ISebe leMfundo leNtshona Koloni lenze isicwangciso esibanzi sokusombulula iingxaki zokufunda nokubhala (literacy) nezolwazi lokubala (numeracy) kwizikolo ezikwiphondo leNtshona Koloni. Uphando olwenziweyo ukulungiselela isiCwangciso sokuFunda nokuBhala kunye noLwazi lokuBala (Literacy and Numeracy Strategy) lubonisa ukuba ukunqongophala kwezinto zokufunda kunye neeklasi ezinkulu kunika ezona ngxaki zinkulu kootitshala. Uphando lukwabonisa ukuba ootitshala abakufundisi ukufunda, amazinga olwazi lokufunda nokubhala ayehla xa kuthelekiswa namazinga omsebenzi olindelekileyo phakathi kweBakala 3 neBakala 6.

I-Masifunde Maqela Reading Project yimpendulo kule mingeni. Le projekthi inika ootitshala bamaBakala 4 - 7 isethi yezinto zokufunda. Izikolo zikarhulumente ezingaphantsi kwenqanaba 4 lohlelo ngokwentlupheko kwiphondo (in the lower 4 provincial quintiles) zibonelelwa ngesethi enye yeencwadi kwiklasi nganye, ngelixa isethi nganye eyisampula iya kuthunyelwa kwizikolo ezikwinqanaba 5 lohlelo ngokwentlupheko. Le Projekthi ikwacebisa indlela ethile yokufundiswa kokufunda; ivumela abafundi basebenze bengamaqela amancinane asebenzisanayo (small co-operative groups) kwiklasi enkulu, bafunde iincwadi kwinqanaba elifanelekileyo nokuba bazisebenzise njani ezo zinto zokufunda bazifundayo.

Makusetyenziswe iindlela ngeendlela ezahlukeneyo ekufundiseni ukufunda. Ezi ndlela zibandakanya izandi zamagama (phonics), ukufunda amagama ngokuwajonga (sight word), ukufundwa kolwimi (linguistic) ukufundiswa kolwimi ngokupheleleyo kunye nokusetyenziswa kolwimi kwiimeko zemihla ngemihla (language experience). Nakuba kunjalo, ngenxa yamanqanaba okufunda ahluka-hlukeneyo nomba wokuba uninzi lootitshala besiGaba esiPhakathi abazange bafumane kuqeqeshwa ekufundiseni ukufunda kwaye kufuneka bafundise abafundi abangakwaziyo ukufunda kuloo mabakala, kuza kuqaliswa isicwangciso songenelelo ngoncedo sokufunda ngendlela elandela isikhokelo (guided reading). Iklasi kunye nemeko nganye yahlukile, ngoko ke le asiyonkqubo emisela imiqathango emayilandelwe - sisikhokelo sokuqinisekisa ukuba izinto zokufunda zisetyenziswa ngendlela eyiyo ngethuba leSiqingatha seYure yokuFunda nokuBhala (Literacy Half-hour).

Inkxaso yootitshala ukuze bakwazi ukujongana nomngeni wokufundisa ukufunda:

Kwikota yokuqala kuza kufundiswa ootitshala ngesicwangciso sokufundisa ukufunda ngendlela elandela isikhokelo kwisikolo ngasinye kwiseshoni yoqeqesho yeeyure ezi-3 emva kwemini. Imizi yopapasho-ncwadi eza kwenza lo msebenzi iya kuqhagamshelana nezikolo ukulungiselela ezi seshoni.

Sekulungiswe incwadana yoqeqesho (training manual) kunye ne-DVD ukuxhasa ootitshala abangaba abazange bafumane qeqesho ekufundiseni ukufunda. Zombini, incwadana yoqeqesho (training mamual) kunye ne-DVD, zinika isikhokelo esicace gca senyathelo ngalinye lokukhokela ukufunda eklasini.

Abasebenzi abanika inkxaso yemfundo yeemfuno ezizodwa ezikolweni kunye namagosa ekharityhulam bafumana uqeqesho kwi-WCED ukuxhasa izikolo zikwazi ukuqalisa zize ziqhubele phambili iprogram yokufunda ngendlela elandela isikhokelo.

Ootitshala besiGaba sesiSeko basenokucelwa nabo ukuba banike inkxaso ekufundiseni ukufunda.

Ziyacelwa iinqununu ukuba ziziqhelanise nezinto zokufunda nezoqeqesho lweMasifunde Maqela Reading Project. Ukuthatha inxaxheba ngomdla omkhulu kwenqununu kwiseshoni yoqeqesho yasemva kwemini kuya kunika isikhokelo nenkxaso ekuhlangabezeni imingeni yokufunda nasekunyuseni amazinga olwazi lokufunda nokubhala. Ubunkokeli benqununu yeyona nto ebaluleke gqitha ekuphuculeni ulwazi lokufunda nokubhala kunye nolwazi lokubala.