleen deur skole.
  • Inspirerende aktiwiteitgebaseerde idees vir lesplanne, en vir geletterdheids- en gesyferdheidsontwikkeling (vele hiervan kan gekopieer word)
  • 'n Wye reeks kurrikulumondersteuningsmateriaal
  • 'n Baie groot versameling van onlangs gepubliseerde boeke oor bestuur en leierskap
  • Prikkelende materiaal ter ondersteuning van onderwysnavorsing en onderwys-beleidsontwikkeling
  • Materiaal wat huidige kritieke kwessies soos geletterdheid en gesyferdheid, inklusiwiteit, dissiplinêre en gedragsprobleme, differensiasie, MIV/Vigs en fetale alkoholsindroom dek
  • Leerdergefokusde materiaal (prenteboeke en novelles vir leerders van alle ouderdomme vir gebruik gedurende leesperiodes), wat spesiaal geëvalueer en geresenseer is om onderwysers te help om stof vir hulle skoolbiblioteke uit te soek
  • Video's, DVD's, oudiokassette, CD's, CD ROM's en multimedia wat 'n wye reeks onderwerpe insluit om klaskamerleer en -onderrig te verryk en te ondersteun
4. Die volgende bibliotekarisse kan gekontak word in bogenoemde verband: 
Susan Hanekom  EDULIS-biblioteek, Middestad Mall,      021 957 9617
               Bellville

Cheryl Joseph  Metro-Oos Bronnesentrum/EDULIS-         021 900 5111
               takbiblioteek, Kuilsrivier   

Ntombi Mngxuma Metro-Suid: Brian O'Connell             021 370 2084
               Bronnesentrum, Mitchells Plain

Ina Heiberg    Weskus Bronnesentrum, Paarl             021 860 1229

Sam Webber     Eden & Karoo Bronnesentrum, George      044 803 8328

Janine Ontong  Kaapse Wynland Bronnesentrum, Worcester 023 348 4657
5. In die afwesigheid van 'n funksionerende bronnesentum by die Distrikskantoor Metro-Sentraal en in reaksie op vele versoeke van opvoeders by skole in die distrik, is besluit om 'n kollekteerpunt in te rig by EDUMEDIA in Mowbray vir skoolbloklenings van boeke wat van die EDULIS-biblioteek geleen is. Hierdie interimmaatreël sal van toepassing wees totdat 'n bronnesentrum vir die Distrikskantoor Metro-Sentraal tot stand gebring is.


GETEKEN: S.M. NAICKER
HOOF: ONDERWYS
DATUM: 2008:03:05