1. Bestuurders van volwasseneleersentrums (VLS'e) word vriendelik versoek om die name en adresse van geskikte persone wat gewillig is om as hoofopsieners en hulpopsieners gedurende bogenoemde assessering in Oktober 2007 op te tree, op bygaande geel vorm (Bylae A), in te vul. Die vorm moet teen 31 Augustus 2007 aan die Kringbestuurders voorgelê word vir goedkeuring. Die finale lys name moet die Departement teen Donderdag, 6 September 2007 bereik.
2. Die finale rooster vir die BOOV Vlak 4-assessering in Oktober 2007 sal eersdaags aan VLS'e versend word.
3. Kringbestuurders moet hulle vergewis van die vaardighede van genomineerde persone veral ten opsigte van hul lees-, skryf- en sigvaardigheid sowel as hulle gesondheid. Daar word dus van die kringbestuurder verwag om 'n persoonlike onderhoud te voer met elke persoon wat as hoofopsiener genomineer is. Genomineerdes wat elders om 'n voltydse werk aansoek gedoen het, moet verkieslik nie vir aanstelling oorweeg word nie.
4. As gevolg van die implementering van die nuwe wette rakende die wisseling van tjeks, is dit noodsaaklik dat genomineerdes oor 'n bankrekening moet beskik aangesien opsienersgelde outomaties in bankrekeninge gedeponeer sal word.
5. NOMINASIE VAN HOOFOPSIENERS

Bylae B (groen vorm - Nominasie van Hoofopsieners) moet deur die sentrumbestuurder ingevul en onderteken word waarna 'n afskrif onmiddellik aan die persoon wat as hoofopsiener genomineer is, oorhandig moet word. Dié nominasiebrief vir hoofopsieners bevat belangrike instruksies.

Tydens die onderhoud met die hoofopsiener moet die kringbestuurder, nadat hy of sy hom of haar vergewis het dat die hoofopsiener bevoegd is om die pligte uit te voer, Bylae C (pienk vorm) aan die genomineerde oorhandig om in te vul waarna die vorm ook deur die kringbestuurder onderteken moet word.

6. NOMINASIE VAN HULPOPSIENERS

Die sentrumbestuurder moet verklaar dat die persoon/persone wat as hulpopsiener(s) benoem word, geskik is om in hierdie hoedanigheid op te tree, waarna die kringbestuurder aandui of die aanstelling van genomineerdes aanvaarbaar is. Bylae D (blou vorm) moet deur die hulpopsiener(s) ingevul en onderteken word.

7. Bylae A, B, C, D en E moet onverwyld deur die kringbestuurder by die Direktoraat: Eksamens ingedien word nie later nie as Donderdag, 6 September 2007 (vir aandag: mnr C. Slee, Kamer 529, WKOD-hoofkantoor).
8. Let asseblief daarop dat geen persoon wie se aanstelling nie deur die kringbestuurder goedgekeur is as opsiener mag optree nie. Opsieners mag onder geen omstandighede self plaasvervangers vir enige gedeelte van hul werk reël nie. Indien omstandighede verhoed dat 'n hoofopsiener of hulpopsiener toesig oor 'n assessering kan hou, moet die sentrumbestuurder in oorleg met die kringbestuurder die benoeming van 'n plaasvervanger reël. Die WKOD moet onverwyld dienooreenkomstig verwittig word.
9. Normaalweg moet geen persoon vir aanstelling as hoof- of hulpopsiener oorweeg word nie indien hy of sy

(a) jonger as 25 is,
(b) enige familieverwantskap het met 'n leerder wat geassesseer word of 'n fasiliteerder wat leerders vir die assessering voorberei,
(c) in enige hoedanigheid dien op die personeel van 'n bepaalde VLS, of
(d) die eggenoot of eggenote of enige ander familieverwant is van die hoofopsiener.

Hoofopsieners moet oor `n akademiese kwalifikasie beskik van ten minste graad 12 en hulpopsieners oor ten minste graad 10. Indien nie, moet `n skriftelike motivering vir die nominasie voorgelê word.

10. Indien daar meer as 30 leerders by een sessie is, is die WKOD bereid om vir so 'n sessie een hulpopsiener vir elke addisionele 30 leerders of gedeelte daarvan aan te stel, of een hulpopsiener vir elke kamer waarin daar leerders geakkommodeer word. By sessies waar daar slegs 'n klein getal leerders is (tot 'n minimum van twee) sal die dienste van een hulpopsiener benodig word. In hierdie geval sal die hoofopsiener nie normale opsienersdiens verrig nie, buiten om 'n hulpopsiener af te los wat 'n leerder moet vergesel wat toegelaat is om die lokaal weens 'n dringende behoefte te verlaat. Waar praktiese en teoretiese assesserings by dieselfde sessie afgeneem word, moet die dienste van 'n hulpopsiener gebruik word. Indien twee of meer hulpopsieners gebruik word waar daar twee of meer lokale gelyktydig benut word, sal die hoofopsiener nie normale opsienersdiens verrig nie.

