1. Omsendbrief 49/2006 van 6 Oktober 2006 het bepaal dat skole 60% van hul norme-en-standaardetoekennings op handboeke en 16% op plaaslike aankope moet bestee .
2. Alle skole moet daarop let dat elke leerder 'n handboek moet hê vir elke leerarea of vak.
3. Artikel 21-skole ontvang hul norme-en-standaardetoekenning vir die 2007/08 finansiële jaar in twee paaiemente, 60% in April en 40% in November. Met die eerste oordragbetaling, wat gedurende April 2007 gemaak is, moes leer-en-onderrigondersteuningsmateriaal (LOOM) aangekoop word sodat dit voor die einde van September 2007 beskikbaar kon wees.
4. Die totale bedrae toegeken vir handboeke en plaaslike aankope vir alle nie-artikel 21-skole beloop volgens die skolebegrotings (WKOD 032) onderskeidelik R63,64 miljoen en R32,18 miljoen. By kontrolering is daar bevind dat daar tot 12 November 2007 slegs R48,94 miljoen aan handboeke en R26,09 miljoen aan plaaslike aankope bestee is.
5. Die Wes-Kaap Onderwysdepartement moet deurlopend verslag doen aan die nasionale Departement van Onderwys oor die aanwending van die totale begrote bedrag vir LOOM. Dit is dus noodsaaklik dat nie-artikel 21 skole wel die bedrae wat volgens WKOD 032 vir die aankoop van LOOM begroot is, nie later nie as 30 November 2007 bestee. Hierdie skole kan die nuutste balanse vir handboeke en plaaslike aankope by die bestelkantoor te Kuilsrivier vasstel. Die rekwisisies (WKOD 034 en 026) moet dus nie later nie as 30 November 2007 by die bestelkantoor te Kuilsrivier ingedien word.
6. U samewerking in hierdie verband word waardeer.


GETEKEN: A. LEWIS
HOOF: ONDERWYS
DATUM: 2007:11:20