1. Dit is, in ooreenstemming met die ontwikkelingsbenadering van die GGBS, vir elke skool verpligtend om 'n skoolverbeteringsplan (SVB) te hê. Die begrip "skoolverbeteringsplan" vervang die begrip "skoolontwikkelingsplan" (SOP). Die redes vir die verandering is die volgende:
  • Kollektiewe Ooreenkoms 8 van 2003 gebruik die begrip "skoolverbeteringsplan". Dit word dus dwarsdeur die land so gebruik.
  • In teenstelling met die SOP, wat van skool tot skool kon verskil met betrekking tot fokus en formaat, is die SVB gegrond op die Nege Fokusareas van heelskoolevaluering (HSE) en die opleidingsbehoeftes van die skool se personeel.
2. Die WKOD sal die SVB's van alle skole op EdInfo Search plaas. Dit sal distriks- en Hoofkantoorpersoneel in staat stel om voor 'n besoek aan 'n skool, hulself te vergewis van die skool se oogmerke en die opleidings- en ondersteuningsbehoeftes. Dit sal ook 'n gekoördineerde benadering binne die WKOD fasiliteer wanneer skole se behoeftes hanteer word. Die vooruitgang wat skole gemaak het met betrekking tot hulle aktiwiteite en teikens sal ook in die SVP's op EduInfo Search gerapporteer word.
3. Die meeste skole het reeds 'n SVP vir 2007. Aangesien alle prinsipale onlangs opleiding ontvang het in skoolselfevaluering (SSE) en die nuwe formaat van die SVP, word skole versoek om hulle nuwe SVP vir 2008 in die nuwe formaat op te stel. Die fokusareas wat nie in die SOP gedek is nie, moet ook aandag kry. Teikens, bv. geletterdheids- en gesyferdheidsteikens, moet in die SVP ingesluit word.
4. Gedurende die SSE is dit noodsaaklik dat skole akkuraat reageer op die kriterionvrae oor die Nege Fokusareas, sodat die SVP's die behoeftes van skole identifiseer en daardeur 'n duidelike aanduiding aan die WKOD gee watter behoeftes aandag moet geniet. Die aangehegte profielvorm vir die SVP moet deur alle skole gebruik word.
5. Die sperdatum vir alle SVP's vir 2008 is 28 November 2007. Die Direktoraat: Gehalteversekering sal vordering monitor en vrae vanaf Julie tot Oktober 2007 beantwoord.


GETEKEN: L.J. ROSE
HOOF: ONDERWYS
DATUM: 2007:06:06

Skoolverbeteringsplan  (grootte: 6 KB)
Ontwikkelingsbehoeftes van opvoeders  (grootte: 25 KB)