1. Die WKOD se Geletterdheid-en-syferkundigheidstrategie is 'n reaksie op die identifikasie van oor die algemeen lae vlakke van geletterdheid en gesyferdheid. Ingevolge hierdie strategie het die WKOD 'n aantal intervensies onderneem, insluitende die assessering van graad 6-leerders al om die ander jaar om die vlakke van geletterdheid en syferkundigheid in die provinsie, in 'n OBOS en in alle skole te bepaal. Die analise van die prestasie van leerders in 'n skool het ten doel om aan onderwysers en ondersteuningspersoneel 'n begrip te gee van hoe die leerders in elke skool hulle geletterdheids- en gesyferdheidsvaardighede ontwikkel en om geskikte ondersteuning te verleen.
2. Die eerste twee graad 6-assesseringstoetse is in 2003 en 2005 afgeneem. Presies dieselfde items is in beide toetse gebruik ten einde die standaard te bepaal en om geldige vergelykings tussen die uitslae te tref. Die databasis met vrae is nou uitgebrei deur middel van 'n itembank, waardeur addisionele items van presies dieselfde standaard voorsien word. Dit het die WKOD in staat gestel om 'n aantal items vry te stel (hierby aangeheg) wat onderwysers 'n idee sal gee van die tipe, inhoud en formaat van die vrae wat in die provinsiale assesseringstoets ingesluit is. In die Wiskunde-voorbeelde is soortgelyke items geselekteer, wat wissel van graad 4 tot graad 7. In die Taal-voorbeelde teiken die verskillende take verskillende grade, wat vordering illustreer.
3. Die items sal ook op die WKOD se webtuiste beskikbaar wees by http://curriculum.pgwc.gov.za, op die Wiskunde AOO-webwerf en die Tale AOO-webtuiste onderskeidelik.
4. Die oogmerk met die vrystelling van hierdie items is NIE dat onderwysers die toetsitems deur middel van gedekontekstualiseerde drilwerk moet onderrig nie. Dit het ten doel om onderwysers daarop te wys dat die toetse die leeruitkomste van die Nasionale Kurrikulumverklaring assesseer en dat onderwysers hulle leerders voldoende vir die volgende rondte toetse kan voorberei deur deeglik aan die kennis, vaardighede en waardes dwarsoor die hele kurrikulum aandag te gee en wel binne 'n betekenisvolle konteks.
5. Inrigtings en organisasies buite die WKOD kan die materiaal gebruik, mits dit nie op winsbejag gemik is nie en die bron behoorlik erken word.
6. Enige gebruiker is welkom om terugvoer te gee en dit kan gerig word aan die hoofkurrikulumadviseur by die OBOS'e of aan die Direkteur: Kurrikulumontwikkeling.
7. Die WKOD wil dié skole en onderwysers bedank wat hierdie hulpbronmateriaal gebruik vir kritieke kurrikulumaanwending en -ontwikkeling. Skakel asseblief met u kurrikulumadviseur vir die Intermediêre Fase by u OBOS vir verdere leiding en ondersteuning.


GETEKEN: M.J. CAMERON
HOOF: ONDERWYS
DATUM: 2007:07:17

Wiskunde voorbeelde  (grootte: 130 KB)
Taal voorbeelde  (grootte: 43 KB)