VOORBEELD: Bylae A (geel vorm)

AANTAL KANDIDATEAANTAL HOOFOPSIENERSAANTAL HULPOPSIENERS
211
3011
3112

11. Waar die leerders almal van dieselfde geslag is, behoort die hoofopsiener en al die hulpopsieners van dieselfde geslag as die leerders te wees. Waar beide manlike en vroulike leerders by een sentrum geassesseer word, moet ten minste een van die hulpopsieners van 'n ander geslag wees as die hoofopsiener.

Die opsiener word aangestel met die uitdruklike verstandhouding dat hy of sy gedurende assessering sy of haar volle aandag aan toesighouding sal gee en nie enige ander werk van watter aard ookal, insluitende lees, skryf, brei, ens. sal verrig wat sy of haar pligte as opsiener in die wiele sal ry nie. Die opsiener mag onder geen omstandighede die leerders sonder toesig in die assesseringslokaal los nie.

12. VERGOEDING
12.1 Die WKOD stel opsieners aan en besoldig hulle ooreenkomstig die neergelegde departementele voorskrifte. Personeel in diens van gevangenisse wat as opsieners vir die BOOV Vlak 4-assessering optree, ontvang geen addisionele besoldiging nie. Indien opsieners nie in diens van die gevangenis is nie, moet die WKOD skriftelik in kennis gestel word.
12.2 Die tariewe is tans R89,60 per sessie vir hoofopsieners en R59,75 per sessie vir hulpopsieners. Die tariewe is onderhewig aan verandering.
12.3 Onder geen omstandighede sal reiskoste aan opsieners betaal word nie. Sentrumbestuurders moet dus opsieners aanstel wat deel is van die gemeenskap wat die VLS bedien. Indien 'n persoon tydens dieselfde sessie vir beide BOOV Vlak 4 en Senior Sertifikaat-eksamen opsienerswerk verrig, kan hy of sy slegs een keer vir daardie sessie eis.

L.W. Die regulasies met betrekking tot die aftrekking van werknemersbelasting (IRP10), bepaal dat salarisse van persone wat deeltyds in diens is, onderworpe is aan 'n belastingaftrekking van 25%. Die WKOD sal gevolglik die 25% vir belasting van elke opsiener se vergoeding aftrek. Die indiening van die sertifikaat vir werknemersbelastingaftrekking (IRP 3) geld derhalwe nie meer nie. Opsieners wat kwalifiseer om kwytskelding of gedeeltelike kwytskelding van die betaling van werknemersbelasting moet dus na ontvangs van hul IRP 5-sertifikaat (besonderhede van aftrekking van werknemersbelasting) die sertifikaat tesame met die voorgeskrewe I2.S-vorm by hul plaaslike belastingkantoor indien.

12.4 Hoofde van Gevangenisse moet asseblief daarop let dat dit verpligtend is om die aannamevorms (Bylae C en D) te voltooi en aan die WKOD terug te besorg.
12.5 Ten einde die uitbetaling van opsienerseise te bespoedig, is dit nodig dat elke hoof- en hulpopsiener hul identiteitsnommer op die aannamevorm aanbring en om 'n afdruk van die ID-dokument by die aannamevorms aan te heg. Dit is ook noodsaaklik dat beide hoof- sowel as hulpopsieners oor bankrekeninge moet beskik ten einde die uitbetaling te vergemaklik. Geen tjeks sal uitgereik word nie. Bylae E moet deur die genomineerdes voltooi word.
13. AKKOMMODASIE

Die hoofopsiener moet ten minste 'n maand voordat die assessering begin in oorleg met die sentrumbestuurder seker maak dat voldoende geskikte akkommodasie beskikbaar is vir al die leerders wat vir die assessering ingeskryf het. Kandidate moet geplaas word met voldoende ruimte tussen hulle om die moontlikheid van enige onreëlmatige gedrag uit te skakel. Die saal en/of die aantal klaskamers wat nodig sal wees, moet opgestel word dat 'n ruimte van 150 cm aan weerskante en 120 cm voor en agter elke bank, lessenaar of tafel waarby 'n kandidaat sit, toegelaat word. Die kringbestuurder moet besoeke aan die assesseringsentra in sy kring bring om vas te stel of aan hierdie voorskrif voldoen is. Dit is die plig van elke hoofopsiener om hom/haar te gaan vergewis van die geskiktheid van die akkommodasie voor die assessering amptelik begin.

14. Sentrumbestuurders word versoek om in oorleg met die kringbestuurder toe te sien dat bevredigende reëlings vir die assessering getref word en dit van so 'n aard is dat die leerders nie gedurende assesseringsessies gesteur sal word nie.
15. Kringbestuurders is alleen verantwoordelik vir die aanstel van opsieners vir VLS'e.
16. Die inhoud van hierdie eksamenminuut moet onder die aandag van die hoofopsiener gebring word wat dit weer aan die hulpopsieners moet oordra.


GETEKEN: A.P. CLAUSEN
HOOF: ONDERWYS
DATUM: 2007:08:01

Bylae A  (grootte: 6 KB)
Bylae B  (grootte: 6 KB)
Bylae C  (grootte: 7 KB)
Bylae D  (grootte: 11 KB)
Bylae E  (grootte: 10 KB)