2.1	Aansoekers moet beskik oor 'n erkende driejarige na-Senior Sertifikaat-kwalifikasie wat die vak waarvoor aansoek gedoen word op tweede- of derdejaarsvlak insluit, of oor ander toepaslike na-Senior Sertifikaat-kwalifikasie in die vak beskik.

2.2	Onderwysers moet ten minste een jaar ondervinding hê in die onderrig van die betrokke vak op graad 12-vlak. Hulle moes ook die vak vir ten minste 'n jaar in 2006, 2007 of 2008 onderrig het. Voorkeur sal egter verleen word aan opvoeders wat die NKV tans aan kandidate onderrig.

2.3	Alle aansoekers moet in diens wees by inrigtings wat kandidate vir die Nasionale Senior Sertifikaat-eksamen voorberei.

2.4	Ten einde te verseker dat die funksionering van die inrigting nie nadelig deur die afwesigheid van opvoeders geraak word nie, sal nie meer as 30% van die opvoeders by 'n betrokke inrigting as nasieners aangestel word nie. Prinsipale moet dit in ag neem wanneer hulle aansoeke van nasieners goedkeur.

2.5	Die finale besluit oor watter opvoeders as nasieners aangestel kan word, berus by die Wes-Kaap Onderwysdepartement (WKOD).

2.6	Aansoekers wat aansoek doen om Vraestel 2 in Tale na te sien, moes 'n studie gemaak het van alle voorgeskrewe werke vir die eksamen en nie net die boeke bestudeer wat deur die kandidate by hulle betrokke skole bestudeer is nie.

2.7	Prinsipale/Sentrumbestuurders word versoek om hulle onderwysers vir Tale, Geskiedenis, Wiskunde en Wiskundige Geletterdheid aan te moedig om na te sien, aangesien die Departement elke jaar sukkel om geskikte nasieners vir hierdie vakke te kry.

2.8	Die aanstelling as nasieners sal in ooreenstemming wees met die WKOD se Diensbillikheidsplan en is dit noodsaaklik dat aansoekers hulle ras en geslag op die aansoekvorm moet aandui.

2.9	Geen opvoeder mag as 'n nasiener aangestel word nie indien hy of sy 'n vakslaagpersentasie van minder as 50% in die Senior Sertifikaat-eksamen van die vorige jaar gehad het.

2.10

Aansoekers wat aangedui het dat hulle van voorneme is om te bedank of af te tree en hulle diens by die WKOD teen 30 September 2008 gaan beëindig, sal nie vir aanstelling as n nasiener oorweeg word nie, behalwe in gevalle waar die betrokke opvoeder aansluit by 'n onafhanklike skool wat die nasionale eksamen aflê.

2.11	Geen onderwyser wat met siekteverlof is in die nasientydperk sal aangestel word as n nasiener vir die Nasionale Senior Sertifikaat-eksamen nie.

2.12	'n Aansoeker moet 'n afsonderlike aansoekvorm voltooi vir elke vraestel waarvoor hy of sy aansoek doen.

2.13

Alle nuwe aansoekers moet 'n gewaarmerkte afskrif van hulle hoogste akademiese kwalifikasie of akademiese studierekord aanheg, wat aandui watter vakke die aansoeker geneem en geslaag het. Alle nuwe aansoeke wat nie van gewaarmerkte afskrifte van uitslae vergesel word nie, sal nie oorweeg word nie. Geen uitsonderings sal in hierdie verband gemaak word nie, en geen korrespondensie sal met aansoekers daaroor gevoer word nie.

2.14	Interne moderatore van vraestelle wat min kandidate het en wat benewens hulle funksie as interne moderatore ook as nasieners aangestel wil word, moet ook op bogenoemde wyse aansoek doen.

2.15

Hoewel die Departement verkies dat skoolhoofde aan die einde van 'n akademiese jaar by die skool teenwoordig moet wees, mag prinsipale ook aansoek doen om as nasieners aangestel te word. Die keuring van skoolhoofde as nasieners sal derhalwe, onder andere, aan die volgende voorwaardes onderworpe wees: Skoolhoofde se aansoeke sal aan die distriksdirekteure vir aanbeveling voorgelê word. 'n Primêre oorweging sal wees of 'n skool tydens die nasienperiode doeltreffend sal kan funksioneer in die afwesigheid van die skoolhoof. Gepaste reëlings moet getref word vir 'n personeellid om as prinsipaal waar te neem. Delegasie van verantwoordelikhede moet skriftelik gedoen word. Die skool moet in staat wees om sonder die hoof se kundigheid en leiding te kan funksioneer en die skool se leerderbevorderingsproses moet nie in die gedrang kom as gevolg van die prinsipaal se afwesigheid nie.

