1. Die voorlopige lys van inskrywings ten opsigte van Voltydse en/of BOOV-kandidate wat by u skool/sentrum geregistreer is vir die 2007 Senior Sertifikaat-eksamen, word hierby ingesluit vir kontrolering. Die besonderhede van elke kandidaat se inskrywing verskyn op hierdie drukstukke. As gevolg van ongeldige vakke of verkeerde vakkodes sal sommige skole voorsien word van 'n lys van kandidaatinskrywings wat nie suksesvol vanaf die Sentrale Onderwysbestuurs-inligtingstelsel (SOBIS) na die eksamenstelsel oorgedra kon word nie. Die name van hierdie kandidate verskyn derhalwe nie op die voorlopige skedules nie. U word dus vriendelik versoek om die betrokke gegewens van alle kandidate te kontroleer en dan

  • die gegewens van voltydse kandidate direk op die SOBIS te korrigeer en

  • die gegewens van BOOV-kandidate in rooi op die ingeslote lys te korrigeer.
2. Hierdie Eksamenminuut moet saam met Omsendbrief 0013/2004 van 5 Maart 2004 gelees word en die volgende word weereens beklemtoon.

(a) Die keerdatum vir aansoeke om graadverandering wat uitsonderlike omstandighede behels, was 30 April 2007, maar vanweë aanpassings op die SOBIS is die datum verleng na 25 Mei 2007.

U word dus versoek om sodanige graadveranderings direk op die SOBIS aan te bring. Neem ook asseblief kennis dat die SOBIS op 25 Mei 2007 om 16:00 sal sluit vir enige verdere wysigings.

(b) Kandidate wat ongemagtig van vak- of graad verander se uitslae sal na die Onreëlmatigheidskomitee verwys word vir 'n beslissing ten opsigte van die bekendmaking al dan nie van sodanige uitslae.

3. Die korrektheid van die volgende besonderhede ten opsigte van elke kandidaat moet gekontroleer word teenoor die skool of sentrum se rekords en die gegewens soos deur die kandidaat bevestig.
3.1 Persoonlike besonderhede: Identiteitsnommer, geboortedatum, geslag, spelling van die naam/name en van (verseker asseblief dat skryftekens in naam of van van kandidate (bv. ê, ë of é) duidelik aangedui is), adres, telefoonnommer, taalvoorkeur op sertifikaat, taalmedium asook die kandidaat se immigrantstatus, waar van toepassing. (Bevestig asseblief dat die gegewens op Bylae A korrek is. [Hierdie dokumente is nie aangeheg nie, maar is aan skole gestuur.] ) Indien 'n kandidaat se immigrantstatus nie aangedui is nie, moet die verwysingsnommer en die datum van die Departementele goedkeuringsbrief vir taalvrystelling in die gepaste kolom aangebring word.

LW: SERTIFIKATE WORD SLEGS IN ENGELS, AFRIKAANS/ENGELS OF XHOSA/ENGELS GEDRUK
3.2 Sorg moet gedra word dat die letter "M" in die "MT"-kolom verskyn vir kandidate wat aansoek gedoen het of vrygestel is van die vereiste om 'n amptelike Tweede Taal te slaag of aan te bied. Bring asseblief die R-doof- en S-blind-aanduidings in die "MT" kolom aan ten opsigte van sodanige kandidate.
3.3 Kontroleer die korrektheid van alle vakke en grade. Enige vak- of graadveranderings moet aangedui word by wyse van deurstreping van die betrokke vak(ke) of graad/grade of albei. Die korrekte vak(ke) en/of graad/grade moet netjies onder die bewoording "Getal vakke" ingeskryf word. Alle veranderinge moet slegs in rooi aangedui word. (slegs BOOV-kandidate)
3.4 Die nommers onder die opskrif "vir gebruik van Hoofkantoor alleenlik", "Vorige eksamennommer" en die "Inskrywingsnommer" op die drukstuk moet geïgnoreer word. Dit is alleenlik vir Departementele gebruik.
3.5 Elke kandidaat se inskrywing op die drukstuk toon aan of die kandidaat 'n Senior Sertifikaat-kursus met of sonder matrikulasie-endossement aanbied.

  • Indien 'n kandidaat 'n kursus aanbied vir 'n Senior Sertifikaat sonder matrikulasie- endossement sal sy of haar rekord "SC" aandui.

  • Indien 'n kandidaat se vakkeuse dié vir 'n Senior Sertifikaat met matrikulasie-endossement is, sal sy of haar rekord "SC/M" toon.

  • Indien 'n kandidaat nie die korrekte vakkeuse aanbied vir matrikulasie-endossement nie, sal die ontbrekende vereiste(s) deur "Foutverslag" aangedui word.

LW: ALLE INSKRYWINGS WORD AAN DIE MATRIKULASIE-ENDOSSE- MENTVEREISTES GETOETS.
4. Die besonderhede wat op die drukstuk verskyn, sal by die verwerking van die uitslae, druk van sertifikate, ens. aangewend word. Dit is dus gebiedend noodsaaklik dat elke kandidaat se rekord in hierdie stadium noukeurig gekontroleer word om foute by die verwerking van die eksamenuitslae uit te skakel. Geen wysigings (identiteitsnommers, name ens.) sal op sertifikate aangebring word nadat dit uitgereik is nie.
5. Ten opsigte van BOOV-kandidate, al kom daar geen foute op die drukstuk voor nie, moet sentrumbestuurders steeds skriftelik bevestig dat die besonderhede op die skedule in alle opsigte korrek is.
6. Prinsipale moet asseblief seker maak dat alle wysigings ten opsigte van voltydse kandidate slegs op die SOBIS reggestel word. Bylae B, ("Bevestiging van Regstellings") moet ook voltooi word en nie later nie as 25 Mei 2007 aan die Departement teruggestuur word.
7. In gevalle waar die prinsipaal of sentrumbestuurder beswaar het dat 'n kandidaat die Senior Sertifikaat-eksamen aflê, moet hy sodanige besware volledig per brief aan die Departement voorlê. U aandag word ook gevestig op Omsendbrief 0026/2000 van 18 Februarie 2000 en 0121/2003 van 13 Mei 2003.
8. Prinsipale of Sentrumbestuurders word versoek om die nodige reëlings te tref met Skynet Koerierdiens (telefoonno. 021 531 9191) om die gewysigde lyste af te haal ten einde die Departement nie later nie as 25 Mei 2007 by die volgende adres te bereik: 
Die Hoof: Onderwys
Vir aandag: mnr. F. Jacobs (Kamer 515A, Vyfde Vloer)
Wes-Kaap Onderwysdepartement
Grand Central Towers
Laer Parlementstraat
Kaapstad.
9. OBOS-direkteure en kringbestuurders word ernstig versoek om toe te sien dat daar streng by die bogenoemde keerdatum gehou word.
10. U samewerking sal hoog op prys gestel word.


GETEKEN: L.C. ARENDSE
HOOF: ONDERWYS
DATUM: 2007:08:05

Bylae A  (grootte: 7 KB)