Die DvO stuur tans die volgende dokumente direk aan skole in die Wes-Kaap:

• Staatskoerant, 14 Maart 2008, no 30880: Grondslae-vir-leer-veldtog 2008 - 2011
• Grondslae-vir-leer, Assesseringsraamwerk: Intermediêre Fase
• Grondslae-vir-leer, Assesseringsraamwerk: Grondslagfase
• Nasionale Leesstrategiedokument

Die veldtog gee duidelike riglyne aan Grondslag- en Intermediêre Fase-onderwysers oor hoe om hulle leerders se Geletterdheids-/Taalvlakke en Gesyferdheids-/Wiskundige vlakke te verbeter. Die doel hiervan is om die slaagkoers van leerders in Geletterdheid en Gesyferdheid teen 2011 tot ten minste 50% vir hulle graad op te skuif. Die veldtog doen dit deur middel van die volgende:

• Mikpunte word gestel vir elke kwartaal per graad in hierdie twee leerprogramme/leerareas
• 'n Skema van moontlike lessegmente en die hoeveelheid tyd wat aan elkeen spandeer behoort te word, bv. hoofrekene - 10 minute
• Die kennis en vaardighede wat deur elke formele assesseringstaak gedek behoort te word, word genoem, met 'n voorstel van 'n assesseringsinstrument.

Die veldtog sal op 1 November 2008 van stapel gestuur word deur die WKOD. Uitnodigings is aan alle primêre skole in die provinsie gerig. Die doel van die bekendstelling is om die hoofboodskap van die veldtog oor te dra en uit te brei op die rolle en verantwoordelikhede van die onderskeie deelnemers.

Die WKOD ontwikkel tans 'n gedetailleerde werkskema en onderwysersgids vir elke leerprogram in die Grondslagfase en vir elke leerarea in die Intermediêre Fase om onderwysers binne die raamwerk van die Veldtog te ondersteun. Die werkskemas sal onder skole versprei word teen Januarie 2009 en word gerugsteun deur die Grondslag-vir-leer-dokumente. Elektroniese weergawes sal laat in November 2008 beskikbaar wees by http://curriculum.pgwc.gov.za.

Die WKOD gaan 'n proses van sistemiese opleiding implementeer in Geletterdheid/Tale en Gesyferdheid/Wiskunde vir alle graad 1 - 6-onderwysers by alle openbare skole. Die eerste fase van die opleiding in 2009/10 sal 250 skole betrek. Onderwysers van 125 gekeurde skole sal opgelei en ondersteun word oor die tweejaarperiode in Geletterdheid-/Taalinhoud en metodologie. 'n Verdere 125 gekeurde skole sal opgelei en ondersteun word met Gesyferdheids-/Wiskunde-inhoud en metodologie. Verdere fases van hierdie opleiding sal vanaf 2010 aan al die ander primêre skole verskaf word.

Om die implementering van die Veldtog te ondersteun, sal die WKOD die volgende LOOM aan alle openbare primêre skole verskaf:

• Leesskemas vir graad 1 - 6 aan al 125 skole wat gekies is vir die Geletterdheids-/Taalonderwyseropleiding. Skole sal die leesskemas ontvang in die jaar waarin hulle onderwysers in Geletterdheids-/Taalmetodologie opgelei is.
• Muurkaarte vir graad 4 - 6. Elke skool sal altesaam 60 muurkaarte ontvang, nl. vier muurkaarte per graad vir Wiskunde en Tale en twee per graad vir die ander ses leerareas.
• Aanvullende Hoofrekeneblaaiboeke vir graad 1 - 6, d.w.s. ekstra kopieë sal na skole gestuur word wat meer klasse per graad in 2008 in vergelyking met 2005 het of wie se TLO verander het. Nuwe skole wat nie die blaaiboeke in 2005 ontvang het nie, sal die volle komplement vir al hulle klasse ontvang.

Nasionale assessering is beplan vir alle graad 1 - 6-leerders in die taal van leer en onderrig (TLO) en Gesyferdheid/Geletterdheid. Distrikte sal die assesserings aan skole stuur. Verdere inligting oor die assesseringsproses sal binnekort aan skole gekommunikeer word.