1. Die gerekenariseerde nasienskedules vir terplaatse-assessering word ingesluit sodat kurrikulumadviseurs dit vir hulle onderskeie leerareas kan invul.
2. Elke nasienskedule bestaan uit 'n oorspronklike en drie afskrifte. Na die modereringsproses afgehandel is en die punt op die gerekenariseerde nasienskedule aangebring is, moet die twee onderste afskrifte verwyder word. Een van hierdie afskrifte is vir die sentrum se rekords en die ander een is vir die rekords van die distrikskantoor.
3. Gebruik asseblief die ingeslote kontrolelys ten einde die sentrums te identifiseer en om seker te maak dat die nasienskedules by die Departement ingedien is.
4. Let daarop dat kurrikulumadviseurs vir die volgende verantwoordelik is:
  • die moderering van die terplaatse-assessering in hulle leerareas, en
  • die indien van die nasienskedules by die Direktoraat: Eksamens.
5. Die volgende prosedure moet gevolg word wanneer die nasienskedules ingevul word:

5.1 Die leerders se individuele punte moet deur middel van drie syfers in die toepaslike kolom aangedui word, bv. 013, en nie 13 nie.
5.2 Onder geen omstandighede mag 'n leerder se punte weggelaat word nie. 'n Punt moet toegeken word vir elke kandidaat wie se assesseringsnommer op die nasienskedule verskyn. Dit is ook van toepassing op leerders wat
  • om 'n sentrumverandering aansoek gedoen het,
  • vir 'n lang tydperk gedurende die jaar afwesig was, en
  • op die dag van moderering afwesig was.
5.3 In gevalle waar leerders portefeuljes vir 'n eksamen ingedien het wat die huidige een voorafgaan, moet sentrumbestuurders seker maak dat die DASS-punte wat in die leerarea verkry is op die huidige nasienskedule aangedui word.
5.4 Slegs in gevalle waar daar geen punte vir 'n leerder beskikbaar is nie moet 999 (afwesig) op die nasienskedule ingevul word. Hierdie leerders sal nie 'n uitslag in die leerarea verkry nie. 'n Nulpunt (000) word toegeken slegs wanneer 'n leerder werk ingedien het wat geen punte werd is nie.
5.5 "TOTAAL" (onder aan nasienskedule) is slegs vir kantoorgebruik.

6. Kurrikulumadviseurs word versoek om seker te maak dat die ingevulde nasienskedules (oorspronklik en afskrifte) die Direktoraat: Eksamens teen Maandag, 2 Junie 2008 bereik. Adresseer dit vir die aandag van mnre L van Gensen/ C Slee, Wes-Kaap Onderwysdepartement, Kamer 529 (5de vloer), Grand Central Towers, Laer-Parlementstraat, Kaapstad, 8001.


GETEKEN: A.P. CLAUSEN
HOOF: ONDERWYS
DATUM: 2008:03:25