1. U word verwys na Eksamenadministrasieminuut no. 0004/2008 van 28 Februarie 2008.
2. Dit word weer beklemtoon dat hierdie toetse verpligtend is en geskryf sal word deur leerders in die WKOD se openbare en onafhanklike skole en wel op die volgende datums:
2.1 Taaltoets: Maandag, 21 April 2008 vanaf 09:45 tot 11:00
2.2 Wiskundetoets: Woensdag, 23 April 2008 vanaf 09:45 tot 11:00
3. Waar Afrikaans die taal van leer en onderrig is, sal toetsvraestelle in Afrikaans opgestel en verskaf word. Waar Engels die taal van leer en onderrig is, sal toetsvraestelle in Engels opgestel en verskaf word, behalwe vir skole waar Xhosa die huistaal is van die meerderheid leerders. By hierdie skole neem die leerlinge die leerarea genaamd Tale: Xhosa Huistaal Hierdie skole sal taaltoetsvraestelle kry waarin Deel 1 in Xhosa opgestel is (om in Xhosa beantwoord te word) en Deel 2 in Engels opgestel is (om in Engels beantwoord te word).
4. Skynet Couriers sal die handboeke en dokumente in een besending aflewer, 'n week voor die eerste assesseringsdatum. Elke skool sal 'n houer of houers ontvang wat genoeg kopieë bevat van die verskillende toetse, antwoordblaaie, 'n toetsadministrasiehandleiding, 2 transparantskyfies vir oorhoofse projektor, teenwoordigheidsregistervorms, 'n kontrolelys (besendingsnota), rekkies en grys plastieksakke waarin die toetsboeke en antwoordblaaie teruggestuur moet word. Na ontvangs van die besending, vul asseblief die kontrolelys in en faks dit dan na 021 461 5637 of 021 461 5628.(Vir enige navrae aangaande die toetsboeke of toetsdokumente, skakel asseblief mnr C. Berry by tel. 021 461 2265.)
5. Prinsipale moet seker maak dat hulle die korrekte getal houers ontvang en dat hulle die afleweringsnota vir ontvangs van hierdie houers teken. Hierdie houers moet in die skool se kluis gestoor word en die prinsipaal is verantwoordelik vir die veilige bewaring van die sleutels. Let asseblief daarop dat, voor die toets afgeneem word, die toetsboeke (assesseringstake) nie oopgemaak mag word nie, nie verwyder mag word van die kluis nie en die vrae nie met die leerders bespreek mag word nie.
6. Ten minste 3 dae voor die afneem van die toetse moet die prinsipaal aan die onderwyser oorhandig die presiese getal antwoordblaaie wat benodig word vir die getal leerders wat die toets gaan skryf. Onder toesig van die onderwyser moet leerders dan toegelaat word om slegs bladsy 1 van die antwoordblad te voltooi, nl. die biografiese inligting. Hierdie inligting moet gekontroleer word deur die betrokke onderwyser. Gedetailleerde instruksies (met 'n voorbeeld van 'n voltooide antwoordblad) sal verskaf word in die toetsadministrasie-handleiding.
7. Elke skool sal voorsien word van 'n 3-syfer-toetssentrumnommer. Elke leerder sal ook 'n unieke eksamennommer ontvang. Leerders moet hierdie nommer op hulle antwoordblaaie skryf wanneer hulle hulle biografiese inligting voltooi. Hulle sal ook hierdie nommer op hulle toetsboeke skryf op die oggend van die toets.
8. Die oop vrae moet in die toetsboeke beantwoord word, terwyl die veelkeusevrae op die antwoordblaaie wat verskaf word, beantwoord moet word. Alle leerders moet hulle plekke inneem 30 minute voor die toets begin. Hierdie tyd moet gebruik word om die teenwoordigheidsregister te voltooi en die toetsinstruksies aan die leerders voor te lees.
9. Hierdie toetse moet onder formele eksamentoestande afgeneem word, en dieselfde reëls wat van toepassing is op die afneem van die Senior Sertifikaat-eksamen moet toegepas word, maar sonder die aanstelling van eksterne toesighouers.
10. Die onderwyser wat die toesig hou oor die toets moet seker maak dat die volgende prosedure gevolg word op die oggend van die toets.