3.1

Aansoeke moet ingedien word by die volgende adres: Hoof: Onderwys Direktoraat: Eksamens Wes-Kaap Onderwysdepartement Grand Central Towers Laer-Parlementstraat KAAPSTAD 8001 Afskrifte van die voorgeskrewe vorm kan ook verkry word by bogenoemde adres of vanaf die WKOD se webadres: http://wced.wcape.gov.za/circulars

3.2

Aansoeke moet per geregistreerde pos gestuur word en die kwitansie wat deur die Poskantoor uitgereik word, moet behou word as bewys van versending. Aansoekvorms kan ook per hand ingedien word by die Direktoraat: Eksamens, 4de verdieping, Grand Central Towers-gebou, waar 'n kwitansie vir elke aansoek uitgereik sal word. Aansoekvorms moet die Direktoraat: Eksamens bereik teen nie later nie as 16:00 op 25 April 2008. Aansoeke mag onder geen omstandighede direk aan eksaminatore gestuur word nie. Aansoeke wat ná die sluitingsdatum ontvang word, sal nie oorweeg word nie. Die onus is op aansoekers om seker te maak dat hulle aansoeke hierdie kantoor voor die sluitingsdatum bereik.

3.3

Alle navrae, hetsy per telefoon of skriftelik, moet gerig word aan die Direktoraat: Eksamens en nie direk aan eksaminatore nie. Skakel met een van die volgende amptenare: Mnr Mark Cameron, tel. 021 467 2964, e-pos mgcamero@pgwc.gov.za Mnr N Riddles, tel. 021 467 2992, e-pos nriddles@pgwc.gov.za Me NM Janda tel. 021 467 2009, e-pos njanda@pgwc.gov.za

3.4

Goedkeuring van aansoeke Ingevulde aansoekvorms van onderwysers moet deur die skoolprinsipaal of sentrumbestuurder onderteken word. Prinsipale/Sentrumbestuurders moet die korrektheid van die aansoekers se besonderhede nagaan voordat die vorm onderteken word. Ingevulde aansoekvorms van hoofkurrikulumadviseurs, prinsipale en sentrumbestuurders moet deur die distriksdirekteur onderteken word. Ingevulde aansoekvorms van kurrikulumadviseurs moet deur die direkteur of hoofkurrikulumadviseur van die distrikskantoor onderteken word. Ingevulde aansoekvorms van senior kurrikulumbeplanners moet deur die Direkteur: Kurrikulum VOO onderteken word.

3.5	Aansoeke wat nie deur die aansoeker se hoof onderteken is nie, sal nie oorweeg word nie.

3.6	Aansoekers moet asseblief hul ete-voorkeure op hulle aansoekvorms aandui en daarop let dat die WKOD geen ete-voorkeurveranderinge tydens die nasienperiode kan akkommodeer nie.

4.1	Alle nasienwerk word verrig by 'n sentrale plek in of naby Kaapstad, soos deur die WKOD bepaal.

4.2	Die datum van die nasienperiode sal later bevestig word. Nasieners moet seker maak dat al hulle skoolverwante nasien- en administratiewe werk afgehandel is voordat die nasientydperk aanbreek.

4.3	Daar sal van nasieners verwag word om skrifte vir minstens 8 uur per dag na te sien. Dit sluit middagetes en teetye uit. Die nasiensentrum sal gedurende die nasientydperk daagliks van 06:00 tot 22:00 toeganklik wees.

4.4	Die nasientarief vir elke vraestel sal bekend gemaak word sodra dit van die nasionale Departement van Onderwys ontvang word. Elke moderator, eksaminator en nasiener sal ooreenkomstig die Inkomstebelastingwet belas word.

4.5

Dit is noodsaaklik dat prinsipale, distriksdirekteure, kringbestuurders en kurrikulumadviseurs die inhoud van hierdie minuut onder die aandag van alle opvoeders bring, insluitend diegene wat met verlof is. Die Direktoraat: Eksamens kan geen verantwoordelikheid daarvoor aanvaar as opvoeders nie oor die inhoud van hierdie Eksamenminuut ingelig word nie.