1. Die Geografiese Inligtingstelsels- (GIS-) bewustheidsweekuitstalling 2008 is ‘n gesamentlike inisiatief van die Geografiese Inligtingstelselvereniging van Suid-Afrika (GISSA) in die Wes-Kaap en die Wes-Kaap Onderwysdepartement (WKOD).
2. Die GIS-bewustheidsweekuitstalling 2008 sal plaasvind vanaf 6 tot 9 Mei 2008 en sal die gebruik van tegnologie in die Geografie-klas beklemtoon, en opleidings- en ontwikkelingshulpbronne en -dienste in die Wes-Kaap toelig.
3. Hierdie vyfde jaar van die GIS-bewustheidsweekuitstalling beloof om selfs groter en meer innoverend as vantevore te wees. Verskeie opwindende temas en geleenthede om huidige uitdagings en ontwikkelings in die Geografie-klas te ondersoek, sal aangebied word.
4. Volledige programbesonderhede kan op die WKOD se Kurrikulumwebtuiste (http://curriculum.pgwc.gov.za/) en die Geografiewebtuiste (VOO) (http://curriculum.pgwc.gov.za/site/39/page/view/) verkry word. Plakkate sal onder skole versprei word wat besonderhede van al die gebeure sal verskaf. Daarbenewens sal die media artikels en advertensies publiseer wat op die GIS-bewustheidsweek van toepassing is.
5. Die GIS-bewustheidsweekuitstalling 2008 sal saamval met 'n minikonferensie wat sal handel oor onderwerpe wat verband hou met die nuwe VOO-NKV Geografie-kurrikulum.
6. Die uitstalling sal by die kampus van die Universiteit van Wes-Kaapland in Modderdamweg, Bellville gehou word en sal ‘n program van seminare en ander aktiwiteite insluit. Hoewel sessies gedurende die bewustheidsweek van groot belang vir leerders sal wees, word skole ook aangemoedig om opvoeders uit te nooi om die week by te woon sodat hulle in ‘n posisie sal wees om onderrigmetodiek te verbeter en betekenisvolle insette te lewer met betrekking tot leerders se studie- en loopbaankeuses.
6.1 Uitstallers sal toegang tot inligting voorsien oor alle aspekte van GIS-onderrig en -leer, opleiding en ontwikkeling, deur die nuutste kursusse, kursusmateriaal, opvoedkundige sagteware, leer- en onderrigondersteuningsmateriaal, -tegnieke en -metodieke uit te stal.
6.2 Die deelname van opvoeders, afrigters, vaardigheidsontwikkelingspraktisyns en -fasiliteerders aan die program sal verseker dat hulle aan nasionale en internasionale strominge vir opvoeders en leerders vanuit alle sektore en vlakke van leer blootgestel word. Die program sal ook ‘n strategiese platform voorsien vir netwerkvorming, vennootskappe en die heersende debat.
6.3 Die GIS-bewustheidsweekprogram sal klem lê op Geografie-onderwys en -opleiding. Skole wat dit oorweeg om hulle verskeidenheid van vakaanbiedings te verander sal ook baat by ‘n besoek aan die uitstalling, omdat hulle aan ‘n volledige reeks leermoontlikhede blootgestel sal word. Skole sal self vervoer moet reël vir leerders wat dit wil bywoon.
7. Die Vrydagprogram is spesifiek gemik op Geografie-onderwysers vir graad 9 tot 12, insluitende dié uit plattelandse gebiede. Praktisyns van verskillende sektore sal vanaf 14:00 tot 16:00 op 9 Mei 2008 referate oor GIS-onderwerpe lewer. Kontak Devona Naude by tel. 021-807 4657 of e-pos Devona.Naude@drakenstein.gov.za voor 30 April 2008 met bywoningsyfers vir sitplekke en spyseniering.
8. Alle WKOD-inrigtings word aangemoedig om die GIS-bewustheidsweekuitstalling te ondersteun.


GETEKEN: CR SMITH
HOOF: ONDERWYS
DATUM: 2008:04:23