1. PROSEDURE OM TE VOLG MET KLAGTES EN KOMMENTAAR AANGAANDE VRAESTELLE
1.1 Let asseblief daarop dat alle kommentaar en klagtes aangaande nasionale en departementele vraestelle die Direktoraat Eksamens binne drie dae na die voltooiing van die eksamen vir daardie besondere vraestel of vraestelle moet bereik.
1.2 Hierdie reëling is noodsaaklik omdat die paneel eksaminatore vir die nasionale vraestelle die memorandum drie dae na elke eksamen bespreek. Die impak wat klagtes op die nasienproses sou kon hê moet by die vroegs moontlike geleentheid bespreek word om te verhoed dat die leerders benadeel word.
1.3 Die brief aan die Direktoraat Eksamens moet nie na die skool se naam verwys nie. Slegs die sentrumnommer moet vertoon word ter voorbereiding vir die Nasionale Departement van Onderwys.
1.4 Alle relevante dokumente moet aan die Direktoraat Eksamens voorgelê word vir die aandag van: Mev M.M. Ludick (mmludick@pgwc.gov.za) of Mnr J.C. Albertyn jalberty@pgwc.gov.za).

2. PROSEDURE OM TE VOLG MET DIE HANTERING VAN ONREËLMATIGHEDE

In die geval van assesseringsonreëlmatighede wat geïdentifiseer is terwyl die vraestel geskryf is, moet die volgende prosedure gevolg word:

2.1 Die opsiener moet die leerder se skrif verwyder en die woord " ONREËLMATIGHEID" op die buitenste voorblad, saam met die soort onreëlmatigheid en die datum, tyd en plek van die onreëlmatigheid skryf.
2.2 Die woorde "Antwoordskrif gekonfiskeer op …….. om …….(tyd)" moet in vet drukletters op die buiteblad aangebring word.
2.3 Die opsiener moet beslag lê op enige ongemagtigde of inkriminerende materiaal, soos notas of enige ander voorwerp wat direk of indirek gebruik word of in besit van die leerder is en wat gebruik kon gewees het om die onreëlmatigheid te pleeg.
2.4 Sodanige materiaal moet aan die gekonfiskeerde eksamenskrif geheg word, wat dan die eiendom van die Departement word en nóg die leerder nóg sy of haar ouer(s) of voogde het die reg om te eis dat dit terugbesorg word.
2.5 Die opsiener moet dan aan die leerder 'n nuwe antwoordskrif gee. Die antwoordskrif moet ook geëndosseer word met die woorde:"NUWE ANTWOORDSKRIF - VERVANG ONREËLMATIGE SKRIF ", met die datum en tyd van uitreiking.
2.6 Die leerder moet ingelig word dat die feit dat hy of sy toegelaat is om met die eksamen voort te gaan nie gesien moet word as 'n kondonering van sy of haar oortreding van eksamenregulasies nie, maar dat 'n geskrewe verslag aan die einde van die eksamen aan die hoofopsiener voorgelê sal word en dat die insident aan die Provinsiale Eksamenonreëlmatigheidskomitee (PEOK) gerapporteer sal word.
2.7 Die opsiener moet geen addisionele tyd toelaat om te kompenseer vir die tyd wat verlore geraak het tydens die opsporing en prosessering van die eksamenonreëlmatigheid nie.
2.8 Na afloop van daardie eksamen moet die opsiener onmiddellik 'n volledige skriftelike verslag voorlê aan die hoofopsiener aangaande die onreëlmatigheid.
2.9 Die leerder moet, na voltooiing van die eksamen, met die onreëlmatigheid gekonfronteer word en die geleentheid gebied word om 'n geskrewe verklaring of reaksie op die beweerde oortreding te voorsien.
2.10 Waar die leerder weier om die vereiste geskrewe verklaring te voorsien of daarop te reageer, moet hierdie weiering deur die opsiener skriftelik in 'n verklaring bevestig word. Die leerder moet die skriftelike verklaring van die opsiener onderteken.
2.11 Indien die leerder weier om te voldoen aan die subartikel 2.10, moet 'n ander opsiener wat aan die eksamensentrum verbonde is 'n geskrewe verklaring voorsien ter bevestiging van die weiering van die leerder om 'n geskrewe verklaring te doen.
2.12 Die antwoordskrif, enige inkriminerende materiaal en alle toepaslike verklarings moet dan deur die Kringbestuurder voorgelê word aan die Departement vir die aandag van Mev M.M. Ludick (mmludick@pgwc.gov.za) of Mnu J.C. Albertyn jalberty@pgwc.gov.za). Die vorm vir die rapportering van enige onreëlmatighede kan ook gefaks word vir die aandag van mev MM Ludick by 021 461 5628. (Dit is belangrik dat die onreëlmatigheid volledig ingedien word aangesien ontbrekende dokumente die proses vertraag.)

3. U word ook verwys na paragraaf 11 (Onreëlmatighede) en paragraaf 12 (Klagtes) van die Prosedurehandleiding vir Prinsipale en Opsieners vir 2007 , sowel as na Staatskoerant Vol. 484 No 28156 van 21 Oktober 2005 met betrekking tot Regulasies vir die Afneem, Administrasie en Bestuur van Assessering vir die Senior Sertifikaat Eksamen.

4. 'n Dringende beroep word gedoen op prinsipale en hoofopsieners om seker te maak dat daar streng gehou word by bogenoemde instruksies vir die November 2007 Eksamen sowel as die Aanvullings-eksamen van 2008.


GETEKEN: A.P. CLAUSEN
HOOF: ONDERWYS
DATUM: 2007:09:07