9:00 tot 9:30: Voorbereiding vir die toets

Die onderwyser wat toesig hou moet die volgende take uitvoer in die volgorde wat hieronder aangedui word:

  1. Deel aan elke leerder die korrekte antwoordblad uit, d.w.s. die antwoordblad wat daardie leerder se biografiese besonderhede bevat wat hy of sy voor die tyd ingevul het.
  2. Deel 'n toetsboek uit aan elke leerder.
  3. Gee die leerders opdrag om die biografiese inligting wat op hulle antwoordblaaie is op die eerste bladsy van hulle toetsboek (met die opskrif "Instructions") oor te skryf.
  4. Sê aan die leerders dat hulle mag begin lees aan die toetsvrae, 15 minute voor die aanvang van die toets.

9:30 tot 11:00: Aflê van toets

Gedetailleerde instruksies word verskaf in die toetsadministrasiehandleiding, wat die besending toetsmateriaal sal vergesel.

Na die toets

Die leerders moet ophou skryf teen 11:00 en die toetsboeke en antwoordblaaie moet onmiddellik ingeneem word. Die toesighoudende onderwyser moet die volgende doen:

  • Kontroleer dat die getal toetsboeke en antwoordblaaie wat ingeneem is ooreenstem met die getal leerders wat die toets afgelê het.
  • Maak seker dat elke leerder sy of haar biografiese besonderhede korrek op die toetsboek ingevul het.
  • Maak seker dat die leerders se toetsboeke en antwoordblaaie in dieselfde volgorde gerangskik is as die name op die klasregistervorms en dat hierdie register saam met die toetsboeke en antwoordblaaie teruggestuur word.
  • Plaas elke antwoordblad binne die voorblad van die ooreenstemmende toetsboek
  • Voltooi die toetslokaal se skrifkontroleblad en stuur terug met die gebruikte toetsboeke. Sien voorbeeld in die toetsadministrasiehandleiding.
11. Die volgende is die prosedure vir die terugstuur van die toetsboeke en antwoordblaaie.
11.1 Die gebruikte toetsboeke, met die ingeslote antwoordblaaie, moet alfabeties gerangskik word en in numeriese volgorde, ooreenskomstig die klasregistervorm.
11.2 Die gebruikte toetsboeke, met hulle ge-enkodeerde antwoordblaaie, moet per klas in bondels saamgebind word met geen bondel wat meer as 50 boeke bevat nie. Die registervorm en die klasbywoningsregister moet bo-op geplaas word en heel laaste die bondel se dekblad bo-op hierdie. Sien die afdeling "Batch Covers" in die toetsadministrasiehandleiding.
11.3 Elke bondel moet in een van die grys plastieksakke geplaas word wat voorsien is en na die Direktoraat: Eksamens teruggestuur word, gemerk "vir die aandag van mnr E van Breda".
11.4 Alle ongebruikte en bedorwe toetsboeke en antwoordblaaie moet afsonderlik gebondel word en onder 'n afsonderlike omslag teruggestuur word.
11.5 Die koerier is geskeduleer om die bondels toetsboeke en antwoordblaaie te kom afhaal binne twee dae na die laaste toets afgelê is. Indien die bondels vir die twee toetse teen Vrydag, 25 April 2008 nog nie afgehaal is nie, moet die Direktoraat onmiddellik ingelig word by telefoon 021 467 2960/1.
12. Let asseblief daarop dat intensiewe monitering van die afneem van hierdie toetse sal plaasvind. Dit sal insluit onaangekondigde besoeke aan skole deur amptenare van die nasionale departement, kringbestuurders en beamptes van die Direktoraat: Kurrikulum AOO, om te verseker dat alle prosedures nougeset uitgevoer word.
13. Let asseblief daarop dat hierdie toetse nie deel uitmaak van die bevorderingspunt vir graad 9-leerders nie. Verder word daar nie van leerders verwag om spesifieke inhoud vir die toetse voor te berei nie, aangesien vaardighede en begrip van konsepte getoets sal word op 'n vlak wat toepaslik is vir graad 9.
14. Daar sal nie van onderwysers verwag word om leerders se antwoorde na te sien nie. Die toetsboeke en antwoordblaaie sal na die Universiteit van Kaapstad gestuur word, waar die nasien en saamstel van die resultate gedoen sal word. Elke skool sal sy eie resultate ontvang, saam met 'n gedetailleerde ontleding van hoe die skool presteer het. Elke leerder sal 'n sertifikaat ontvang en dus is dit noodsaaklik dat u seker maak, tydens registrasie, dat die spel van name, die name self en die toetsvlakke korrek aangeteken is.
15. Prinsipale en onderwysers word versoek om seker te maak dat toetse geskryf is op die geskeduleerde datums op die tye wat gespesifiseer is en dat die teenwoordigheidsregisters geteken word.


GETEKEN: CD BIRTLES
HOOF: ONDERWYS
DATUM: 2008:04:11