| 1. |
Die beleid aangaande die aflê van die Nasionale Senior Sertifikaat (NSS) deur leerders met leerstoornisse, word gerig deur Witskrif 6 oor Spesialebehoefte-onderwys: Die Bou van 'n Inklusiewe Onderwys- en Opleidingstelsel (2001). Hierdie witskrif bepaal dat assesseringsprosesse vir leerstoornisse voorsiening sal maak en dat huidige beleid en praktyke hersien en herskryf sal word om seker te maak dat die behoeftes van alle leerders erken sal word en aandag sal kry.
|
| 2. |
Die WKOD sal die volgende aanpassings voorsien vir blinde en swaksiende leerders wat die Nasionale Senior Sertifikaat-eksamen (November) of die Senior Sertifikaat-eksamen (Mei-Junie) aflê en vir graad 9-leerders wat die GTA's skryf.:
|
| 2.1 |
Blinde leerders sal gebrailleerde vraestelle ontvang. Indien daar prente, sketse en foto's in 'n vraag voorkom, sal die vraag deur 'n ander geskikte vraag vervang word.
|
| 2.2 |
Swaksiende leerders sal 'n vraestel ontvang waar die font vergroot sal word tot Arial 16 op 'n A4-bladsy. Die sketse sal ook vergroot word en sal in 'n addendum verskyn. Die oorspronklike skets of diagram sal nog in die vraestel verskyn in sy oorspronklike grootte en posisie om die leerder te help. Die hele vraestel sal op gekleurde papier gedruk word om swaksiende leerders te help.
|
| 2.3 |
In die geval van 'n blinde of swaksiende leerder wat nie die eksamen self kan skryf nie as gevolg van 'n verdere gestremdheid, sal die WKOD 'n amanuensis voorsien om die vraestel te lees en om namens die leerder te skryf.
|
| 2.4 |
Oudiokassette sal voorsien word aan blinde asook swaksiende leerders wat addisionele hulp benodig.
|
| 3. |
Die volgende proses moet gevolg word wanneer daar om aanpassings vir blinde of swaksiende leerders aansoek gedoen word:
|
| 3.1 |
Skole moet die aangehegte statistiekvorm gebruik om aansoek te doen om 'n bepaalde aangepaste vraestel vir graad 12-eksamens asook vir die GTA's in graad 9 te bekom.
|
| 3.2 |
Die algehele aantal leerders vir wie aangepaste vraestelle per vak benodig word, moet in die toepaslike kolomme voltyds of deeltyds ingevul word. Besonderhede per kategorie van ondersteuning moet ook ingevul word.
|
| 3.3 |
In die geval waar 'n amanuensis of bandhulp benodig word, moet die kolomme vir grootdruk of Braille nie ingevul word nie want die nodige inligting is alreeds in die kolomme vir hierdie twee addisionele ondersteuningskategorieë voorsien.
|
| 3.4 |
Die statistiekvorm moet ingevul word en teen 23 Mei 2008 gestuur word aan die Direktoraat: Eksamenadministrasie vir die aandag van mev B. Calvert. Die Direktoraat: Eksamenadministrasie sal die vorms verwerk en hulle aan die Konsessiekomitee van die WKOD vir finale goedkeuring voorsien.
|
| 4. |
Die Konsessiekomitee sal skole van sy besluit verwittig en as dit goedgekeur word, sal die nodige ondersteuningsmateriaal aan skole voorsien word voor die aanvang van die eksamen(s). Normale sekuriteitsreëlings rakende die eksamen sal ook van toepassing wees op die ondersteuningsmateriaal, wat in die kluis van die skool toegesluit moet word.
|
| 5. |
Bring hierdie inligting asseblief onder die aandag van alle onderwysers by u skool.
|
SIGNED: AP CLAUSEN
HEAD: EDUCATION
DATE: 2008:05:06
|