1. Die nasionale Departement van Onderwys het die volgende beleidsdokumente hersien om die implementering van die Nasionale Kurrikulumverklaring (Graad 10 - 12) te versterk en te ondersteun:

  • Vakassesseringsriglyne

  • Staatskoerant - Protokol oor Rekordhouding en Verslaggewing
2. Hierbenewens het Higher Education South Africa ook 'n gids gepubliseer om leerders,ouers en onderwysers te ondersteun om korrekte vakkeuses en beroepsloopbane te identifiseer:

  • Op Pad na die Hoër Onderwys: 'n Gids vir Skole.
3. Die dokumente sal binnekort aan alle skole gestuur word. Indien 'n skool nie 'n afskrif van bogenoemde dokumente ontvang nie, moet die betrokke OBOS genader word aangesien 'n aantal addisionele afskrifte beskikbaar sal wees om moontlike tekorte te dek.
4. Die Onderwysdepartement het die hersiene Vakassesseringsriglyne (VAR'e) gedruk in elk van die 29 vakke van die NKV (Graad 10 - 12). Hierdie VAR'e is in Afrikaans vertaal en sal ook versprei word in ooreenstemming met die skool se taal van onderrig.
5. Let asseblief daarop dat die hersiene Vakassesseringsriglyne (Januarie 2007) ook verkry kan word op die Thutong Onderwys-poort by www.thutong.org.za of http://curriculum.wcape.school.za.
6. Let asseblief daarop dat dit van kardinale belang is dat onderwysers die nuutste weergawes van bogenoemde dokumente moet gebruik. Die gebruik van verouderde dokumente kan daartoe lei dat leerders nie reg voorberei word vir vordering, die Nasionale Senior Sertifikaat of toelating tot Hoër Onderwys nie, aangesien beduidende veranderinge in sommige vakke aangebring is. Die 2006-uitgawes moet dus deur die 2007-weergawes vervang word.
7. Kurrikulumadviseurs is in kennis gestel van hierdie veranderinge en sal leiding aan skole verskaf indien daar navrae is.
8. Skole sal ook 'n vakhulpbronpak ontvang wat ontwikkel is in samewerking met die plaaslike Hoëronderwysinrigtings om onderwysers toegang tot kennis van nuwe vakinhoud te bied. Die doel van hierdie vakhulpbronpakke, wat op NKR-vlak 5 geskryf is, is om onderwysers se kennis en konseptuele begrip te ondersteun van nuwe kurrikuluminhoud wat in graad 10 tot 12 (NKR vlak 3 tot 4) onderrig moet word.
9. Prinsipale word versoek om seker te maak dat betrokke personeellede afskrifte van die dokumente ontvang waarna daar in hierdie korrespondensie verwys word.


GETEKEN: J.P. RAULT-SMITH
HOOF: ONDERWYS
DATUM: 2007:02:06


Die dokumente, waarna verwys word in die Minuut, is aan skole gestuur.