1. Die LOK-simposium trek in 2009 'n splinternuwe baadjie aan! Sake in die LOK-kamp het aansienlik verander (en verbeter) nadat daar op 16 September 2008 met die SBA (Stigting vir Bemagtiging deur Afrikaans) as hoofborg vir 2009 'n vennootskap gesluit is. Dit is dus met groot vreugde dat die Letterkundeondersteuningskomitee (LOK) hiermee alle onderwysers wat Afrikaans vir graad 12-leerders onderrig, uitnooi na die 2009-simposium wat op Vrydag 20 Februarie 2009 van 12:30 tot 17:45 en op Saterdag 21 Februarie 2009 van 9:00 tot 13:00, by die Universiteit van Wes-Kaapland aangebied word.
2. Die hoofdoel van die simposium is om letterkundeonderrig te ondersteun, maar daar sal ook op ander dissiplines soos praat en skryf gefokus word. Filmstudie sal by die 2009-simposium spesiale aandag geniet met die welbekende Leon van Nierop as aanbieder. Die voorlopige simposiumprogram is reeds op die VOO-Afrikaanswebtuiste (http://curriculum.pgwc.gov.za) beskikbaar en sal teen 02 Februarie 2009 met die finale program vervang word.
3. Die registrasiegeld vir die 2009-simposium is R50,00 per persoon en belangstellendes kan hierdie bedrag in die SBA se ABSA-tjekrekening deponeer. Die rekeningnommer is 550145847, takkode 506009. Tjeks moet uitgemaak word aan Stigting vir Afrikaans. Die SBA sal voortaan die administrasie en logistieke reëlings van die LOK-simposium hanteer.
4. Voornemende deelnemers moet meegaande registrasievorm (BYLAE A) invul en dit teen nie later nie as 3 Desember 2008 saam met die betalingsbewys aan me. Christine Francke van die SBA by 021 481 8332 faks. Geen laat inskrywings sal aanvaar word nie. (Die SBA se telefoonnommer is 021 481 8304.)
5. Ingeslote is ook 'n bestelvorm (BYLAE B) vir LOK-ondersteuningsgidse wat deur onderwysers ingevul en vir die aandag van Christine Francke by bogenoemde nommer gefaks moet word. Die gidse sal slegs in e-formaat beskikbaar wees. 'n Brosjure met uittreksels uit die gidse sal in Januarie 2009 aan skole versprei word.
6. Die LOK-ondersteuningsgidse word aanvullend tot die inligting wat reeds in die voorgeskrewe boeke beskikbaar is, geskryf en fokus op die praktiese implementering van die NKV in die klaskamer. 'n Onderwyser-, sowel as 'n leerdergids per voorgeskrewe graad 12-boek vir al drie die taalvlakke (HT, EAT en TAT) word ontwikkel. 'n Kompakskyf (CD) vir elke boek, wat die onderwyser- en leerdergids bevat, sal beskikbaar wees en kan teen R50 per CD bestel word. Die bestelvorm moet saam met die registrasievorm teen nie later nie as 03 Desember 2008 aan Christine Francke gefaks word.
7. Om te verseker dat die reëlings vir die LOK-simposium van 2009 glad verloop, word onderwysers vriendelik versoek om asseblief die sperdatums na te kom.
8. Bring asseblief die inhoud van hierdie minuut onder die aandag van alle betrokkenes.


GETEKEN: SM NAICKER
HOOF: ONDERWYS
DATUM: 2008:11:14

Bylae A: Registrasievorm  (grootte: 18 KB)
Bylae B: Bestelvorm  (grootte: 23 KB)