1. Die Direktoraat: Arbeidsverhoudinge het met ontsteltenis opgelet dat, volgens die jongste statistiek oor gerapporteerde gevalle, daar nie gehou word by die tydraamwerk ten opsigte van die opslossing van griewe nie. Dit het dus nodig geword om die Departement se beleid hieroor duidelik weer te gee en om aan die hoofde van inrigtings opdrag te gee om hierdie beleid bekend te stel aan alle werknemers wat met griewe te doen het.
2. Hoofstuk H van die Personeeladministrasiemaatreëls (PAM), soos vervat in die Wet op die Indiensneming van Opvoeders, (Wet 76 van 1998), maak voorsiening vir onvergenoegde opvoeders om 'n grief aanhangig te maak. Sien asseblief ook Omsendbrief 0230 van 2003 vir griewe wat deur staatsdienspersoneel gelug is.
3. Ingevolge hierdie bepalings, mag 'n werknemer 'n grief aanhangig maak by sy of haar toesighouer, wat dan binne drie werksdae met die gegriefde oorleg moet pleeg. Die toesighouer moet dan die uitkoms van enige aksies of ondersoeke wat uit die vergadering voortgevloei het, binne vyf werksdae na sodanige vergadering aan die gegriefde oordra.
4. Terwyl die Direktoraat: Arbeidsverhoudinge begryp dat dit dikwels moeilik is om by hierdie tydraamwerke te hou, is dit van die uiterste belang dat griewe behandel word so gou as moontlik nadat hulle ontvang is. Dit is verder ook van kardinale belang dat 'n egte, gesamentlike en daadwerklike poging aangewend word om sodanige grief op te los.
5. Versuim om met sodanige griewe te handel in die voorgeskrewe tydraamwerke, of om 'n daadwerklike poging aan te wend om die gegriefdheid op te los, kan daarop uitloop dat die Wes-Kaapse Onderwysdepartement aanspreeklik gehou word vir uitgawes ten opsigte van arbitrasieverrigtinge indien dit bevind word dat die grief opgelos kon gewees het voordat dit tot 'n dispuut ontwikkel het.
6. Alle hoofde en toesighouers word dus versoek om te hou by die voorgeskrewe tydraamwerke en te probeer om griewe so spoedig as moontlik op te los.
7. Die inhoud van hierdie minuut moet onder die aandag van alle personeel gebring word, wat moet teken dat hulle dit verstaan. Die rekord van hierdie erkenning moet op lęer gehou word by die skool vir toekomstige verwysingsdoeleindes.


GETEKEN: E. KIRSTEN
HOOF: ONDERWYS
DATUM: 2007:10:01