| 1. |
PROSEDURE OM TE VOLG MET KLAGTES EN KOMMENTAAR AANGAANDE VRAESTELLE
|
| 1.1 |
Let asseblief daarop dat alle kommentaar en klagtes aangaande nasionale en provinsiale vraestelle die Direktoraat: Eksamenadministrasie binne twee dae na die voltooiing van die eksamen vir daardie besondere vraestel of vraestelle moet bereik.
|
| 1.2 |
Hierdie reëling is noodsaaklik omdat die paneel eksaminatore vir die nasionale vraestelle die memorandum drie dae na elke eksamen bespreek. Die impak wat klagtes/foute op die nasienproses sou kon hê moet by die eerste moontlike geleentheid bespreek word om te verhoed dat die kandidate benadeel word.
|
| 1.3 |
Die brief, gerig aan die Direktoraat: Eksamenadministrasie moet nie enige verwysing na die skool se naam bevat nie. Slegs die sentrumnommer moet aangedui word sodat dit vir die nasionale Departement van Onderwys voorberei kan word.
|
| 1.4 |
Alle relevante dokumente moet aan die Direktoraat: Eksamenadministrasie voorgelê word vir die aandag van Mev MM Ludick mmludick@pgwc.gov.za of mnr JC Albertyn by jalberty@pgwc.gov.za, of dit kan gefaks word na 021 461 5628.
|
| 2. |
PROSEDURE OM TE VOLG MET DIE HANTERING VAN ONREËLMATIGHEDE
In die geval van assesseringsonreëlmatighede wat geïdentifiseer is terwyl die vraestel geskryf is, moet die volgende prosedure gevolg word:
|
| 2.1 |
Die opsiener moet die kandidaat se antwoordskrif verwyder en die woord "ONREËLMATIGHEID" op die voorste buiteblad aanbring, en die soort onreëlmatigheid en die datum, tyd en plek van die onreëlmatigheid aandui ;
|
| 2.2 |
Die woorde "Antwoordskrif gekonfiskeer op …….. om …….(tyd)" moet in vet drukletters op die buiteblad aangebring word ;
|
| 2.3 |
Die opsiener moet beslag lê op enige ongemagtigde of inkriminerende materiaal, soos notas of enige ander voorwerp wat direk of indirek gebruik word of in besit van die kandidaat is en wat gebruik kon gewees het om die onreëlmatigheid te pleeg ;
|
| 2.4 |
Sodanige materiaal moet aan die gekonfiskeerde eksamenskrif geheg word, wat dan die eiendom van die Departement word en nóg die kandidaat nóg sy of haar ouer(s) of voogde het die reg om te eis dat dit terugbesorg word ;
|
| 2.5 |
Die opsiener moet dan aan die kandidaat 'n nuwe antwoordskrif gee. Die antwoordskrif moet ook geëndosseer word met die woorde:"NUWE ANTWOORDSKRIF - VERVANG ONREËLMATIGE ANTWOORDSKRIF ", met die datum en tyd van uitreiking ;
|
| 2.6 |
Die kandidaat moet ingelig word dat die feit dat hy of sy toegelaat is om met die eksamen voort te gaan nie beskou moet word as 'n kondonering van sy of haar oortreding van die eksamenregulasies nie, maar dat 'n geskrewe verslag aan die einde van die eksamen aan die hoofopsiener voorgelê sal word en dat die insident aan die Provinsiale Eksamenonreëlmatigheidskomitee (PEOK) gerapporteer sal word ;
|
| 2.7 |
Die kandidaat mag nie weer die vrae wat reeds voltooi is, herhaal in die nuwe antwoordskrif nie maar mag slegs voortgaan waar hy of sy opgehou het na die onreëlmatigheid ontdek is;
|
| 2.8 |
Die opsiener moet geen addisionele tyd toelaat om te kompenseer vir die tyd wat verlore geraak het tydens die opsporing en prosessering van die eksamenonreëlmatigheid nie ;
|
| 2.9 |
Na afloop van daardie eksamen moet die opsiener onmiddellik 'n volledige skriftelike verslag voorlê aan die hoofopsiener aangaande die onreëlmatigheid ;
|
| 2.10 |
Die kandidaat moet, na voltooiing van die eksamen, met die onreëlmatigheid gekonfronteer word en die geleentheid gebied word om 'n geskrewe verklaring of reaksie op die beweerde oortreding te voorsien ;
|
| 2.11 |
Waar die kandidaat weier om die vereiste geskrewe verklaring te voorsien of daarop te reageer, moet hierdie weiering deur die opsiener skriftelik in 'n verklaring bevestig word. Die kandidaat moet die skriftelike verklaring van die opsiener onderteken ;
|
| 2.12 |
Indien die kandidaat weier om te voldoen aan subartikel 2.11, moet 'n ander opsiener wat aan die eksamensentrum verbonde is 'n geskrewe verklaring voorsien ter bevestiging van die weiering van die kandidaat om 'n geskrewe verklaring te doen ;
|
| 2.13 |
Die antwoordskrif, enige inkriminerende materiaal en alle toepaslike verklarings moet dan op die gewone manier via die IBB-bestuurder aan die Departement voorgelê word vir die aandag van die Direkteur: Eksamenadministrasie. Die Opsienersverslagvorm vir die rapportering van onreëlmatighede moet ook gefaks word vir die aandag van mev MM Ludick by 021 461 5628. (Dit is belangrik dat alle relevante dokumente volledig ingedien word aangesien ontbrekende dokumente die proses om 'n uitslag vir die kandidaat te verkry, onnodig vertraag.)
|
| 3. |
U word ook verwys na paragraaf 12 (Onreëlmatighede) en paragraaf 13 (Klagtes) van die Prosedurehandleiding vir Prinsipale en Opsieners vir 2008 en die Staatskoerant, vol. 484 no 28156 van 21 Oktober 2005 met betrekking tot Regulasies vir die Afneem, Administrasie en Bestuur van Assessering.
|
| 4. |
'n Dringende beroep word gedoen op prinsipale en hoofopsieners om seker te maak dat daar streng gehou word by bogenoemde instruksies vir die November 2008-eksamen sowel as die aanvullende eksamens van 2009.
|
GETEKEN: T SINGH
HOOF: ONDERWYS
DATUM: 2008:09:26
|