1. Ter ondersteuning van die implementering van die Nasionale Kurrikulumverklaring in graad 12 in 2008 het die Wes-Kaap Onderwysdepartement (WKOD) 'n spesiale projek onderneem om aan graad 12-leerders een handboek vir elk van hulle 7 vakke te verskaf.
2. Omsenbrief 0022/2007 het skole voorsien van 'n geleentheid om boeke te bestel van die nasionale graad 12-boekelys.
3. 'm WKOD-kennisgewing van 18 Junie 2007 het aan skole verlof toegestaan om hulle bestellings vir die volgende vakke terug te hou: Landbouwetenskappe, Dansstudies, Ingenieursgrafika en -ontwerp, Meganiese Tegnologie, Dramatiese Kuns en Inligtingstegnologie, aangesien die keuse van 'n handboek in elke geval tot slegs 'n Engelse weergawe beperk was.
4. Die nasionale Departement van Onderwys het 'n vroeë aanduiding gegee dat geen nuwe handboekvoorleggings vir Landbouwetenskap, Dansstudies en Inligtingstegnologie ontvang is nie. Die skole wat hulle bestellings vir hierdie vakke teruggehou het, kan nou van die oorspronklike graad 12-katalogus bestel, aangesien daar geen addisionele handboeke op die aanvullende katalogus vir hierdie vakke is nie. Hierdie skole moet hulle bestellings teen 23 November 2007 voorlê op die gewysigde rekwisisievorm wat by hierdie minuut aangeheg is as Bylae A. 'n Opsomming van die graad 12-boekelys is aangeheg as Bylae B.
5. Let asseblief daarop dat die handboekbestellings vir graad 12 in 2008 nie die graad 11 inskrywings vir 2007 vir elke vak mag oorskry nie. Hierdie projek maak voorsiening slegs vir die handboeke vir elke leerder se eerste 7 verpligte vakke.
6. Skole wat hulle bestellings vir Ingenieursgrafika en -ontwerp, Meganiese Tegnologie, Dramatiese Kunste, Siviele Tegnologie, Ontwerp, Elektriese Tegnologie en Visuele Kunste teruggehou het, moet intussen die rekwisisievorm voltooi (aangeheg by hierdie minuut as Bylae C), met 'n aanduiding van die getal leerderhandboeke en onderwysersgidse wat benodig word. Hierdie skole moet hulle voltooide rekwisisievorms voorlê, wat insluit hulle keuse van handboeke vir elk van hierdie vakke, sodra die nasionale graad 12 aanvullende boekelys beskikbaar raak op 30 November 2007.
7. Om te verseker dat die handboeke teen 18 Januarie 2008 afgelewer word, moet elke skool 'n personeellid aanstel wat gekontak kan word sodra die lys beskikbaar is. Stuur asseblief die aangehegte Addendum D, wat die aangestelde personeellede se kontakbesonderhede verskaf aan me Priscilla Phillips by ptphillips@pgwc.gov.za of aan faksnommer 021 903 9473 teen 23 November 2007.
8. Rekwisisievorms moet deur die prinsipaal onderteken word en moet die skool se stempel vertoon. Gestempelde en getekende rekwisisievorms moet per hand afgelewer word aan me P Phillips, Onderwysmultisentrum, Nooiensfonteinweg, Kuilsrivier, of moet gepos word aan Privaatsak X14, Kuilsrivier, 7579.
9. Bylae A (rekwisisie vir Landbouwetenskappe, Dansstudies en Inligtingstegnologie) en Bylae D (kontakbesonderhede van personeellid) moet teen 23 November 2007 teruggestuur word. Bylae C (aanvullende rekwisisie) moet teruggestuur word teen 4 Desember 2007.
10. Prinsipale word ook daaraan herinner dat skole nie handboeke via die spesiale projek mag ophoop nie en dat SOBIS-gegewens gebruik word om inskrywingstalle te verifieer.


GETEKEN: P. SATYO
HOOF: ONDERWYS
DATUM: 2007:11:20

Bylae A  (grootte: 13 KB)
Bylae B  (grootte: 10 KB)
Bylae C  (grootte: 7 KB)
Bylae D  (grootte: 8 KB)