1. Die seleksie en gebruik van leer- en onderrigondersteuningsmateriaal (LOOM), wat insluit handboeke, gedrukte materiaal, nie-gedrukte materiaal en elektroniese materiaal, is 'n baie belangrike element van kurrikulumontwikkeling en -bestuur vir die onderwyser. Dit is ook noodsaaklik dat die leerders toegang het tot behoorlike en toepaslike LOOM ten einde suksesvol te kan leer.
2. In hierdie tydperk van vinnige veranderinge en ontwikkeling van die kurrikulum, is die korrekte keuse van LOOM 'n besondere uitdaging. Ten einde onderwysers in staat te stel om ingeligte keuses uit te oefen met betrekking tot LOOM, het die Wes-Kaap Onderwysdepartement 'n lêer saamgestel wat 5 boekies bevat. Hierdie boekies sal onderwysers help om daardie keuses te maak.
3. Elke boekie dek 'n bepaalde onderwerp ten opsigte van die seleksie en gebruik van LOOM:
  • Volume 1: Seleksie: Algemene Riglyne
  • Volume 2: Riglyne vir seleksie: Grondslagfase en Leerareas Graad 4 - 9
  • Volume 3: Fotokopiëring en Kopieregriglyne
  • Volume 4: Leer- en Onderrighulpbronne aanbeveel vir Graad R tot 9
  • Volume 5: Seleksie van Digitale Hulpbronne vir die Klaskamer.
    		•
    4. Elke skool sal voorsien word van 3 kopië van die lêer: Een vir die prinsipaal, een vir die lid van die skoolbestuurspan wat verantwoordelik is vir die verkryging van handboeke en hulpbronne en een vir algemene gebruik deur die onderwysers.
    5. Die boekie, Volume 2: Riglyne vir seleksie: Grondslagfase en Leerareas Graad 4 - 9, voorsien ook riglyne vir 'n personeelontwikkelingswerkswinkel wat die ontwikkeling van die vereiste kennis en vaardighede vir die toepaslike seleksie van LOOM sal ondersteun.
    6. Volume 1 en 5 word op die oomblik in Xhosa vertaal en sal so gou moontlik by die betrokke skole afgelewer word.
    7. Daar word vertrou dat hierdie lêer en die inhoud daarvan van hulp sal wees aan prinsipale, onderwysers en uiteindelik die leerders.


    GETEKEN: M. CAMERON
    HOOF: ONDERWYS
    DATUM: 2007:07:18