1. Die Departement van Ekonomiese Ontwikkeling en Toerisme in die Wes-Kaap het 'n handleiding ontwikkel om graad 10- tot 12-leerders te help wanneer hulle aan die einde van die Verdere-onderwys-en-opleidingsband (VOO) 'n loopbaan in toerisme wil kies.
2. Die gids sal graad 10- tot 12-leerders van inligting aangaande verskeie loopbane in die toerismebedryf voorsien en beoog om jongmense te ondersteun in hulle besluite aangaande studiemoontlikhede na graad 12.
3. Die loopbaanhandleiding sal 24 loopbane in toerisme verder toelig, wat in samewerking met THETA, die owerheid vir toerismevaardighede, gekies is. Die loopbane wat toegelig word, vereis vaardighede wat die meeste in aanvraag in die toerismebedryf is.
4. Elke inrigting wat Toerisme as VOO-vak aanbied, sal 200 afskrifte van die boekie ontvang, wat onder die graad 10- tot 12-leerders versprei moet word.
5. Die boekie sal van 1 Junie 2008 afgelewer word en moet deur die Toerisme-opvoeder by elke inrigting uitgedeel word.
6. Prinsipale word versoek om die inhoud van hierdie minuut onder die aandag van al die Toerisme-opvoeders te bring.


GETEKEN: P SATYO
HOOF: ONDERWYS
DATUM: 2008:05:16