1. Die WKOD is tans besig om kursusmateriaal saam te stel vir die Sertifikaat in Skoolsakebestuur (SSSB) op NKR Vlak 4 vir administratiewe personeel by skole. Dit word in die vooruitsig gestel dat 'n loodskursus vir SSSB in Februarie of Maart 2008 'n aanvang gaan neem met 'n inname van 150 kandidate. Die loodskursus sal aangebied word deur die VOO-kolleges in die metropoolgebied. Die kursus sal befonds word deur die WKOD.
2. Hierdie kursus is bedoel om die Menslikekapitaal-ontwikkelingstrategie van die Wes-Kaap te ondersteun. Dit het ten doel die verdere bekwaammaking van administratiewe personeel om geleenthede vir bevordering op skool, by die Hoofkantoor, die distrikskantore (OBOS'e), ander departemente en die privaat sektor te verwerklik. Die doelwit van die SSSB-kwalifikasie is om kandidate toe te rus met vaardighede, kennis en kundigheid wat nodig is om die skool se aktiwiteite en hulpbronne effektief en doeltreffend te bestuur. Daar is ook 'n behoefte aan verdere opleiding van administratiewe personeel om die moontlikheid uit te skakel van wanadministrasie van skoolgeld en fondse as gevolg van 'n gebrek aan die nodige vaardighede.
3. Die sertifikaatkursus het 'n inskrywingvlak van graad 12 (Senior Sertifikaat) en sal net in Engels aangebied word (wat die fasiliteringsessies sowel as die leermateriaal betref). Huidige werknemers sal geassesseer word volgens hulle bestaande kwalifikasies en vorige leerervaring. Die kursus sal die teikenkandidate verder oplei en/ of nuut oplei. Hierdie is 'n jaarkursus, wat daarop ingestel is om generiese bevoegdheid in leierskap, bestuur en administrasie te bou, terwyl daar terselfdertyd funksionele bevoegdheid ontwikkel word op die volgende gebiede:
 3.1Finansiële Bestuur
 3.2Menslikehulpbronbestuur
 3.3Risikobestuur
 3.4Fasiliteitebestuur
 3.5Kantoorstelsels, -administrasie en -bestuur
 3.6Bestuur van Inligtingkommunikasietegnologieë (IKT)

4. Die opleiding sal bestaan uit ongeveer 2 weke van aangesig tot aangesig by die kollege met 'n tussenpose van ongeveer 3 weke van selfstandige studie teen eie pas per module. Die loodskursus sal by die onderstaande drie VOO-kolleges aangebied word:
 4.1Kaapstad Kollege, Crawford-kampus
 4.2Valsbaai Kollege, Goeie Hoop-kampus, Khayelitsha
 4.3Northlink Kollege, Parow-kampus

5. Aansoeke om vir hierdie loodskursus in te skryf, word ingewag van kandidate wat graad 12 (Senior Sertifikaat) geslaag het, oor deeglike vaardighede in finansiële en kantoorbestuur beskik, rekenaargeletterd is en bedrewe is in Engels. Dit word van kandidate verwag om daagliks die kolleges by te woon wanneer die fasiliteringsessies (kontak van aangesig tot aangesig) aan die gang is. Die WKOD sal nie akkommodasie verskaf aan kandidate wat die loodskursus volg nie. Om hierdie rede, sal die kandidate van die loodskursus gekeur word uit die geledere van die metropooldistrikte en diegene van landelike distrikte wat daagliks na die lokale sal kan reis vir die fasiliteringsessies.
6. Daar is slegs 150 plekke beskikbaar vir die loodskursus. Administratiewe personeel wat beantwoord aan die profiel wat in paragraaf 5 beskryf is, word versoek om so gou moontlik aansoek te doen deur die aangehegte aansoekvorm na die Skoolvlakbestuursafdeling van hulle distrikskantoor te faks. Aansoeke sluit teen 12:00 op 4 Desember 2007. Die distrikskantoor sal verantwoordelik wees vir die keuringsproses. 'n Applikant wat teen 18 Januarie 2008 nog nie 'n antwoord ontvang het op die aansoek nie, kan aanneem dat sy/haar aansoek nie suksesvol was nie. Let asseblief daarop dat onvolledige aansoeke nie oorweeg sal word nie en dat geen korrespondensie oor laat en/of ontbrekende inligting gevoer sal word nie.
7. Vir verdere inligting kan u die Skoolvlakbestuursafdeling van u distrikskantoor raadpleeg. Prinsipale word vriendelik versoek om die inhoud van hierdie minuut onder die aandag van alle betrokke partye te bring.


GETEKEN: TS SHAYI
HOOF: ONDERWYS
DATUM: 2007:11:19

Aansoek:  Loodskursus: Sertifikaat in Skoolsakebestuur (SSSB)  (grootte: 16 KB)