1. Luxanduva lweSebe leMfundo leNtshona Koloni ukubonelela ngemfundo esemgangathweni nokuphucula ulwazi lokubala. Iveki ye-3 - 8 Septemba 2007 ibhiyozelwa njengeVeki yeMathematika kuzwelonke. Ngenxa yesi sizathu ziyakhuthazwa izikolo ukuba zicwangcise izinto (activities) zokubhiyozela iVeki yeMathematika. Ngaloo veki isigaba ngasinye okanye ibakala ngalinye linganoSuku lweMathematika lwalo lenze izinto ezahlukeneyo.
2. Izikolo zaseprayimari

Izinto ezinokulungiselelwa uSuku loLwazi lokuBala okanye lweMathematika:

  • Yibanenjikalanga yemidlalo yeMathematika: Sebenzisa imidlalo enjengetshesi (chess), iidrafti, u-snakes and ladders, i-Chinese checkers, ubhingo, umlabalaba, umonopholi, amakhadi okudlala abandakanya ukudityaniswa kwamanani, umdlalo wamadayisi obala ngokuphinda-phinda ka-4, umdlalo wedayisi nomzobo kaqongqothwane (beetle drives), umdlalo wokuqashisela okanye nayiphi imidlalo ebandakanya imathematika.

  • Sebenzisa i-AMESA Challenge: I-Association for Mathematics Education of South Africa (AMESA) icela umngeni kubafundi bamaBakala 4 - 7 ngeMathematics Challenge. Iinkcukacha ezipheleleyo ze-AMESA Challenge, ezibandakanya amaphepha exesha elidlulileyo, ziyafumaneka kule dilesi yewebhu http://www.amesa.org.za/Challenge Ukufumana ingcaciso ngale Challenge, kucelwa uqhagamshelane nomququzeleli, uAlwyn Olivier, kule dilesi ye-imeyili aio@sun.ac.za. ISebe leMfundo leNtshona Koloni liya kuthumela ikopi (master copy) yephepha le-AMESA Challenge 2007 kuzo zonke izikolo zaseprayimari ekuqaleni kwekota yesithathu. I-CD yamaphepha adlulileyo e-AMESA Challenge iyafumaneka ngoku-odolwa kwa-Edumedia nge-R12 + neendleko zokuposa kule nombolo yefoni 021 689 9536 okanye kule nombolo yefeksi 021 685 7421 okanye kule dilesi ye-imeyili edumedia@pgwc.gov.za

  • Yenza ukhuphiswano lwesudoku: Abafundi bangathatha inxaxheba bengamaqela eeklasi okanye esikolo akhuphisanayo (school houses).

  • Lungiselela ukhuphiswano lwemifuziselo yezakhiwo okanye umboniso weThekhinoloji/weMathematika: Abafundi bachitha usuku besenza imifuziselo yezakhiwo edizayinwe ngabo okanye kungaboniswa imifuziselo neeprojekthi eziveliswa eklasini (umz. ngethuba lezifundo zeThekhinoloji).

  • Yenza ikhwizi zeMathematika: Abafundi bangathatha inxaxheba kwiikhwizi zemathematika yezibalo zentloko okanye kumngeni wokusombulula amaqhina (problem-solving challenge).

  • Sebenzisa amaqhina onwabisayo emathematika aseklasini: Izikwere ezingummangaliso, njl. njl. Iincwadi ezinokukunceda ngeembono zingabolekwa kwa-EDULIS. Ifoni 021 957 9618 okanye idilesi ye-imeyili edulis@pgwc.gov.za.

  • Lungiselela imiboniso eselayibrari: Imiboniso eyenzelwa elayibrari ecacisa iifomyula zemathematika, izinto ezivelisiweyo (inventions), njl. njl.

  • Khuthaza usetyenziso lwelayibrari: Abafundi bangasebenzisa ilayibrari ukwenza uphando okanye baphande ngezihloko ezinikwe ngutitshala, umz. imibuzo esekelwe kwi-aljebra yamaRoma, kwi-aljebra yamaJiphethe, iPhayithagorasi (Pythagoras), iPhaskhali (Pascal), iFibhonatshi (Fibonacci) okanye ngubani owenza ntoni ngosuku oluthile kwimbali yemathematika (abafundi bangenza uludwe olubonisa amaxesha eziganeko eziyimbali (time-line).

  • Zingelani ubutyebi nisebenzise imephu baze bahlanganyele ukufuna ubutyebi: Kunganikwa izinto ezinika umkhondo (clues) wesisombululo seqhina lemathematika.

  • Mema abazali beze kusuku lokonwabela imathematika: Izinto ezenziwayo zingabandakanya ukudlala amakhasi, iidathi, oothinti abadlalwa ngokunika amanqaku (skittles), itshesi (chess), umdlalo weentsinjana zekhoyithi ezijulwayo (deck quoits) nokujula iiringi phezu koothinti abanonjolweyo (numbered skittles) neephazile ezifuna kucingwe nzulu.
3. Izikolo eziphakamileyo

Izinto ezinokulungiselelwa uSuku lweMathematika:

  • Lungiselela injikalanga okanye ungcwalazi lokonwabela imathematika lwabafundi, ootitshala nabazali: Abafundi ootitshala nabazali bangathatha inxaxheba kwizinto zenjikalanga yokonwabela imathematika. Abazali bangacelwa ukuba baxelele abafundi ukuba bayisebenzisa njani imathematika kumsebenzi wabo wemihla ngemihla.

  • Yenza imidlalo okanye iikhwizi: Ootitshala bangasebenzisa isifundo esinye badlale nabafundi imidlalo enjenge-Maths 24, sudoku, njl. njl. Oku kungaya kufikelela kuvuthondaba lwenjikalanga yokonwabela imathematika apho abafundi abaye bazibalula ngezinto abazenzileyo bangavuzwa ngamabhaso.

  • Lungiselela imiboniso yeephowusta zemathematika kunye neeprojekthi ezibonisa imbali yemathematika okanye ukusetyenziswa kwemathematika kwimisebenzi eyenziwayo nji. njl.

  • Thatha inxaxheba kwizinto ezenziwa ngethuba le-AMESA Mathematics Week.
4. Ukukhuthazwa kwemathematika ngokonwabisayo kuya kunceda ekukhuthazeni abafundi bathathe inxaxheba kwimisebenzi ebandakanya nekhulisa ingqiqo.
5. Ziyacelwa izikolo ezakhe zanoSuku lweMathematika olwabayimpumelelo ukuba zisixelele ngalo. Kungaposelwa inkcazo emfutshane, eneefoto, ukuba zikhona, kuNks L. Malan kule dilesi, Room 803, WCED, Private Bag X9114, Cape Town, 8000, okanye ithunyelwe kuye nge-imeyili apha lymalan@pgwc.gov.za okanye ithunyelwe kumcebisi ngezekharityhulam yeMathematika we-EMDC yakho. Ibali lakho lempumelelo liya kufakwa kweli ziko lewebhu leMathematika le-GET http//:www.curriculum.pgwc.gov.za
6. Ziyakhuthazwa iinqununu ukuba zibandakanye iVeki yeMathematika kwizicwangciso zazo zonyaka.


ISAYINWE: NGU-M.J. CAMERON
INTLOKO: YESEBE LEMFUNDO
UMHLA: 2007:06:28