1. Inleiding

Beleid aangaande die aflê van die Nasionale Seniorsertifikaat (NSS) deur leerders met leerstoornisse, word onderlê deur Witskrif 6 oor Spesialebehoefte-onderwys: Die Bou van 'n Inklusiewe Onderwys- en Opleidingstelsel (2001). Witskrif 6 bepaal dat assesseringsprosesse vir leerstoornisse voorsiening sal maak en dat huidige beleid en praktyke hersien en herskryf sal word om seker te maak dat die behoeftes van alle leerders erken sal word en aandag sal kry.

2. Die WKOD het vir baie jare al vraestelle vir visueel gestremde leerders aangepas. Onlangs het die WKOD met die twee spesialisskole vir visueel gestremde leerders in die provinsie in gesprek getree. Hierdie samesprekings het die WKOD groter insig gegee in die behoeftes van visueel gestremde leerders te kry met betrekking tot eksamenvraestelle.
3. Die WKOD sal die volgende aanpassings voorsien vir blinde en swaksiende leerders:
3.1 Blinde leerders sal gebrailleerde vraestelle ontvang. Indien daar prente, sketse en foto's in 'n vraag voorkom, sal die vraag deur 'n ander geskikte vraag vevang word.
3.2 Swaksiende leerders sal 'n vraestel ontvang waar die font vergroot sal word tot Arial 16 op 'n A4-bladsy. Die sketse sal ook vergroot word en sal in 'n addendum verskyn. Die oorspronklike skets of diagram sal nog in die vraestel verskyn om die leerder te help. Gekleurde papier sal in die hele vraestel gebruik word om swaksiende leerders in die Senior Sertifikaat-eksamen van 2007 te help.
3.3 In die geval van 'n blinde of swaksiende leerder wat nie die eksamen self kan skryf nie as gevolg van 'n verdere gestremdheid, sal die WKOD 'n amanuensis voorsien om die vraestel te lees en om namens die leerder te skryf.
3.4 Oudiokassette sal voorsien word aan blinde asook swaksiende leerders wat addisionele hulp benodig.
4. Die volgende proses moet gevolg word wanneer aansoek gedoen word om aanpassings vir blinde of swaksiende leerders:
4.1 Skole moet die aangehegte statistiekvorm gebruik om aansoek te doen om 'n bepaalde aangepaste vraestel vir graad 11- en 12-eksamens asook vir die GTA in graad 9.
4.2 Die vakkode en vakbeskrywing wat op die vorm ingevul moet word, kan van die registrasievorm op SOBIS gekry word.
4.3 Die algehele aantal leerders vir wie aangepaste vraestelle per vak benodig word, moet in die kolomme voltyds of deeltyds ingevul word. Besonderhede per kategorie van ondersteuning moet ook ingevul word.
4.4 In die geval waar 'n amanuensis of bandhulp benodig word, moet die kolomme vir grootdruk of Braille nie ingevul word want die nodige inligting is alreeds in die kolomme vir hierdie twee addisionele ondersteuningskategorieë voorsien.
4.5 Die statistiekvorm moet ingevul word en teen 31 Julie 2007 gestuur word aan die Direktoraat: Eksamenadministrasie vir die aandag van mev B. Calvert. Die Direktoraat: Eksamenadministrasie sal die vorms verwerk en hulle aan die Konsessiekomitee van die WKOD vir finale goedkeuring voorsien.
5. Die Konsessiekomitee sal skole van sy besluit verwittig en as dit goegekeur word, sal die nodige ondersteuningsmateriaal aan skole voorsien word voor die aanvang van die eksamen. Normale sekuriteitsreëlings rakende die eksamen sal ook van toepassing wees op die ondersteundingsmateriaal, wat in die kluis van die skool toegesluit moet word.
6. Bring hierdie inligting asseblief onder die aandag van alle onderwysers by u skool.


GETEKEN: M.J. CAMERON
HOOF: ONDERWYS
DATUM: 2007:07:17

Onderwyswitskrif 6  (grootte: 319 KB)
Statitiekvorm  (grootte: 12 KB)